ޔުއެފާ ޗެމްޕިއަންސް ލީގުގައި އަންގާރަ ދުވަހުގެރޭ ޔުވެންޓަސްއާ ދެކޮޅަށް ކުޅުނު މެޗުގައި ޗެލްސީގެ ޑިފެންޑަރު ބެން ޗިލްވެލަށް ލިބުނު އަނިޔާ ސީރިއަސް ކަމަށް ރިޕޯޓުތައް ބުނެފިއެވެ.

ޔުވެންޓަސް އަތުން ޗެލްސީ މޮޅުވީ 4-0 ގެ ނަތީޖާއަކުންނެވެ. މި މެޗުގައި ޗިލްވެލަށް އަނިޔާވީ ޔުވެންޓަސްގެ އޭޑްރިއަން ރަބިއޯ އަތުން ބޯޅަ ހޯދަން އުޅުމުގެ ތެރެއިންނެވެ.

އެއާއެކު ޗިލްވެލްގެ ކަކުލަށް ލިބުނު އަނިޔާއާ ގުޅިގެން ބުދަ ދުވަހު ޓެސްޓުތައް ހެދިއިރު، ރިޕޯޓުތައް ބުނާ ގޮތުން އަނިޔާވެފައިވަނީ ޗިލްވެލްގެ އެންޓީރިއާ ކުރޫސިއެޓް ލިގަމެންޓް (އޭސީއެލް) އަށެވެ. އެފަދަ އަނިޔާއަކުން ސަލާމަތްވެ ކުޅުމުގެ ތެރެއަށް އައުމަށް އާންމުކޮށް ގާތްގަނޑަކަށް 7-5 މަސް ދުވަސް ނަގައެވެ. އެހެންކަމުން މި ސީޒަނުގައި ޗިލްވެަށް ދެން ނުކުޅެވުމުގެ ފުރުސަތު ބޮޑު ކަމަށް ރިޕޯޓުތައް ބުނެއެވެ.

ޗިލްވެލްގެ އަނިޔާއާ ގުޅިގެން ޗެލްސީގެ ކޯޗު ތޯމަސް ޓުޗެލް ވަނީ ކަންބޮޑުވުން ފާޅުކޮށްފައެވެ. ޔުވެންޓަސް މެޗަށްފަހު ވާހަކަ ދައްކަމުން ޓުޗެލް ބުނީ ޗިލްވެލްއަށް އަނިޔާވުން އެއީ ޓީމަށް ލިބުނު ބޮޑު ގެއްލުމެއް ކަމަށެވެ.

އިނގިރޭސި ކުލަބު ލެސް ސިޓީ ދޫކޮށް 45 މިލިޔަން ޕައުންޑުގެ ޓްރާންފާ ފީއަކަށް ޗިލްވެލް ޗެލްސީއަށް ބަދަލުވީ މިދިޔަ އަހަރުއެވެ. އޭގެ ފަހުން ޗެލްސީގައި ޗިލްވެލް މޮޅު ކުޅުމެއް ދައްކާފައިވާއިރު، އޭނާ ވަނީ މި ސީޒަނުގައި މިހާތަނަށް ޗެލްސީއަށް 12 މެޗު ކުޅެދީފައެވެ. އަދި ވަނީ މި މެޗުތަކުގައި އެ ޓީމަށް ތިން ލަނޑު ޖަހައިދީފައެވެ.