މިނިމަމް ވޭޖް އެލަވަންސް ތައާރަފްކޮށް, އަންނަ ޖެނުއަރީ މަހުން ފެށިގެން ސިވިލް ސަރވިސް މުވައްޒަފުންނަށް މުސާރަ ދިނުމަށް ނިންމައިފިއެވެ.

މި ބަދަލާއެކު ސިވިލް ސަރވިސްގެ 8 ރޭންކެއްގައި ހިމެނޭ 11،800 މުވައްޒަފުންގެ މުސާރައަށް ބަދަލު އާދެއެވެ. މި އެލަވަންސާއެކު ސިވިލް ސަރވިސް މުވައްޒަފުންގެ ތެރެއިން މި އެލަވަންސް ލިބޭނެ ރޭންކުތަކުގައި ހިމެނޭ މުވައްޒަފުންނަށް، އެއް ރޭންކެއްގައި ކަމަށްވާނަމަ އަސާސީ މުސާރައާއި ފިކްސްޑް އެލަވަންސްތަކުގެ ޖުމްލަ އެއްގޮތްވާނެއެވެ.

ސިވިލް ސަރވިސް ކޮމިޝަންގެ ޑިރެކްޓަރ ޖެނެރަލް, އޮޑިޓް އެންޑް ޕަރފޯމަންސް މެނޭޖްމަންޓް ޑިވިޝަން، އަލްފާޟިލް ޢަބްދުﷲ ސަޢީދު ވިދާޅުވީ، އެލަވަންސް ލިބޭ މުވައްޒަފުންނަށް ލިބޭ މިންވަރު އެ މުވައްޒަފުންނަށް ޖެނުއަރީ 15ގެ ކުރިން އަންގާނެ ކަމަށެވެ. އަދި އެލަވަންސާ ގުޅިގެން އެއްވެސް ޝަކުވާއެއް އޮތްނަމަ ހުށަހެޅޭނެ ކަމަށެވެ.

އެލަވަންސް ދިނުމަށް ހަމަޖެހިފައިވަނީ ސިވިލް ސަރވިސް މުވައްޒަފުންގެ ތެރެއިން ރޭންކު އެސްއެސް 1-4 އަދި ރޭންކު ޖީއެސް 1-4ގައި މަސައްކަތް ކުރާ މުވައްޒަފުންނަށެވެ.

މުސާރައިގެ ފަރަގު ނައްތާލުމަށް ކުރާ މަސައްކަތް ވަރަށް ބާރަށް ކުރިއަށްދާ ކަމަށާއި، އަންނަ އަހަރު އެކަން ފެނިގެންދާނެ ކަމަށް ޕޭ ކޮމިޝަނުން ބުނެއެވެ.