އެއް އަހަރު ތެރޭ 42 ލަނޑު ޖަހައިގެން ކުރީގެ އެއްވަނަ ފޯވާޑް ގާޑް މުލާ ހަދާފައިވާ ރިކޯޑު ބަޔާން މިއުނިކަށް ކުޅެމުން އަންނަ ޕޮލެންޑުގެ ތަރި ރޮބަޓް ލެވަންޑޯސްކީ މުގުރާލައިފިއެވެ.

މުލާގެ ރިކޯޑު ލެވަންޑޯސްކީ މުގުރާލީ ޖަރުމަން ލީގުގައި ހުކުރު ދުވަހުގެރޭ ވުލްފްސްބާގް އަތުން ފަސޭހަކަމާއެކު 4-0 ގެ ނަތީޖާއަކުން އެންމެ ފަހުގެ ޗެމްޕިއަން ބަޔާން މިއުނިކް މޮޅުވި މެޗުގައެވެ.

މި މެޗު ނިމެން ތިން މިނެޓަށް ވެފައި ވަނިކޮށް ޖެހި ލަނޑާއެކު ލެވަންޑޯސްކީ މިހާރު ވަނީ މި އަހަރު ތެރޭ 43 ލަނޑު ހަމަކޮށްފައެވެ. އެއް އަހަރު ތެރޭ 42 ލަނޑު ޖަހައި މުލާ މީގެ ކުރިން ރިކޯޑު ހަދާފައިވަނީ 1972 ވަނަ އަހަރެވެ. މުލާގެ ރިކޯޑެއް ލެވަންޑޯސްކީ މުގުރާލިއިރު، މިދިޔަ ސީޒަނުގައިވެސް އޭނާ ވަނީ މުލާގެ އެހެން ރިކޯޑެއް މުގުރާލާފައެވެ. އެއީ ލީގު ސީޒަނެއްގައި 40 ލަނޑު ޖަހައިގެން 1972 ވަނަ އަހަރު މުލާ ހެދި ރިކޯޑެވެ. އެ ރިކޯޑު ލެވަންޑޯސްކީ މުގުރާލީ މިދިޔަ ސީޒަނުގައި 41 ލަނޑު ހަމަކޮށްގެންނެވެ.

ލީގުގައި ހުކުރު ދުވަހުގެރޭ އަމިއްލަ ދަނޑުގައި ކުޅުނު މެޗުގައި ބަޔާނުގެ އަނެއް ތިން ލަނޑު ކާމިޔާބުކޮށްދިނީ ތޯމަސް މުލާ އާއި، ޑަޔުޓް އުޕަމެކާނޯ އަދި ލެރޯއި ސާނޭއެވެ.

މި މޮޅާއެކު ތާވަލުގެ އެއްވަނައިގައި އޮތް ބަޔާނަށް ކުޅުނު 17 މެޗުން 43 ޕޮއިންޓް ލިބިފައިވާއިރު، ދެވަނައިގައި އޮތް ބޮރޫޝިއާ ޑޯޓްމުންޑަށް 16 މެޗުން ލިބިފައިވަނީ 34 ޕޮއިންޓެވެ. އަދި ތިންވަނައިގައި އޮތް ބަޔާ ލެވަކޫސެނަށް 16 މެޗުން 28 ޕޮއިންޓް ލިބިފައިވާއިރު، ހަތަރުވަނައިގައި އޮތް ހޮފެންހެއިމަށް 16 މެޗުން ލިބިފައިވަނީ 27 ޕޮއިންޓެވެ.