ދިވެހި އާޓިސްޓުންނަށް ފުރުސަތު އެބައޮތް ކަމަށާއި، މަސައްކަތްތައް ހުއްޓާނުލުމަށް މޯލްޑިވިއަން އާޓިސްޓް ކޮމިއުނިޓީ (މެކް)އިން އިލްތިމާސްކޮށްފިއެވެ.
އާދިއްތަ ދުވަހުގެ ހަވީރު "އަންވެއިލިންގ ވިޝަންސް 2021" ހުޅުވުމުގެ ރަސްމިއްޔާތުގައި މެކްގެ ފަރާތުން ވާހަކަދައްކަވަމުން އަލީ އާމިރު ވިދާޅުވީ، އެއްއަހަރުން އަނެއް އަހަރަށް ފަންނުވެރިކަން ކުރިއަރަމުންދާ ކަމަށާއި، އެކަން އަންވެއިލިންގ ވިޝަންސްގެ މައުރަޒުން ވެސް ފެނިގެންދާ ކަމަށެވެ. އޭނާ ވިދާޅުވީ އާޓިސްޓުން މިހާރަށްވުރެ މާ ބޮޑަށް މަސައްކަތް ކުރަން ޖެހޭ ކަމަށާއި، ފަހި ފުރުސަތުތައް އެބައޮތް ކަމަށެވެ.
އާޓް މާކެޓް އޮބައޮތްކަން ފާހަގަކުރައްވައި އާމިރު ވިދާޅުވީ، ކުރިއަށްދާން ބޭނުންވާ ޒުވާނުންނަށް މަގު ފެންނާނެ ކަމަށެވެ.
ކޮންމެ ދުވަހަކީ ވެސް މަސައްކަތުގައި އުޅޭ ދުވަހަކަށް ހަދާށޭ. ގައުމެއްގެ އެންމެ މުހިންމު ރައުސުލްމާލަކީ އަދި ގައުމެއްގެ އެންމެ ބޮޑު އިންޑަސްޓްރީއަކީ އެގައުމެއްގެ އުފެއްދުންތެރިކަން. ކޮންމެ ދާއިރާއަކުން ޒުވާން އުފެއްދުންތެރިކަން ގައުމު ކުރިއެރުވުމަށް ބޭނުންވޭ. އަޅުގަނޑުމެންގެ މުއްސަނދި ސަގާފަތް ދިރުވަން ޖެހޭ. ކުރިއަށް އޮތްތަނުގައި ވަރަށް ޒިންމާދާރު އާޓިސްޓުންތަކެއް އުފެދިގެން ދިއުން އުންމިދަކީ.އަލީ އާމިރު
މެކްއިން ބުނީ ރާއްޖޭގެ މުއްސަނދި ސަގާފަތާއި ތަރިކަ ކުރިއަރުވަން ޖެހޭ ކަމަށާއި، ކާބަފައިންގެ ޒަމާނުއްސުރެ އެމަސައްކަތް ކޮށްފައިވާ ކަމަށެވެ. އަދި ގައުމަށް އަގުހުރި މަސައްކަތްތައް ކޮށްދެއްވެއްވާފައިވާ ފަންނުންވެރި ބޭފުޅުންގެ އިރުޝާދު ހޯދައި އެބޭފުޅުންނާ ގުޅިގެން އެކުވެރިކަމާއެކު މަސައްކަތް ކުރުމަށް ވަނީ އިލްތިމާސްކޮށްފައެވެ.
