ޖަރުމަން ލީގުގައި ހޮނިހިރު ދުވަހުގެރޭ ކުޅުނު މެޗުން ބޮރޫޝިއާ ޑޯޓްމުންޑުން ފަހަތުން އަރައި އެއިންޓްރެކްޓް ފްރެންކްފަޓް ބަލިކޮށްފިއެވެ.

ރަށުން ބޭރުގައި ކުޅުނު މެޗުން ޑޯޓްމުންޑް މޮޅުވީ ފްރެންކްފަޓް އަތުން 3-2 ގެ ނަތީޖާއަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ފުރަތަމަ ހާފުގައި ފްރެންކްފަޓުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗުގެ 15 ވަނަ މިނެޓުގައި ރަފައެލް ސަންޓޯސް ބޮރޭ ވަނީ ފްރެންކްފަޓަށް ލީޑު ނަގައިދީފައެވެ. އަދި ނުވަ މިނެޓު ފަހުން ފްރެންކްފަޓުން ލީޑު ފުޅާކުރިއިރު، މި ލަނޑުވެސް އެ ޓީމަށް ކާމިޔާބުކޮށްދިނީ ބޮރޭއެވެ.

މި މެޗުގެ ދެވަނަ ހާފުގައި ޑޯޓްމުންޑުން ކުޅުން ރަނގަޅުކުރިއިރު، މެޗުގެ 71 ވަނަ މިނެޓުގައި ތޯގަން ހަޒާޑް ވަނީ ލަނޑެއް ޖަހައި، އެ ޓީމަށް ފަރަގު ކުޑަކޮށްދީފައެވެ. އޭގެ ފަހުން ޑޯޓްމުންޑުން ގިނަ ހަމަލާތަކެއް އުފެއްދިއިރު، މެޗު ނިމެން ތިން މިނެޓަށް ވެފައި ވަނިކޮށް އެ ޓީމަށް ނަތީޖާ އެއްވަރުކޮށްދިން ލަނޑު ކާމިޔާބުކޮށްދިނީ ޖޫޑް ބެލިންހަމެވެ. އަދި އޭގެ ދެ މިނެޓު ފަހުން މަހްމޫދު ދާއޫދު ވަނީ އޭރިއާ ބޭރުން ފޮނުވާލި ހަމަލާއަކުން ލަނޑެއް ޖަހައި، މި މެޗުން ޑޯޓްމުންޑް މޮޅުކޮށްދީފައެވެ.

މި މޮޅާއެކު ތާވަލުގެ ދެވަނައިގައި ޑޯޓްމުންޑް އޮތީ ކުޅުނު 18 މެޗުން ލިބުނު 37 ޕޮއިންޓާއެކުއެވެ. ތާވަލުގެ އެއްވަނައިގައި އޮތް އެންމެ ފަހުގެ ޗެމްޕިއަން ބަޔާން މިއުނިކަށް 18 މެޗުން 43 ޕޮއިންޓް ލިބިފައިވާއިރު، ބަޔާނާއި ޑޯޓްމުންޑާ ދެމެދު ހަ ޕޮއިންޓުގެ ފަރަގެއް އެބައޮތެވެ.