އިނގިރޭސި ޕްރިމިއާ ލީގުގައި ހޯމަ ދުވަހުގެރޭ ނިއުކާސަލް ޔުނައިޓެޑާއި މެންޗެސްޓާ ޔުނައިޓެޑް ބައްދަލުކުރި މެޗު އެއްވަރުވެގެން ނިމިއްޖެއެވެ.

ނިއުކާސަލުގެ ދަނޑުގައި ކުޅުނު މި މެޗު އެއްވަރުވީ 1-1 ގެ ނަތީޖާއަކުންނެވެ. މި މެޗުން މޮޅުވެގެންތާވަލުގެ ފަސްވަނައަށް އެރުމުގެ ފުރުސަތު ޔުނައިޓެޑަށް އޮތް ނަމަވެސް، މެޗު އެއްވަރުވުމާއެކު މި ވަގުތު ޔުނައިޓެޑް އޮތީ ތާވަލުގެ ހަތްވަނައިގައެވެ.

އަނިޔާގެ ފަހުން ފްރާންސްގެ ޑިފެންޑަރު ރަފައެލް ވަަރާން މި މެޗުގައި ކުޅެފައިވާއިރު، މި މެޗު ފަށައިގެން ހަތްވަނަ މިނެޓުގައި ނިއުކާސަލުން ވަނީ ލަނޑު ޖަހައި ލީޑު ނަގައިފައެވެ. ވަރާނަށް ހެދުނު ގޯހެއްގެ ފައިދާ ނަގައި މި ލަނޑު އެ ޓީމަށް ކާމިޔާބުކޮށްދިނީ އެލަން ސެއިންޓް-މެކްސިމައިންއެވެ.

އޭގެ ފަހުން ލީޑު ފުޅާކުރަން ނިއުކާސަލުގެ ކަލުމް ވިލްސަން ފުރަތަމަ ހާފު ލަނޑެއް ޖެހި ނަމަވެސް، ރެފުރީ ވަނީ އެއީ އޮފްސައިޑުގައި ހުރެ އޭނާ ޖެހި ލަނޑެއް ކަމަށް ނިންމާފައެވެ.

މި މެޗުގައި ޔުނައިޓެޑުން ނަތީޖާ އެއްވަރުކޮށްފައިވަނީ މެޗުގެ 71 ވަނަ މިނެޓުއެވެ. މި ލަނޑު އެ ޓީމަށް ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި އެޑިސަން ކަވާނީއެވެ. އޭގެ ފަހުން މެޗުގައި އަލުން ލީޑު ނަގަން ނިއުކާސަލުގެ ޖޭކަބް މާފީ ފޮނުވާލި ހަމަލާއެއް ވަނީ ގޯލުގެ ދަނޑިއަށް އަމާޒުވެފައެވެ. އަދި އޭގެ ފަހުން އެ ޓީމުގެ މިގޭލް އަލްމިރޯން ފޮނުވާލި ބޯޅަ މި މެޗުގައި މޮޅު ކުޅުމެއް ދެއްކި ޔުނައިޓެޑުގެ ގޯލްކީޕަރު ޑޭވިޑް ޑެ ހެއާ ވަނީ މަތަކޮށްފައެވެ.

މި ނަތީޖާއާއެކު ތާވަލުގެ ހަތްވަނައިގައި ޔުނައިޓެޑް އޮތީ ކުޅުނު 17 މެޗުން ލިބުނު 28 ޕޮއިންޓާއެކުގައެވެ. އަދި ޔުނައިޓެޑާ އެއްވަރުކުރި ނިއުކާސަލް އޮތީ ތާވަލުގެ ފުލުން ދެވަނައިގައި 19 މެޗުން 11 ޕޮއިންޓާއެކުއެވެ.