ދިވެހީންގެ ލޭނާރު ކަމުގައިވާ މަސްވެރިކަމުގެ ދާއިރާގައި މަސައްކަތްކުރާ ފަރާތްތަކުގެ އަގުވަޒަންކޮށް މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރުން އެ ފަރާތްތަކަށް އިނާމު ދީފިއެވެ.

ރާއްޖޭގައި ފާހަގަކުރާ 41 ވަނަ މަސްވެރިންގެ ދުވަހުގެ ރަސްމީ ޖަލްސާގައި މި ފަރާތްތަކަށް އިނާމު ހަވާލުކޮށްދެއްވީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހެވެ.

މި ޖަލްސާގައި އިނާމާއި ހަނދާނީފިލާ އަރުވާފައި ވަނީ މަސްވެރިކަމުގެ ދާއިރާގައި އެކި ގޮތްގޮތުން ޚިދުމަތް ކޮށްދީފައިވާ ފަރާތްތަކަށާއި، މަސްވެރިކަމުގެ ސިނާއަތާއި މަސްވެރިކަމާ ގުޅުންހުރި ކަންކަމުގައި ފާހަގަކޮށްލެވޭ ނަތީޖާތައް ހޯދާފައިވާ ފަރާތްތަކަށެވެ.

އެގޮތުން ކ.އަތޮޅުގެ އެންމެ ތަޖުރިބާކާރު ކެޔޮޅާއި، އެންމެ ޒުވާން ކެޔޮޅާއި، މަސްވެރިކަމުގެ ދާއިރާއިން ދިރާސާ ކުރުމުގެ ރޮނގުން ރާއްޖޭގެ މަސްވެރިކަމަށް ހިދުމަތް ކޮށްފައިވާ ފަރާތްތަކުގެ އިތުރުން ޒުވާނުން މަސްވެރިކަމަށް އަހުލުވެރިކުރުވުމަށް ގިނަ މަސައްކަތްތަކެއް ކޮށްފައިވާ ފަރާތްތަކަށް މި ޖަލްސާގައި އިނާމާއި ހަނދާނީފިލާ އަރުވާފައިވެއެވެ.

މިދިޔަ އަހަރު އެންމެ ގިނަ އަދަދަކަށް ކަޅުބިލަމަސް ކިރި ދޯންޏަކަށް ހޮވިފައިވަނީ ގދ.މަޑަވެލީ ކަމަނަ ދޯންޏެވެ. އަދި މަޑަވެލީގެ ޓީއެސްލައިނުން ދެވަނަ ހާސިލްކުރިއިރު، ތިން ވަނައަށް އެންމެ ގިނަ އަދަދަކަށް ކަޅުބިލަމަސް ކިރާފައި ވަނީ ގއ.ނިލަންދޫގެ ހަނދުވަރީ ދޯންޏެވެ.

އަދި އެންމެ ގިނަ އަދަދަކަށް ބޮޑު ކަންނެލި ކިރި ދޯންޏަކަށް ދ.މީދޫ އަލަމާ 6 ހޮވުނުއިރު، ދެވަނައަށް އެންމެ ގިނަ އަދަދަކަށް ބޮޑު ކަންނެލި ކިރާފައިވަނީ ބ.ތުޅާދޫ ހައިޝަމް ދޯންޏެވެ. ތިންވަނައަށް އެންމެ ގިނަ އަދަދަކަށް ބޮޑު ކަންނެލި ކިރީ އދ. މަހިބަދޫ އަސުރުމާ 3 އެވެ.

ހަމައެހެންމެ މަސްވެރިކަން ހިންގާ ބެލެހެއްޓުމުގައި ނަމޫނާ ދޯންޏެއްގެ ގޮތުގައި ފާހަގަ ކުރެވިފައި ވާތީ ގއ. މާމެންދޫ ހުޝިޔާރު ދޯންޏަށް ވަނީ އެކަން އަގުވަޒަންކޮށް ހަނދާނީ ފިލާއެއް އަރުވާފައެވެ.

މިދިޔަ އަހަރުގެ ތެރޭގައި މަހާއި މަހުގެ ބާވަތްތައް ރޯމެޓީރިއަލްގެ ގޮތުގައި ބޭރުކުރުން ފިޔަވައި، އަގު އެއްކޮށްގެން އެންމެ މަތީ އާމްދަނީ ހޯދާފައިވަނީ ހޮރައިޒަން ފިޝަރީޒުންނެވެ. އަދި އެންމެ ގިނަ އަދަދަކަށް ކަޅުބިލަމަސް ގަނެފައި ވާތީ މިފްކޯއަށްވެސް ވަނީ ހަނދާނީ ފިލައެއް އަރުވާފައެވެ.

މިދިޔަ އަހަރުގެ ތެރޭގައި އެންމެ ގިނަ އަދަދަކަށް ބޮޑު ކަންނެލި ގަނެފައި ވަނީ އެންސިސް ފިޝަރީޒް ޕްރައިވެޓް ލިމިޓެޑުންނެވެ. އަދި އެންމެ ގިނަ އަދަދަކަށް ފާނައާއި ފަރުމަސް ގަނެފައި ވަނީ ސީ ޕާޓްނާސް މޯލްޑިވްސް ޕްރައިވެޓް ލިމިޓެޑުންނެވެ.

މި ޖަލްސާގައި ވަނީ 2020 ވަނަ އަހަރު އޯލެވެލުން މެރިން ސައިންސް މާއްދާއިން އެންމެ މަތީ ވަނަތައް ހޯދި ސްކޫލުތަކަށް ވެސް އިނާމު ދީފައެވެ. އެގޮތުން އެއްވަަނަ ހޯދާފައިވާ ޖަމާލުއްދީން ސްކޫލާއި، ދެވަނަ ހާސިލުކުރި ޣިޔާސުއްދީން ސްކޫލާއި ތިން ވަނަ ކާމިޔާބުކުރި އަމީނިއްޔާ ސްކޫލަށް މި ޖަލްސާގައި އިނާމު ދިނެވެ.