އެއް އަހަރު ތެރޭ 42 ލަނޑު ޖަހައިގެން ކުރީގެ އެއްވަނަ ފޯވާޑް ގާޑް މުލާ ހަދާފައިވާ ރިކޯޑާ ބަޔާން މިއުނިކަށް ކުޅެމުން އަންނަ ޕޮލެންޑުގެ ތަރި ރޮބަޓް ލެވަންޑޯސްކީ އެއްވަރުކޮށްފިއެވެ.

މުލާގެ ރިކޯޑާ ލެވަންޑޯސްކީ އެއްވަރުކުރީ ޖަރުމަން ލީގުގައި އަންގާރަ ދުވަހުގެރޭ ސްޓުޓްގާޓުގެ ދަނޑުގައި ފަސޭހަކަމާއެކު 5-0 ގެ ނަތީޖާއަކުން އެންމެ ފަހުގެ ޗެމްޕިއަން ބަޔާން މިއުނިކް މޮޅުވި މެޗުގައެވެ.

މި މެޗުގައި ލެވަންޑޯސްކީ ދެ ލަނޑު ޖެހިއިރު، އޭނާ މިހާރު ވަނީ މި އަހަރު ތެރޭ 42 ލަނޑު ހަމަކޮށްފައެވެ. އެއް އަހަރު ތެރޭ 42 ލަނޑު ޖަހައި މުލާ މީގެ ކުރިން ރިކޯޑު ހަދާފައިވަނީ 1972 ވަނަ އަހަރެވެ. މުލާގެ ރިކޯޑު މުގުރާލަން ލެވަންޑޯސްކީއަށް ބާކީ އެއް މެޗު އޮތްއިރު، އެ މެޗަކީ އަންނަ ހުކުރު ދުވަހުގެރޭ ލީގުގައި ވުލްފްސްބާގާ ދެކޮޅަށް ބަޔާނުން އަމިއްލަ ދަނޑުގައި ކުޅޭ މެޗެވެ. އެ މެޗަށްފަހު ފިނި މޫސުމުގެ ބްރޭކަށް ޖަރުމަން ލީގު މެދުކަނޑާލާނެއެވެ.

މުލާގެ ރިކޯޑަކާ ލެވަންޑޯސްކީ ހަމަކުރިއިރު، މިދިޔަ ސީޒަނުގައި އޭނާ ވަނީ މުލާގެ އެހެން ރިކޯޑެއް މުގުރާލާފައެވެ. އެއީ ލީގު ސީޒަނެއްގައި 40 ލަނޑު ޖަހައިގެން 1972 ވަނަ އަހަރު މުލާ ހެދި ރިކޯޑެވެ. އެ ރިކޯޑު ލެވަންޑޯސްކީ މުގުރާލީ މިދިޔަ ސީޒަނުގައި 41 ލަނޑު ހަމަކޮށްގެންނެވެ.

ލީގުގައި އަންގާރަ ދުވަހުގެރޭ ކުޅުނު މެޗުގައި ލެވަންޑޯސްކީ ދެ ލަނޑު ޖެހިއިރު، މި މެޗުގައި ބަޔާނުގެ ސާޖް ގްނަބްރީ ވަނީ ހެޓްރިކެއް ހަދާފައެވެ.

މި މޮޅާއެކު ތާވަލުގެ އެއްވަނައިގައި އޮތް ބަޔާނަށް ކުޅުނު 16 މެޗުން 40 ޕޮއިންޓް ލިބިފައިވާއިރު، ދެވަނައިގައި އޮތް ބޮރޫޝިއާ ޑޯޓްމުންޑަށް 15 މެޗުން ލިބިފައިވަނީ 31 ޕޮއިންޓެވެ. އަދި ތިންވަނައިގައި އޮތް ބަޔާ ލެވަކޫސެނަށް 15 މެޗުން 27 ޕޮއިންޓް ލިބިފައިވާއިރު، ހަތަރުވަނައިގައި އޮތް ހޮފެންހެއިމަށް 15 މެޗުން ލިބިފައިވަނީ 26 ޕޮއިންޓެވެ.