ކުރީގެ ރައީސް އަބްދުﷲ ޔާމީނު ތަސްދީޤު ކުރެއްވި މަނީ ލޯންޑަރިންގ ޤާނޫނު ޔާމީނަށް އޮޅިވަޑައިގެންފިއެވެ.

ޤާނޫނު ނަންބަރު 10/2014 މަނީ ލޯންޑަރިންގ އަދި ޓެރަރިޒަމަށް ފައިނޭންސް ކުރުން ހުއްޓުވުމުގެ ޤާނޫނަކީ 2014 ވަނަ އަހަރު އޭރުގެ ރައީސުލްޖުމްހޫރިއްޔާ ޔާމީނު އަބްދުލްޤައްޔޫމު ތަސްދީޤު ކުރެއްވި ޤާނޫނެކެވެ. އެ އަހަރުގެ އޭޕްރީލް މަހުގެ ފުރަތަމަ ދުވަހު މަޖިލީހުން އެ ބިލު ފާސް ކުރުމާއެކު، އޭޕްރީލް 13 ވަނަ ދުވަހު ރައީސް ޔާމީނު ވަނީ ބިލު ތަސްދީޤު ކުރައްވާފައެވެ. އެހެންނަމަވެސް، 2018 ވަނަ އަހަރު އެ ޤާނޫނު ވުޖޫދުގައި ނެތްކަމަށް ރައީސް ޔާމީނު ވަނީ ވިދާޅުވެފައެވެ.

ހުކުރު ދުވަހުގެރޭ އިދިކޮޅުން ބޭއްވި "ކޮތަރުކޮށި" ޖަލްސާގައި ރައީސް ޔާމީނު ވިދާޅުވީ، "ސުޕްރީމްކޯޓުގެ ފުރާޅުން ޓިނު ނަގަން ޖެހުނު ގޮތް" ރައްޔިތުންނަށް ސާފުކޮށްދެއްވަން ބޭނުންފުޅުވާ ކަމަށެވެ. އެގޮތުން 1 ފެބްރުއަރީގެ އަމުރު ނެރުމަކީ ޖުޑިޝަރީގެ ތެރެއިން ހިންގި ޝާހީ ބަޣާވާތެއްކަމަށް ރައީސް ޔާމީނު ވަނީ ސިފަ ކުރައްވާފައެވެ. ރައީސް ޔާމީނު ވިދާޅުވީ، ސުޕްރީމްކޯޓުގެ ޓިނު ނަގަން ޖެހުނީ އޭރު ކުއްލި ނުރައްކަލުގެ ޙާލަތުން މެނުވީ ޤާނޫނުތައް ސަސްޕެންޑު ނުކުރެވޭނެތީ ކަމަށެވެ. އެގޮތުން އޭރު ފަނޑިޔާރު އަބްދުﷲ ސައީދާއި އަލީ ޙަމީދުގެ ކޮރަޕްޝަން މައްސަލަތަކެއް ފެންމަތިވެގެން ދިޔަކަން ފާހަގަ ކުރައްވައި ރައީސް ޔާމީނު ވިދާޅުވީ، އެބޭފުޅުންނަށް އޭރު ފައިސާ ލިބިފައިވަނީ ކިހިނެއްކަންވެސް ސާފު ކުރެއްވި ކަމަށެވެ. އަދި ކޮރަޕްޝަން މައްސަލަތައް ބެލުން ލާޒިމުވެގެން ދިޔަ ކަމަށާއި، އޭރު މަނީ ލޯންޑަރިން ޤާނޫނެއް އޮތްނަމަ، އެ ޙާލަތު ރަނގަޅަށް ފެތޭނެކަމަށް ރައީސް ޔާމީނު ވިދާޅުވިއެވެ.

ސުޕްރީމްކޯޓުގެ ބެންޗުން ފާސްކޮށްގެން މެނުވީ އެއްވެސް ފަނޑިޔާރަކު ތަހުގީގީ އިދާރާއަކަށް ހާޒިރު ނުކުރެވޭނެކަމަށް އޭރު ފާސްކުރިކަން ފާހަގަ ކުރައްވައި ޔާމީނު ވިދާޅުވީ، އެއީ ސީދާ ޖޭއެސްސީގެ މަސައްކަތްތަކަށް ހުރަސްއެޅުން ކަމަށެވެ. ވީއިރު މި ކަންކަން ބެލުން އޭރު ލާޒިމުވެގެން ދިޔަ ކަމަށާއި، އެ މާއްދާ އުވާލުމަށްޓަކައި ކުއްލި ނުރައްކަލުގެ ޙާލަތު އިއުލާނު ކުރުމަށް މަޖުބޫރުވީކަމަށް ރައީސް ޔާމީނު ވިދާޅުވިއެވެ.

01 ފެބްރުއަރީގެ ކޯޓު އަމުރަކީ ކަނޑައެޅިގެން ޤާނޫނީ ގޮތުން އުފެދިފައި އޮތް ސަރުކާރެއް ވައްޓާލާ، ރައީސް ޔާމީންގެ ވެރިކަން ނިމުމަކަށް ގެނައުމަށް ބަޔަކު ރާވައިގެން ކުރަން އުޅުނު ބަޣާވާތެއްކަމަށް އިދިކޮޅުން ސިފަ ކުރެއެވެ.

އޭގެ އިތުރުންވެސް ރައީސް ޔާމީނު މިފަހުން ޖަލްސާތަކުގައި ދައްކަވާ ވާހަކަތަކަށް ގިނަ ބަޔަކު ދަނީ ފާޑުކިޔަމުންނެވެ. އެގޮތުން އެމަނިކުފާނުގެ ވެރިކަމުގައި ނޫސްވެރިންނަށް ބޭނުން އެއްޗެއް ލިޔެ އުޅުމުގެ ފުރުސަތު އޮތް ކަމަށާއި، އިދިކޮޅު ފަރާތްތަކަށްވެސް ކޮންމެ ތަނަކަށްވެސް އެއްވެ އުޅުމުގެ މިނިވަންކަން އޭރު ލިއްބައިދީފައިވާނެކަމަށް ރައީސް ޔާމީނު ވިދާޅުވެފައިވެއެވެ. އެހެންނަމަވެސް، އެއީ ކަނޑައެޅިގެން ހަގީގަތާ ޚިލާފު ވާހަކަތަކެއް ކަމަށްބުނެ، އިތުރުފުޅު ނުހެއްދެވުމަށް ރައީސް ޔާމީނަށް އެތައް ބަޔަކު ގެންދަނީ ގޮވާލަމުންނެވެ.