އަލިފާނުގެ ހާދިސާ ހިނގި މޯލްޑިވިއަންގެ ފްލައިޓް ބުދަ ދުވަހު ހެނދުމު މާލެ ގެނެސްފިއެވެ.
އަންގާރަ ދުވަހުގެ ރޭ ހަނިމާދޫ އިންޓަރނޭޝަނަލް އެއަރޕޯޓުން ފުރަން ތައްޔާރުވެފައި ވަނިކޮށް އަލިފާނުގެ ހާދިސާއެއް ހިނގައި، ފްލައިޓް ވަނީ ހުސްކޮށްފައެވެ. އެ ހާދިސާގައި އެއްވެސް ފަސިންޖަރަކަށް ގެއްލުމެއް ލިބިފައެއް ނުވެއެވެ.
ގައުމީ އެއަރލައިންގެ މެނޭޖިނގް ޑިރެކްޓަރު މުހައްމަދު މިހާދު ވިދާޅުވީ، ހާދިސާ އިތުރަށް ތަހުގީގު ކުރަމުން އަންނަ ކަމަށާއި، ފްލައިޓް މިހާރު ވެލާނާ އިންޓަރނޭޝަނަލް އެއަރޕޯޓަށް ގެނެސްފައިވާ ކަމަށެވެ. ހާދިސާ ހިނގުމާއެކު އިންޖިނިއަރުންގެ ޓީމެއް ހަނިމާދޫއަށް ގޮސް ފްލައިޓްގައި ދިމާވި މައްސަލަ ހައްލު ކޮށްފައިވާ ކަމަށެވެ. އަދި އެ ފްލައިޓް މިހާރު އޮތީ ދަތުރުކުރެވޭ ހާލަތުގައި ނަމަވެސް އިތުރަށް ބަލަން ޖެހޭ ކަންކަން އިންޖިނިއަރުން ބަލަމުން އަންނަ ކަމަށެވެ.
ހާދިސާ ހިނގިއިރު ފްލައިޓްގައި 37 ޕަސިންޖަރުންނާއި ޕައިލެޓެއްގެ އިތުރުން 2 ކެބިން ކްރޫއިން ތިއްބެވެ. ފަސިންޖަރުން ރޭގެ ވަގުތެއްގައި އެހެން ފްލައިޓަކުން ވަނީ މާލެ ގެނެސްފައެވެ.
