ހިއްސާއަކަށް 6.20 ރުފިޔާ ޑިވިޑެންޑްގެ ގޮތުގައި ބަހަން ދިރާގުން ފާސްކޮށްފިއެވެ.

މިގޮތަށް ނިންމާފައިވަނީ ކްރޮސްރޯޑްސް މޯލްޑިވްސްގައި ބޭއްވި އެ ކުންފުނީގެ 33 ވަނަ އަހަރީ އާންމު ޖަލްސާގައެވެ. މިއަހަރުގެ ޖަލްސާ ބާއްވާފައިވަނީ 'ހައިބްރިޑް' މޮޑެލްއަކަށެވެ. މިދިޔަ ދެ އަހަރެކޭވެސް އެއްފަދައިން މި އަހަރުގެ އަހަރީ އާންމު ޖަލްސާގައި ވޯޓު ނަގައިފައިވަނީ މޯލްޑިވްސް ސެކިއުރިޓީޒް ޑިޕޮސިޓަރީ ޕްރައިވެޓް ލިމިޑެޓުގެ "ފަހިވޯޓު" މެދުވެރިކޮށް އޮންލައިންކޮށެވެ.  

ދިރާގުން ބޭއްވި 33 ވަނަ އަހަރީ އާންމު ޖަލްސާގައި 85 ހިއްސާދާރުންނާއެކު 71,369,648 (ހަތްދިހަ އެއް މިލިއަން ތިންލައްކަ ފަސްދޮޅަސްނުވަހާސް ހަސަތޭކަ ސާޅީސް އަށް) ހިއްސާ ތަމްސީލުކޮށް، ހުށަހަޅާފައިވާ ފަސް ރިޒޮލިއުޝަނެއް ފުރިހަމަ އަޣުލަބިއްޔަތުން ވަނީ ފާސްވެފައެވެ.

ކުންފުނީގެ މާލީ ހާލަތަށް ރިއާޔަތްކުރުމާއެކީގައި، ޑިޓެކްޓަރުންގެ ބޯޑުން ހުށަހަޅައި މުޅި އަހަރުގެ ޑިވިޑެންޑްގެ ގޮތުގައި ހިއްސާއަކަށް 6.20 ރުފިޔާ ޑިވިޑެންޑްގެ ގޮތުގައި ބެހުމަށްވަނީ ނިންމާފައެވެ. މުޅި އަހަރުގެ ޑިވިޑެންޑް ބިނާވެގެންވަނީ 33 ވަނަ އޭޖީއެމްއަށް ބޯޑުން ހުށަހަޅާފައިވާ ފައިދާއިން ހިއްސާއަކަށް 4.13 ރުފިޔާގެ ފައިނަލް ޑިވިޑެންޑްއާއި 2022 ވަނަ އަހަރުގެ ކުރީކޮޅު އިއުލާންކޮށްފައިވާ ހިއްސާއަކަށް 2.07 ރުފިޔާގެ އިންޓެރިމް ޑިވިޑެންޑް ހިމެނޭ ގޮތަށެވެ. 2021 ވަނަ އަހަރުގެ ޑިވިޑެންޓްއަކީ 2020 ވަނަ އަހަރާއި އަޅާކިޔާއިރު ހިއްސާއަކަށް 1.03 ރުފިޔާ މަދު އަދަދެކެވެ.

2021 ވަނަ އަހަރު ކުންފުނީގެ ޖުމްލަ އާމްދަނީއަށް 2.5 ބިލިއަން ރުފިޔާ ލިބިފައިވާއިރު، މީ 2020 ވަނަ އަހަރާއި އަޅާކިޔާއިރު، 1.8 އިންސައްތަ މަތީ އަދަދެކެވެ. ކުންފުނީގެ މުހިންމު ވިޔަފާރިތަކަށް ބަލާއިރު އެންމެ ބޮޑު އާންމުދަނީއެއް ލިބިފައިވަނީ ފިކްސްޑް ބުރޯޑްބޭންޑް އަދި އެންޓަޕްރައިޒް ޚިދުމަތުންނެވެ. މި ކުރިއެރުމުގެ އެންމެ ބޮޑު ނަތީޖާއަކީ ރާއްޖޭގެ އިގުތިސާދު ހީނަރުކަމުން އަރައިގަތުމުގެ ދަތުރު ފަށާފައިވުމާއި، ފަތުރުވެރިކަމުގެ ސިނާއަތް ރަނގަޅުވަމުން އައުމުގެ ސަބަބުންކަމަށް ދިރާގުން ބުނެއެވެ. 2021 ވަނަ އަހަރު ޓެކްސް އުނިކުރުމަށްފަހު ޖެހޭ ސާފު ފައިދާގެ ގޮތުގައި 813 މިލިއަން ރުފިޔާ ލިބިފައިވީއިރު، މިއީ 2020 ވަނަ އަހަރާއި އަޅާކިޔާއިރު 11 އިންސައްތަ މަތީ އަދަދެކެވެ.

މީގެ އިތުރުން، މި ޖަލްސާގައި، އާންމު ހިއްސާދާރުން ތަމްސީލުކުރުމަށް 84 ވޯޓާއެކު، އަހުމަދު މުހައްމަދު ދީދީ ވަނީ އައު ޕަބްލިކް ޑިރެކްޓަރުގެ ގޮތުގައި ބޯޑަށް އައްޔަންކޮށްފައެވެ.

ކޮވިޑް-19 ގެ ސަބަބުން ކުރިމަތިވެފައިވާ ގޮންޖެހުންތަކަށްފަހު 2021 ވަނަ އަހަރު ވެގެންދިޔައީ ރިކަވަރީގެ އަހަރަކަށްކަން ދިރާގުން ފާހަގަކުރެއެވެ. ޑިޖިޓަލް ޚިދުމަތްތައް މެދުވެރިކޮށް ދިރިއުޅުމަށް އިތުރު ފުރިހަމަކަމެއް ހޯދައިދިނުމަށާއި، ޑިޖިޓަލް ހަމަހަމަކަން ކުރިއަރުވާ، ޑިޖިޓަލް ފަރަގު ނައްތާލަން ގިނަ މަސައްކަތްތަކަކާއި އިންވެސްޓްމެންޓުތަކެއްވަނީ ކޮށްފައެވެ. ގޭބިސީތަކަށް ދޭ އިންޓަރނެޓްގެ ޚިދުމަތާއި މޯބައިލް ޑޭޓާގެ އަގު ހެޔޮކުރުމަށް ސަރުކާރުން ފަށާފައިވާ "ނެޓްހެޔޮ" ސިޔާސަތަށް އެއްބާރުލުން ދިނުމުގެ ގޮތުން، ބްރޯޑްބޭންޑް އަދި މޯބައިލް ޑޭޓާ ޕޯޓްފޯލިއޯއަށް ބޮޑެތި ހެޔޮ ބަދަލުތަކެއް ގެނެސްފައިވާކަމަށާއި، ނަތީޖާއެއްގެ ގޮތުން ކުންފުނީގެ މާލީ ހާލަތު ރަނގަޅުވެފައިވާކަމަށް ދިރާގުން ބުނެއެވެ.

ދިވެހިރާއްޖޭގައި ޓެލެކޮމިއުނިކޭޝަންސް ހިދުމަތުގެ ތަރައްގީއަށް ދިރާގުން ކުރަމުންދާ މަސައްކަތްތަކުގެ ތެރޭގައި، 2021 ވަނަ އަހަރު ދުނިޔޭގެ ވަރުގަދަ މުޢާސަލާތީ އަދި ޓެކްނޮލޮޖީ، 13 ކުންފުންޏެއް ހިމެނޭ ކޮންސޯޓިއަމް އާއި ގުޅި، ރާއްޖެ ސީމީވީ 6 ސަބްމެރިން ކޭބަލް ސިސްޓަމާއި ގުޅާލުމަށް އެއްބަސްވުމެއްގައި ސޮއިކޮށް އެމަސައްކަތް އަމަލީ ގޮތުން ފަށާފައިވާކަމުގައި ދިރާގުން ބުނެއެވެ. ޑިޖިޓަލް ޚިދުމަތްތަކަށް ބޭނުންވެފައިވައި މިންވަރު އިތުރުވަމުންދާ މި ދަނޑިވަޅުގައި، މި ސަބްމެރިން ކޭބަލް ސިސްޓަމްގެ ސަބަބުން ރާއްޖޭގެ ޑިޖިޓަލް އިންފްރާސްޓަރްކްޗަރ އިތުރަށް ވަރުގަދަވެ ބައިނަލްއަގުވާމީ ޑިޖިޓަލް ހަބަކަށް ވުމަށް އިތުރު ބާރެއްލިބިގެންދާނެ ކަމަށްވެސް ދިރާގުން ބުނެއެވެ.