ރޯދަ މަހަށް ޚާއްސަ އޮފަރތަކެއް ދިރާގުން ތައާރަފުކޮށްފިއެވެ.

މި އޮފަރތައް ތައާރަފުކޮށްފައިވަނީ ހުކުރު ދުވަހު ދިރާގު ހެޑް އޮފީހުގައި ބޭއްވި ނޫސްވެރިންގެ ބައްދަލުވުމެއްގައެވެ.

ނޫސްވެރިންގެ ބައްދަލުވުމުގައި ވާހަކަދައްކަވަމުން ދިރާގުގެ އެސިސްޓަންޓް މެނޭޖަރ އިވެންޓްސް އެންޑް އެޑްވަޓައިޒިންގ ޝާރިއު އާދަމް ވިދާޅުވީ މި އޮފަރތައް ކަސްޓަމަރުންނަށް ހުޅުވާލީ ރޯދަ މަހު ދިރާގުގެ ޚިދުމަތްތައް ކަސްޓަމަރުންނަށް ފަސޭހައިން ބޭނުންކުރެވޭނެ ގޮތް ހެދުމަށް ކަމަށެވެ. އަދި މި އޮފަރތަކުގެ ބޭނުން އެންމެން ފުރިހަމައަށް ކަސްޓަމަރުން ހިފާނެ ކަމަށް އުންމީދު ކުރާ ކަމަށްވެސް ޝާރިއު ވިދާޅުވިއެވެ.

ދިރާގުން ބުނީ ހުރިހާ ފައިބަރ ބްރޯޑްބޭންޑް ރެޒިޑެންޝަލް ކަސްޓަމަރުންނަށް 50 އިންސައްތަ އިތުރު ޑޭޓާ އޭޕްރިލް މަސް ނިމެންދެން ލިބޭނެ ކަމަށެވެ. އަދި މިއީ ދީނީ މައުލޫމާތުގެ އިތުރުން މުނިފޫހިފިލުވުމަށާއި އެމީހަކަށް ކަމުދާ ރެސިޕީ ބަލާލުމަށް ފުރުސަތު ދިނުމުގެ ގޮތުން ނިންމި ނިންމުމެއް ކަމަށް ދިރާގުން ބުނެއެވެ.

މީގެއިތުރުން ދިރާގު މޮބައިލް ކަސްޓަމަރުންނަށް ވެސް ވަނީ އޮފަރތަކެއް ތައާރަފުކޮށްފައެވެ. އެގޮތުން ދިރާގު މޮބައިލް އެޕްލިކޭޝަން ބޭނުންކޮށްގެން ޑޭޓާ ގިފްޓް މީހަކަށް ހަދިޔާ ކުރުމުން، އެ ގަންނަ ޖީބީގެ އިތުރުން، 100 އިންސައްތަ އިތުރު ޑޭޓާ ލިބިގެންދާނެ ކަމަށް ދިރާގުން ބުނެއެވެ. އަދި ކޮންމެ މަންތްލީ ޕްލޭނެއް އެކްޓިވޭޓް ކުރުމުން ސަޅި ޕްރިޕެއިޑް ކަސްޓަމަރުންނަށް ކޮންމެ ހަފްތާ ބަންދެއްގައި 2 ޖީބީ ހިލޭ ލިބިގެންދާނެ ކަމަށް ދިރާގުން ބުނެއެވެ. އަދި އަމިއްލަ ޕޯސްޓްޕެއިޑް ކަސްޓަމަރުންނަށް އަމިއްލަ ވޮއިސް ޕްލަސުން 50 އިންސައްތަ ޑިސްކައުންޓް ވެސް ލިބިގެންދެއެވެ.

ދިރާގު ޓީވީ ގެންގުޅޭ ކަސްޓަމަރުންނަށް ވެސް ހުރިހާ ޗެނަލްތައް އެއްވެސް ޗާޖަކާއި ނުލާ ނެގުމުގެ ފުރުސަތު ވެސް ވަނީ ހުޅުވާލާފައެވެ. އަދި ގޯލްޑް ޕެކޭޖް ގެންގުޅޭ ކަސްޓަމަރުންނަށް ރޯދަ ލަކީ ޑްރޯގައި ބައިވެރިވެވޭނެ ކަމަށާއި ގުރުއަތުން ހޮވޭ ފަސް މީހަކަށް އިފްތާރް ޕެކޭޖް ލިބިގެންދާނެ ކަމަށް ދިރާގުން ބުނެއެވެ.

މީގެއިތުރުން ދިރާގުން ބުނީ އެހެން އަހަރުތަކެކޭ އެއްގޮތަށް މިއަހަރުވެސް ދިރާގު ޕޭ އަދި ވެބްސައިޓް މެދުވެރިކޮށް ފިތުރު ޒަކާތް ދެއްކޭނެ ކަމަށެވެ. އަދި4545# އަށް މެސެޖްކޮށްގެން ދިރާގު ޕްރީޕެއިޑް ކަސްޓަމަރުންނަށް ފިތުރު ޒަކާތް ދެއްކޭނެ ކަމަށެވެ.