ޕްރެޒިޑެންޓްސް ކަޕުގެ ލީގު ބުރުގެ ފަހު މެޗުގައި މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް، މެޗަކުން ބަލިނުވެ ފައިނަލަށް ކުލަބު ވެލެންސިއާ ދަތުރުކުރިއިރު، ލަނޑުގެ ތަފާތުން މާޒިޔާވެސް ފައިނަލަށް ދަތުރުކޮށްފިއެވެ.

ގައުމީ ފުޓްބޯޅަ ދަނޑުގައި ބުދަ ދުވަހުގެރޭ ކުޅުނު މެޗުން މާޒިޔާ އަތުން ވެލެންސިއާ މޮޅުވީ 1-0 ގެ ނަތީޖާއަކުންނެވެ. މި މެޗަށް ނުކުތްއިރުވެސް ވެލެންސިއާއަށް ފައިނަލުގެ ޖާގައެއް ވަނީ ކަށަވަރުވެފައެވެ. އެގޮތުން އެ ޓީމަށް ފައިނަލުގެ ޖާގައެއް ކަށަވަރުވީ ބުދަ ދުވަހުގެ ހަވީރު ކުޅުނު މެޗުގައި ކުލަބު އީގަލްސް އަތުން ކުލަބު ގްރީން ސްޓްރީޓްސް ބަލިވުމާ ގުޅިގެންނެވެ.

ބުދަ ދުވަހުގެރޭ ކުޅުނު މެޗު ފަށައިގެން މާޒިޔާއިން ބޯޅަ ކޮންޓްރޯލްކޮށް ވެލެންސިއާގެ ހާފަށް ބާރުބޮޑުކުރިއިރު، މެޗުގެ ހަވަނަ މިނެޓުގައި އެ ޓީމުގެ ގެ ބިދޭސީ ފޯވާޑް ކޮނޭލިއަސް ސްޓެވާޓް (ކޯނޭ) އަށް ވަނީ ރަނގަޅު ފުރުސަތެއް ލިބި ބޭކާރުވެފައެވެ.

އޭގެ ފަހުން މެޗުގެ 15 ވަނަ މިނެޓުގައި ވެލެންސިއާގެ ކެޕްޓަން އަލީ ފާސިރު (ސެންޓޭ) ފޮނުވާލި ހިލޭ ޖެހުމުގެ ހުރަހަކަށްވީ މާޒިޔާގެ ގޯލްކީޕަރު ކިރަން ކުމާރް ލިމްބޫއެވެ. އެކަމަކު މެޗުގެ 30 ވަނަ މިނެޓުުގައި ވެލެންސިއާއިން ވަނީ ލަނޑު ޖަހައި، ލީޑު ނަގާފައެވެ. ބޯހަސް މާޓިންގެ އެހީތެރިކަމާއެކު މި ލަނޑު އެ ޓީމަށް ކާމިޔާބުކޮށްދިނީ ސެންޓޭއެވެ.

މި މެޗުގެ ދެވަނަ ހާފުގައި މާޒިޔާއިން އެ ޓީމުގެ އެޓޭކުތައް ވަރުގަދަކުރިއިރު، މެޗުގެ 57 ވަނަ މިނެޓުގައި ސްޓެވާޓަށް ވަނީ ލަނޑު ޖަހަން ރަނުގެ ފުރުސަތެއް ލިބި ބޭކާރުވެފައެވެ. އޭގެ ފަހުން މި ހާފުގައި ވެލެންސިއާއަށް ވަނީ ޕެނަލްޓީއެއް ލިބިފައެވެ. އެކަމަކު މެޗުގެ 71 ވަނަ މިނެޓުގައި ސެންޓޭ ފޮނުވާލި ޕެނަލްޓީ މާޒިޔާގެ ގޯލްކީޕަރު ކިރަން ވަނީ ދިފާއުކޮށްފައެވެ. މިއީ އޭރިއާ ތެރެއިން ވެލެންސިއާގެ ހުސެއިން ހަނާނަށް މާޒިޔާގެ ހައިޝަމް ހަސަން (ބިޑި) ކުރި ފައުލަކާ ގުޅިގެން ދިން ޕެނަލްޓީއެކެވެ.

މި މެޗު ވެލެންސިއާއިން ނިންމާލާފައިވަނީ އެއް ކުޅުންތެރިއެއް މަދުކޮށެވެ. އެގޮތުން މެޗުގެ 76 ވަނަ މިނެޓުގައި ވެލެންސިއާގެ އަޙްމަދު ސިޒާނަށް ވަނީ ސީދާ ރަތް ކާޑެއް ދައްކާފައެވެ. އޭނާއަށް ރެފުރީ ރަތް ކާޑެއް ދެއްކީ، ވެލެންސިއާގެ ހާފުގެ ތެރެއިން މާޒިޔާގެ ހަމްޒާ މުޙައްމަދު (ހަމްޕު) އަށް ކުރި ފައުލަކާ ގުޅިގެންނެވެ.

މ މޮޅާއެކު ވެލެންސިއާއިން ލީގު ބުރުގެ އެއްވަނަ ހޯދީ 19 ޕޮއިންޓާއެކުއެވެ. ދެވަނައަށް ދިޔަ މާޒިޔާ އާއި ތިންވަނައަށް ދިޔަ ގްރީން ސްޓްރީޓްސްއަށް ލިބުނީ 15 ޕޮއިންޓެވެ. މާޒިޔާއަށް ފައިދާ 10 ލަނޑު އޮތްއިރު، ގްރީން ސްޓްރީޓްސްއަށް ލިބިފައިވަނީ ފައިދާ ނުވަ ލަނޑެވެ.

އެހެންކަމުން ފައިނަލުގައި ވެލެންސިއާ އާއި މާޒިޔާ ބައްދަލުކުރާއިރު، ޕްރެޒިޑެންޓްސް ކަޕުގެ ފައިނަލް މެޗު ކުޅޭނީ އަންނަ އާދީއްތަ ދުވަހުގެ ހަވީރު ރ. އަލިފުށީ ޓާފް ދަނޑުގައެވެ.