މިހާރު ކުރިޔަށްދާ ޕްރެޒިޑެންޓްސް ކަޕުގެ ފައިނަލު މެޗު ރ. އަލިފުށީ ޓާރފް ދަނޑުގައި ކުޅެވޭތޯ ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އާއި އަލިފުށީ ކައުންސިލާ ދެމެދު މަޝްވަރާތައް ކުރިޔަށް ގެންގޮސްފިއެވެ.

އަލިފުށީ ކައުންސިލުގެ ސޯޝަލް މީޑިއާގައި އާދީއްތަ ދުވަހު ކުރި ޕޯސްޓެއްގައި ބުނީ ޕްރެޒިޑެންޓްސް ކަޕުގެ ފައިނަލް މެޗު އަލިފުށީ ޓާރފް ދަނޑުގައި ކުރިޔަށް ގެންދިޔުމަށް ކުރެވޭ މަޝްވަރާތައް އާދީއްތަ ދުވަހު ފަށާފައިވާ ކަމަށެވެ.

މި މަޝްވަރާތައް އަލިފުށީގައި ކުރިޔަށްދާއިރު، މަޝްވަރާތަކުގައި ކުޅިވަރާ ބެހޭ ވުޒާރާގެ ސްޓޭޓު މިނިސްޓަރ އަސްހަދު އަލީ (އަޑުބަރޭ)ގެ އިތުރުން އެފްއޭއެމްގެ ކޮމްޕެޓިޝަން ޑިޕާޓްމެންޓުގެ ޝާހު އިސްމާއިލް (ޝާޔާ) އާއި އިސްމާއީލް ރިޔާޒްވެސް ބައިވެރިވެވަޑައިގަންނަވައެވެ.

އެފްއޭއެމުން ބުނީ މި މަޝްވަރާތަކާއެކު އަންނަ މަހު 23 ވަނަ ދުވަހު ބާއްވާ ޕްރެޒިޑެންޓްސް ކަޕުގެ ފައިނަލް ބާއްވާނެ ތަނެއް ފައިނަލް ވެގެންދާނެ ކަމަށެވެ.

މި ފަހަރުގެ ޕްރެޒިޑެންޓްސް ކަޕުގައި ފުރަތަމަ ޑިވިޝަނުގެ 8 ކްލަބުން ކުޅޭއިރު، މުބާރާތް ކުރިޔަށްދާނީ ލީގު އުސޫލުން އެންމެ ގިނަ ޕޮއިންޓް ހޯދާ ދެ ޓީމު ފައިނަލަށް ދާ ގޮތަށެވެ.

ދެ އަހަރު ދުވަހުގެ މެދު ކެނޑުމަކަށްފަހު މިއަހަރު ޕްރެޒިޑެންޓްސް ކަޕު ކުޅޭއިރު، މި މުބާރާތުގެ އެންމެ ފަހުގެ ޗެމްޕިއަން ޓީމަކީ ނިއު ރޭޑިއަންޓެވެ.

ސަރުކާރުގެ ޚަރަދުގައި އަލިފުށީގައި އެޅި ޓާފު ދަނޑު ނިމުނުކަން ރަސްމީކޮށް އިއުލާންކޮށްފައިވަނީ މިދިޔަ އަހަރުގެ ސެޕްޓެމްބަރު މަހުގެ 16 ވަނަ ދުވަހުއެވ