ރ. އިންނަމާދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް އަލީ ނަޝީދުގެ މައްސަލަ ސާބިތުނުވާކަމަށް ޖުޑީޝަލް ސަރވިސް ކޮމިޝަން (ޖޭއެސްސީ)ން ނިންމައިފިއެވެ.

ބުރާސްފަތި ދުވަހު ޖޭއެސްސީން ބުނީ, ކޮމިޝަނަށް ހުށަހެޅުނު ޝަކުވާއަކާ ގުޅިގެން, 2021 ފެބްރުއަރީ 23 ވަނަ ދުވަހު, ސުލޫކީ މައްސަލަ ތަހުގީގު ކުރުމަށް އިންނަމާދޫ މެޖިސްޓްރޭޓް ކޯޓުގެ އިސް މެޖިސްޓްރޭޓް އަލީ ނަޝީދަށް ނޯޓިސްދީފައިވާ ކަމަށެވެ.

ޖޭއެސްސީން ތަހުގީގުކޮށްފައިވަނީ އިންނަމާދޫ ކޯޓުގެ އިސްމެޖިސްޓްރޭޓް ނަޝީދު، މުޖުތަމައު ގަބޫލުނުކުރާފަދަ, އަޚުލާގީ މިންގަނޑާ ޚިލާފު ކަންތައްތަކެއް ކުރަމުންދާކަމަށް ބުނެ ހުށަހަޅާފައިވާ މައްސަލައެކެވެ.

އެ މައްސަލަ ތަހުގީގުކުރުމަށްފަހު, ސާބިތުނުވާކަމަށް 2022 ފެބްރުއަރީ 23 ވަނަ ދުވަހު ބޭއްވި އެ ކޮމިޝަނުގެ މިއަހަރުގެ 12 ވަނަ ބައްދަލުވުމުގައި ނިންމާފައިވާކަމަށް ޖޭއެސްސީން ބުނެއެވެ.