ހދ. ނޮޅިވަރަންފަރުގައި ހަލުވިކަމާއެކު ކޮވިޑް ފެތުރެމުންދާތީ ފިޔަވަޅުތައް ވަރުގަދަކޮށްފައިވާކަމަށް އެރަށު ކައުންސިލުން ހާމަކޮށްފިއެވެ.

ނޮޅިވަރަމްފަރު ކައުންސިލްގެ ރައީސް ނަދީމް އަބްދުﷲ ވިދާޅުވީ ކޮވިޑް ކޮންޓްރޯލް ކުރުމަށްޓަކައި ފިޔަވަޅުތަކެއްވެސް އަޅާފައިވާ ކަމަށާއި އެގޮތުން ވިޔަފާރި ކުރަން ވަކި ޚާއްސަ ގަޑިތަކެއް ކަނޑައަޅައި ކާފިއު ގަޑިތައްވެސް އިއުލާންކޮށްފައިވާކަމަށެވެ.

އެގޮތުން ހަވީރު 6:00ން ހެނދުނު 6:00ށް ކާފިއު ހިންގަން ނިންމާފައިވާއިރު ކާފިއު ވަގުތު ޒަރޫރީ ބޭނުމެއްގައި ގެއިން ބޭރަށް ނުކުންނަމަ އެރަށު ޕޮލިސް ސްޓޭޝަނަށް ގުޅައިގެން ކަންކަން ކުރިއަށް ގެންދިއުމަށް ކައުންސިލުން ވަނީ އަންގާފައެވެ.

ކާފިއު ނޫން ވަގުތުތަކުގައިވެސް ޒަރޫރީ ބޭނުމެއްގައި ނޫނީ ބޭރަށް ނުނިކުތުމަށާއި، ރޯގާގެ އަލާމާތްތައް ހުރި ފަރާތްތަކުން ގެއިން ބޭރަށް ނުނިކުތުމަށްވެސް ވަނީ އަންގާފައެވެ. އަދި ރޯގާގެ އަލާމަތްތައް ހުރިކަން ސިއްހީ މަރުކަޒަށް އެންގުމަށް ކައުންސިލުން އެދިފައިވެއެވެ.

ވިޔަފާރިކުރަން ފިހާރަތަކަށް ވަދެވޭނީ ގިނަވެގެން ދެ މީހުންނަށްކަމަށާއި ކާފިއު ގަޑީގައި ކުރެވޭނީ ހަމައެކަނި ޑެލިވަރީކަމަށްވެސް ކައުންސިލުން އަންގާފައި ވެއެވެ. މީގެ އިތުރުން ޓޭކްއަވޭ ފިޔަވާ ހޮޓާ ކެފޭތަކުން ދޭ އެހެނިހެން ޚިދުމަތްތައް ހުއްޓާލުމަށްވެސް ވަނީ އަންގާފައެވެ. ޓޭކްއަވޭ ޚިދުމަތްވެސް ދެވޭނީ ހެނދުނު 06:00ން ރޭގަނޑު 12:00ށެވެ.

މި ވަގުތު އެރަށުގެ އެކްޓިވް ކޭސްތަކުގެ އަދަދަކީ 65 އެވެ. އެންމެ ފުރަތަމަ އެރަށުން ކޮވިޑް ކޭހެއް ފެނުނީ މިމަހު 4 ވަނަ ދުވަހުއެވެ.

ކޭސްތަކާއި ގުޅިގެން މިވަގުތު އެރަށުގެ 55 ގެއެއް ވަނީ މޮނިޓަރިންގެ ހާލަތަށް ގެނެސްފައެވެ. ޕޮޒިޓިވްވި ފަރާތްތަކުގެ ތެރޭގައާއި ކޮންޓެކްޓުންގެ ތެރޭގައިވެސް ހައި ރިސްކު މީހުން ހިމެނޭކަމަށާއި ނަމަވެސް އެންމެންގެ ހާލުވެސ ރަނގަޅުކަމަށް ވެސް ކައުންސިލުން މައުލޫމާތު ދެއްވައެވެ.