ގަތަރާއި ގަލްފްގެ ބައެއް ގައުމުތަކާ ދެމެދު އުފެދިފައިވާ ނުތަނަވަސް ކަމުގެ ސަބަބުން 2022 ގައި ގަތަރުގައި އޮންނަ ވޯލްޑް ކަޕަށް އަސަރު ކޮށްފާނެ ކަމާމެދު ދުނިޔޭގެ ފުޓްބޯޅަ ޖަމްއިއްޔާ ފީފާ އިން ސީދާ ވަކި އެއްޗެއް ނުބުންޏެވެ. އޭގެ ބަދަލުގައި ހޯމަ ދުވަހު ފީފާއިން ބުނީ ފީފާ އާއި ގަތަރުގެ ވާލްޑް ކަޕް އިންތިޒާމް ކޮމިޓީއާ ދެމެދު ބަރާބަރަށް މަޝްވަރާ ތައް ކުރިއަށްދާ ކަމަށެވެ.
ސައުދީ އަރަބިއްޔާ އާއި މިސްރާއި، ޔުނައިޓެޑް އެރަބް އެމިރޭޓްސްއާއި ޔަމަން އަދި ދިވެހިރާއްޖޭން ގަތަރާއެކު އޮންނަ ސިޔާސީ ގުޅުން ކަނޑާލާފައިވާ ކަން ހޯމަ ދުވަހު ވަނީ އިއުލާން ކޮށްފައެވެ.
ހޯމަ ދުވަހު ފީފާއިން ނެރުނު ބަޔާނެއްގައި ބުނެފައިވަނީ 2022 ގެ ވާލްޑް ކަޕްގެ އިންތިޒާމްތަކާ ބެހޭ ގޮތުން ގަތަރުގެ ވާލްޑްކަޕް އިންތިޒާމް ކޮމިޓީއާއި މުބާރާތުގެ އިންތިޒާމްތަކާ ބެހޭ ގޮތުން މަޝްވަރާ ކުރަމުންދާ ކަމަށާއި މިކަމާބެހޭ ގޮތުން މި ވަގުތައް އިތުރު އެއްޗެއް ބުނަނަ ނެތް ކަމަށެވެ.
ގަތަރުން ގެންދަނީ ވާލްޑްކަޕަށް ތައްޔާރު ވުމުގެ ގޮތުން ގިނަ މަސައްކަތްތަކެއް ކުރަމުންނެވެ. ގަތަރާއި ސިޔާސީ ގުޅުންތައް ބައެއް ގައުމުތަކުން ކަނޑާލިކަން އިއުލާނު ކުރި އިރު ތަފާތު އެކި އެކި ކުޅިވަރުތަކުގެ 72 އިވެންޓެއް މިއަހަރު ބޭއްވުމަށް ގަތަރުން ދަނީ މަސައްކަތް ކުރަމުންނެވެ. އެއީ ވާލްޑްކަޕްގެ ކުރިން ގަތަރުގެ އިމޭޖް ރަނގަޅު ކުރުމަށް އިންތިޒާމް ކުރެވޭ މުބާރާތްތަކެކެވެ. މީގެ ތެރެއިން 39 އިވެންޓަކީ ބައިނަލް އަގްވާމީ ފެންވަރުގައި ބޭއްވުމަށް މަސައްކަތް ކުރަމުންދާ އިވެންޓް ތަކެކެވެ.
