ރެއާލް މެޑްރިޑަށް ކުޅެމުން އަންނަ އަލްވަރާ މޮރާޓާ ވިއްކާލުމަށް ރެއާލް އާއި އޭސީ މިލާން އެއްބަސްވުމަކަށް އަތުވެއްޖެ ކަމަށް ރިޕޯޓްތައް ބުނެފި އެވެ.
ރިޕޯޓްތައް ބުނާގޮތުން އޭސީ މިލާންގެ ސްޕޯޓިން ޑައިރެކްޓާ އާއި މޮރާޓާ ވަނީ ޗެމްޕިއަންސް ލީގު ފައިނަލް މެޗު ކުޅުމުގެ ކުރިން ކާޑިފްގައި ބައްދަލުކޮށްފައެވެ. އެގޮތުން 60 މިލިއަން ޕައުންޑުގެ އަގަށް އޭސީ މިލާން އެއްބަސްވެފައިވާކަމަށްވެސް ރިޕޯޓްތައް ބުނެއެވެ.
މޮރާޓާގެ އިތުރުން އޭސީ މިލާނުން އަންނަނީ ޓޮރީނޯގެ ފޯވާޑް އެންޑްރޭ ބެލޮޓީ ހޯދުމަށްވެސް މަސައްކަތްކުރަމުންނެވެ. އެހެންމަވެސް ރިޕޯޓްތައް ބުނާގޮތުން މޮރާޓާ އަކީ އޭސީ މިލާންގެ ފުރަތަމަ ޗޮއިސްއެވެ.
ރެއާލް މެޑްރިޑާ ދެވަނަ ފަހަރަށް ގުޅުނު މޮރާޓާ އަލުން އެނބުރި އެ ކްލަބަށް ގެނެސްފައިވަނީ ޔުވަންޓަސް އިން 70 މިލިއަން ޕައުންޑާ ގާތްކުރާ އަގަކަށެވެ.
ރެއާލް މެޑްރިޑްގެ ފުރަތަމަ އެގާރައިން ޖާގަ ލިބުން ދަތިވެފައިވާ މޮރާޓާ މި ސީޒަނަށްފަހު ރެއާލް ދޫކޮށްލާނެ ކަމަށް ރިޕޯޓްތައް ބުނަމުން އަންނަ އިރު، ރެއާލް އިން އަންނަނީ އެޓްލެޓިކޯ މެޑްރިޑްގެ ސްޓްރައިކަރު އެންޓޯނިއޯ ގްރިޒްމަން ހޯދަންވެސް މަސައްކަތްކުރަމުންނެވެ.
މީގެއިތުރުން އާސެނަލްއާއެކު ސްޓްރައިކަރު އެލެކްސަސް ސަންޗޭޒް ހަދާފައިވާ އެއްބަސްވުން އިތުރުކުރާނެކަން އަދިވެސް ކަށަވަރުނުވާއިރު، އެ ކްލަބުން އަންނަނީ ސްޓްރައިކަރުން އިތުރުކުރުމަށް ވިސްނަމުން ކަމަށްވެސް ރިޕޯޓްތައް ބުނެއެވެ. އެގޮތުން އެ ކްލަބަށް ކުރިޔަށް އޮތް ސީޒަނަށް ކޯޗު އާސެން ވެންގާ ގެންނަން އެންމެ ބޭނުންވަނީ މޮރާޓާ ކަމަށްވެސް ރިޕޯޓްތައް ބުނެއެވެ.
ރެއާލް މެޑްރިޑް ޔޫތް ޓީމުން ކެރިޔަރު ފެށި މޮރާޓާ އެ ކްލަބްގެ ސީނިއާ ޓީމަށް ކުޅެން ފެށީ 2010 ވަނަ އަހަރެވެ. އެގޮތުން އޭނާ ވަނީ އެ ކްލަބުގައި ހަތަރު ސީޒަން ހޭދަކޮށް ކުޅުނު 52 މެޗުގައި 11 ލަނޑު ކާމިޔާބުކޮށްފައެވެ.
ރެއާލް ދޫކޮށްލުމަށްފަހު މޮރާޓާ ޔުވަންޓަސް އަށް 2014 ވަނަ އަހަރު ބަދަލުވެފައިވާއިރު، އެ ކްލަބުގައި ދެ ސީޒަން ވަނީ ހޭދަކޮށްފައެވެ. އެގޮތުން އޭނާ ވަނީ އެޓީމަށް ކުޅުނު 94 މެޗުގައި 31 ލަނޑު ކާމިޔާބުކޮށް، އެޓީމާއެކު އިޓާލިއަން ލީގު ދެފަހަރު، އިޓާލިއަން ކަޕް ދެފަހަރު ކާމިޔާބުކޮށްފައެވެ. މީގެއިތުރުން އޭނާ ވަނީ އިޓާލިއަން ސުޕާކަޕްގެ ދެވަނަ އަދި ޔުއެފާ ޗެމްޕިއަންސް ލިގުގެ ދެވަނަ ވެސް ޔުވަންޓަސްއާއެކު ކާމިޔާބުކޮށްފައެވެ.
ޔުވަންޓަސް ދޫކޮށްލުމަށްފަހު މޮރާޓާ ރެއާލް އަށް ބަދަލުވީ މި ސީޒަނުގައެވެ. އެގޮތުން އޭނާ ވަނީ މިވީތަނަށް މި ސީޒަނުގައި އެޓީމަށް ކުޅުނު 42 މެޗުގައި 20 ލަނޑު ކާމިޔާބުކޮށްފައެވެ.
