"އަންވެއިލިންގ ވިޝަންސް 2021" ހުޅުވުމުގެ ރަސްމިއްޔާތުގައި ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ބައިވެރިވެވަޑައިގެންފިއެވެ.

މި މައުރަޒު ކުރިއަށް ދާނީ އާދިއްތަ ދުވަހުން ފެށިގެން މި މަހުގެ 14 ވަނަ ދުވަހުގެ ނިޔަލަށެވެ. މި މައުރަޒަށް ރައީސް ކުރެއްވި ޒިޔާރަތުގައި މައުރަޒުގައި ދައްކާލުމަށް ބަހައްޓާފައިވާ ކުރެހުންތައް ބައްލަވާލެއްވިއެވެ. އަދި އެމަނިކުފާނު ވަނީ 'މޯސްޓް ވައިބްރަންޓް އާޓިސްޓްސް"އަށް ހޮވުނު 5 ކުރެހުންތެރިންނަށް އިނާމު ހަވާލުކޮށްދެއްވާފައެވެ.

މީގެ އިތުރުން މި ހަފްލާގައި މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ޔުމްނާ މައުމޫނު ވަނީ ނެޝަނަލް އާރޓް ގެލެރީގެ 'ވަރޗުއަލް ގެލެރީ' އިފްތިތާހުކޮށްދެއްވާފައެވެ.

މޯލްޑިވްސް ކޮންޓެމްޕޮރަރީ އާޓް އެގްޒިބިޝަން "އަންވެއިލިންގ ވިޝަންސް 2021"އަކީ މި އަހަރު ރާއްޖޭގައި ބާއްވާ އެންމެ ބޮޑު މައުރަޒެވެ. މި މައުރަޒުގައި މިފަހަރު 67 ކުރެހުންތެރިންގެ ކުރެހުންތައް ދައްކުވައިދެއެވެ. މި ފަހަރުގެ މައުރަޒުގެ އަމާޒަކީ ރާއްޖޭގެ އެކި ކަންކޮޅުތަކުން ހުނަރުވެރި ފަންނާނުން އެއްތަނަކުން ބައްދަލުވެ، އެމީހުންގެ ހުނަރު ދައްކާލައި، އެމީހުންގެ ތަސައްވުރުގެ ތަންކޮޅެއް ހާމަކުރުމެވެ.

މި ހަފްލާގައި މޯލްޑިވިއަން އާޓިސްޓް ކޮމިއުނިޓީގެ ފަރާތުން ވަނީ ރައީސުލްޖުމްހޫރިއްޔާއަށް ކުރެހުމެއް ވެދުމަށް އަރުވާފައެވެ.

މިއަހަރުގެ މައުރަޒަށް ވެސް ގިނަ ބައެއް ތަހުރީބު ލިބިގެންދާނެ ކަމަށް އާޓިސްޓު ކޮމިއުނިޓީން ބުނެއެވެ. ކުރެހުންތަކުގެ އަގު ހުރީ 2،000-20،000 ރުފިޔާއާ ދެމެދުގަ އެވެ.

"އަންވެއިލިންގ ވިޝަން" އާރޓް އެގްޒިބިޝަނަކީ މޯލްޑިވްސް އާރޓިސްޓް ކޮމިއުނިޓީން 2016 ވަނަ އަހަރުން ފެށިގެން ބާއްވަމުން އަންނަ ކޮންޓެމްޕަރަރީ އާރޓް އެގްޒިބިޝަނެކެވެ. މިއަހަރުގެ މައުރަޒުން ވެސް އަލަށް ނުކުންނަ އާރޓިސްޓުންނަށް އެ މީހުންގެ މަސައްކަތްތައް ދައްކާލައި އިތުރު ފުރުސަތުތައް ލިބިގެންދާނެއެވެ.