ރާއްޖޭގެ ޚާރިޖީ ސިޔާސަތު ބިނާވެގެންވަނީ ދިވެހިރާއްޖޭގެ ސިޔާދަތީ މިނިވަންކަމާއި އިސްތިޤްލާލު ރައްކާތެރިކުރުމާއި އިންސާނީ ޙައްޤުތައް ހިމާޔަތްކުރުން ކަމަށް ރައީސުލްޖުމްހޫރިއްޔާ އިބްރާހިމް މުހައްމަދު ސާލިޙު ވިދާޅުވެއްޖެއެވެ.

މިއަހަރަށް ރިޔާސީ ބަޔާން އިއްވަވަމުން ރައީސް ސާލިޙު ވިދާޅުވީ ރާއްޖޭގެ ޚާރިޖީ ސިޔާސަތު ބިނާވެގެން ވަނީ ރާއްޖޭގެ ސިޔާދަތީ މިނިވަންކަމާއި އިސްތިޤުލާލު ރައްކާތެރިކުރުމުގެ އިތުރުން، އިންސާނީ ޙައްޤުތައް ހިމާޔަތްކުރުމާއި އަދި ޑިމޮކްރެސީގެ ހަމަތަކާ އުސޫލުތައް ނަގަހައްޓައި، މޫސުމަށް އަންނަ ބަދަލުތަކުން ޤައުމު ރައްކާތެރިކުރުމުގެ މައްޗަށް ކަމަށެވެ. މި ސަރުކާރުން ދަމަހައްޓަމުން އަންނަ ޚާރިޖީ ސިޔާސަތުގެ މައްޗަށް އަލިއަޅުއްވާލައްވައި ރައީސް ސާލިޙު ވިދާޅުވީ އދ.ގެ 76 ވަނަ އާންމު މަޖިލީހުގެ ރިއާސަތަށް ދިވެހިރާއްޖޭގެ ޚާރިޖީ ވަޒީރު، ނިޝާން އިއްޒުއްދީންގެ އިއްޒަތުގެ ވެރިޔާ އަބްދުﷲ ޝާހިދު، އިންތިޚާބުވުމަކީ ދިވެހި ޤައުމަށް ލިބުނު ޝަރަފަކާއި ރީތި ނަމެއް ކަމަށެވެ.

ރައީސްގެ ރިޔާސީ ބަޔާނުގައި އެމަނިކުފާނު ވަނީ ރާއްޖެ ތަރައްޤީ ކުރުމުގެ މަސައްކަތުގައި ލިބެމުންދާ އެންމެހައި އެހީތެރިކަމަށް އިންޑިއާ، ޗައިނާ، ޖަޕާން، އެމެރިކާ، ޔޫ.އޭ.އީ، ސައުދީ އަރަބިއްޔާ، ޕާކިސްތާން، ކުވެއިތު، ސްރީލަންކާ، އީ.ޔޫ އަދި އެހެނިހެން ދެދޭ ހުރިހާ ޤައުމުތަކަށް ދިވެހި ސަރުކާރުގެ ނަމުގައި ޝުކުރު އަދާކުރައްވާފައެވެ.

ރައީސް ވިދާޅުވީ ދައުލަތުގެ އެންމެ މަތީ ވެރިޔާގެ ގޮތުގައި އެމަނިކުފާނާއި މަތިވެފައިވާ އެންމެ އިސް ވާޖިބަކީ، ރާއްޖޭގެ މިނިވަންކަމާއި ސިޔާދަތު ރައްކާތެރިކުރުމާއި އަމާން، ސުލްހަވެރި މާހައުލެއް ދިވެހި ރައްޔިތުންނަށް ހޯދައިދިނުން ކަމަށެވެ.

ރައީސްގެ ވާހަކަފުޅުގައި އެކުވެރި ދައުލަތްތަކުން ތަފާތު އެކި ތަމްރީންތައް ހޯދުމަށް ލިބިފައިވާ ފުރުސަތުތަކުގައި އެކި ޤައުމުތަކުގައި ދިވެހި ސިފައިން މިހާރުވެސް ތަމްރީންތައް ފުރިހަމަކުރަމުން އަންނަކަން ފާހަގަކުރައްވައި ޑޯނިއާ މަތިންދާ ބޯޓާ، ހެލިކޮޕްޓަރާއި ކޯސްޓްގާޑްގެ އުޅަނދުފަހަރާ ސީއެމްބިއުލާންސްގެ ޒަރީއާއިން ދިވެހި ސިފައިން މިދިޔަ އަހަރު ހިންގި އޮޕަރޭޝަންތަކުގެ ބައެއް ތަފާސްހިސާބުތައް ވެސް ހިއްސާކުރެއްވިއެވެ. އަދި އިންޑިއާ ކަނޑަކީ ސުލްޙަވެރި އަމާންތަނަކަށް ހެދުމަށް ޒަމާނުއްސުރެ ރާއްޖެއިން އަދާކުރާ ދައުރު އަވަށްޓެރި ޤައުމުތަކާއެކު އަދާކުރާނެ ކަމަށް އެމަނިކުފާނު ވިދާޅުވިއެވެ.

ފުލުހުންގެ ޚިދުމަތް ފުޅާކޮށް ތަރައްޤީ ކުރުމަށް ސަރުކާރުން ކުރާ މަސައްކަތްތަކަށް އަލިއަޅުއްވާލައްވައި ރައީސް ވިދާޅުވީ މިދައުރުގެ ތެރޭގައި ރާއްޖޭގެ މީހުން ދިރިއުޅޭ ހުރިހާ ރަށެއްގައި ފުލުހުންގެ ޚިދުމަތް ޤާއިމްކުރުމަށް ތައްޔާރުކޮށްފައިވާ ޕްލޭން މިހާރު ތަންފީޒްކުރަމުން އަންނަ ކަމަށެވެ. އަދި މުޖްތަމައުގެ އަމާންކަން ދެމެހެއްޓުމަށް ފުލުހުންގެ ދައުރު އިތުރުކުރުމުގެ ގޮތުން، ރާއްޖޭގެ ހަތަރު ސިޓީ އަދި ހުވަދު އަތޮޅާއި އަރިއަތޮޅުގައި މިހާރު ނެއިބަރހުޑް ޕޮލިސިންގ ރަސްމީކޮށް ފަށާފައިވާކަމަށާއި މިއަހަރުގެ ތެރޭގައި ކ. އަތޮޅާއި ތ. އަތޮޅުގައި މި މޮޑެލް ރަސްމީކޮށް ފަށާނެކަން އެމަނިކުފާނު ހާމަކުރެއްވިއެވެ. މީގެ އިތުރުން މިހާރު ފަށާފައިވާ ޒަމާނީ ޕޮލިސިން ފަލްސަފާގެ ދަށުން، ފީލްޑްގައި މަސައްކަތްކުރާ ފުލުހުން މިމަހުގެ ތެރޭގައި ބޮޑީ ކެމެރާ ބޭނުންކުރަން ފަށާނެކަން ރައީސް ހާމަކުރެއްވިއެވެ.

ރިޔާސީ ބަޔާން އިއްވަވަމުން ރައީސް ވަނީ މަސްތުވާތަކެއްޗާއި ދެކޮޅަށް ރާއްޖޭގެ ފުލުހުންނާއި، ކަސްޓަމްސް އާއި ކަމާއި ގުޅޭ އެހެނިހެން މުއައްސަސާތަކުން އެންމެ ބޮޑު ކާމިޔާބީއެއް ހޯދީ މިދިޔަ ތިން އަހަރުގައިކަން ފާހަގަކުރައްވައި އޭގެ ބައެއް ތަފްސީލުތަކަށް ވެސް އަލިއަޅުވާލައްވާފައެވެ.