ރަޝިއާއިން ޔޫކްރެއިންއަށް ހަމަލާ ދޭނެކަމުގެ އިންޒާރު ދީފައިވާތީ, ޔޫކްރެއިންގައި ތިބި ދިވެހިންގެ ހާލަތު ވަރަށް ގާތުން ބަލަމުންދާކަމަށް ފޮރިން މިނިސްޓްރީން ބުނެފިއެވެ.

ފޮރިން މިނިސްޓްރީން ބުނީ ޖަރުމަނުގައި ހުންނަ ރާއްޖޭގެ އެމްބަސީ މެދުވެރިކޮށް ޔޫކްރެއިންގައި ތިބި ދިވެހިން ހާލަތު ވަރަށް ގާތުން ބަލަމުންދާ ކަމަށާއި، ހުރިހާ އެންމެންގެ ހާލު ރަނގަޅު ކަމަށެވެ. އަދި އެގައުމުގައި 50ށްވުރެ ގިނަ ދިވެހި ދަރިވަރުން ތައުލީމް ހާސިލްކުރަމުންދާއިރު، އެ ދަރިވަރުންގެ ހާލަތު ވެސް ގާތުން ބަލަމުންދާކަން މިނިސްޓްރީން ފާހަގަކުރިއެވެ.

ބޭރުގެ މީޑިއާތަކުގައި ރިޕޯޓުކޮށްފައިވާގޮތުގައި, ރަޝިއާއިން ދޭން އުޅޭ ހަމަލާތައް އަމާޒުކުރަނީ އެގައުމުގެ ވެރިރަށް ކީވްއަށެވެ.

ޔޫކްރެއިންގެ މައްސަލައާ ގުޅިގެން އެމެރިކާގެ ރައީސް ޖޯ ބައިޑަންގެ ނޭޝަނަލް ސެކިޔުރިޓީ އެޑްވައިޒަރ ޖޭކް ސުލިވަން ނޫސްވެރިންނާ ބައްދަލުކުރައްވައި ވިދާޅުވީ, އެމެރިކާއަށް ލިބެމުންދާ އިންޓެލިޖެންސް މައުލޫމާތުތަކަށް ބަލާއިރު ރަޝިޔާ އޮތީ ޔޫކްރެއިންއަށް ކޮންމެ ގަޑިއެއްގައި އެރުމަށްވެސް އަސްކަރީ ގޮތުން ތައްޔާރަށެވެ. ޔޫކްރެއިނަށް އެރުމުގެ އަސްކަރީ ހުރިހާ ގާބިލުކަމެއް ރަޝިޔާގައި އެބަހުރިކަމަށް ޖޭކް ވިދާޅުވިއެވެ.

ފާއިތުވި ހަފުތާތަކުގައި ރަޝިޔާއިން ވަނީ, ޔޫކްރެއިންއާ ރަޝިޔާ ގުޅޭ ބޯޑަރު ސަރަހައްދުގައި އެއްލައްކަ ސިފައިން ބައިތިއްބާފައެވެ. އަދި ބްލެކް ސީ ސަރަހައްދުގައި އަންނަނީ އަސްކަރީ ތަމްރީނުތައް ކުރިޔަށް ގެންދަމުންނެވެ. ނަމަވެސް ރަޝިޔާއިން ޔޫކްރެއިންއަށް އަރާނެކަމަށް ދެކެވޭ ވާހަކަތައް އަންނަނީ ތަކުރާރުކޮށް ދޮގުކުރަމުންނެވެ. ނަމަވެސް ސަލާމަތީ ގޮތުން ކަންތައްތަކެއް ކަށަވަރުކުރަން ބޭނުންވެ އެކަންކަން ހުށަހަޅާފައިވާއިރު, އޭގެތެރޭގައި ޔޫކްރެއިނުން ދުވަހަކުވެސް ނޭޓޯއާ ނުގުޅޭނެކަމުގެ ޔަގީންކަން ދިނުމަށް އަންނަނީ އެދެމުންނެވެ.

އަނެއްކޮޅުން އެމެރިކާއިން ވަނީ އެގައުމުގެ 3000 ސިފައިން ޕޮލެންޑްގައި ހުންނަ އެގައުމުގެ އަސްކަރީ ބޭހަށް ފޮނުވާފައެވެ. މިއީ މިހާރު އެސަރަހައްދުގައި ހަރަކާތްތެރިވާ 8500 ސިފައިންނަށްވުރެ އިތުރަށް އެމެރިކާއިން އެސަރަހައްދަށް ފޮނުވާފައިވާ ސިފައިންނެވެ.