ޗެރިޓީ ޝީލްޑް މެޗުން ކުރިއަށް އޮތް ރާއްޖޭގެ ފުޓްބޯޅަ ސީޒަން ފަށާ ގޮތަށް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ބަދަލުގެނެސްފިއެވެ.

މީގެ ކުރިން މިދިޔަ އޮކްޓޯބަރު މަހު އެފްއޭއެމުން އިއުލާންކުރި ކަލަންޑަރުގައިވާ ގޮތުން އަންނަ ޑިސެމްބަރު މަހުގެ 15 ވަނަ ދުވަހު ފުޓްބޯޅަ ސީޒަން ފެށުމަށް ހަމަޖެހިފައި އޮތީ ޕްރެޒިޑެންޓްސް ކަޕުންނެވެ. އަދި އެއަށްފަހު ޗެރިޓީ ޝީލްޑް މެޗު ކުޅެން ތާވަލުކުރީ އަންނަ އަހަރުގެ ފެބްރުއަރީ 12 ވަނަ ދުވަހެވެ. އާންމު ގޮތެއްގައި ރާއްޖޭގެ ފުޓްބޯޅަ ސީޒަން ފަށަނީ ޗެރިޓީ ޝީލްޑް މެޗުންނެވެ. އަދި ޕްރެޒިޑެންޓްސް ކަޕަކީ ސީޒަން ނިންމަން ކުޅޭ މުބާރާތެކެވެ. 

އެއާއެކު ހޯމަ ދުވަހު އެފްއޭއެމުން ނެރުނު އައު ކަލަންޑަރުގައިވާ ގޮތުން ފުޓްބޯޅަ ސީޒަން ފަށާނީ އަންނަ މަހުގެ 15 ވަނަ ދުވަހު ޗެރިޓީ ޝީލްޑް މެޗުންނެވެ. އެ މެޗުގައި ބައްދަލުކުރާނީ މިދިޔަ ސީޒަނުގެ ލީގު ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނާއި ރަނަރަޕް ކުލަބު ވެލެންސިއާއެވެ.

ކުރިއަށް އޮތް ސީޒަނުގެ ޗެރިޓީ ޝީލްޑް މެޗު އަންނަ މަހު ކުޅޭއިރު، މިދިޔަ ސީޒަނުގެ ޗެރިޓީ ޝީލްޑް މެޗުވެސް ކުޅެފައިވަނީ މިދިޔަ އަހަރުގެ ޑިސެމްބަރު މަހުގެ ތެރޭގައެވެ. އެ މެޗުން ކުލަބު އީގަލްސް ވަނީ މާޒިޔާ ބަލިކޮށް މުޅިން އަލަށް ޗެރިޓީ ޝީލްޑް އުފުލާލާފައެވެ.

އެފްއޭއެމުން ނެރުނު އައު ކަލަންޑަރުގައިވާ ގޮތުން މީގެ ކުރިން ބާއްވަމުން އައި ޕްރެޒިޑެންޓްސް ކަޕް މިހާރު ވަނީ ޕްރެޒިޑެންޓްސް ލީގަށް ބަދަލުކޮށްފައެވެ. އަދި އެ ލީގު ފެށުމަށް މިހާރު ތާވަލުކޮށްފައިވަނީ އަންނަ މަހުގެ 19 ވަނަ ދުވަހެވެ. މި ފަހަރުގެ މުބާރާތް ރާވާފައިވާ ގޮތުން ދިވެހި ޕްރެޒިޑެންޓްސް ލީގުގައި ޕްރިމިއާ ލީގުގައި އަށް ޓީމުގެ މެދުގައި ލީގު ބުރެއް ކުޅޭއިރު، މުބާރާތުގެ ފައިނަލުުގައި ކުޅޭނީ ލީގު ބުރުގެ އެންމެ މޮޅު ދެ ޓީމެވެ. އެންމެ ފަހުން ޕްރެޒިޑެންޓްސް ކަޕުގައި އަށް ޓީމު ހިމެނޭ ގޮތަށް ކުޅުނީ 2015 ވަނަ އަހަރެވެ.

މި އަހަރު ޕްރެޒިޑެންޓްސް ކަޕް ބާއްވާއިރު، މި މުބާރާތް އެންމެ ފަހުން ބާއްވާފައިވަނީ 2017 ވަނަ އަހަރެވެ. އޭގެ ފަހުން ފާއިތުވި ތިން ސީޒަނުގައިވެސް އެކި ސަބަބުތަކާ ހުރެ ޕްރެޒިޑެންޓްސް ކަޕް ބާއްވާފައެއް ނުވެއެވެ.

އަންނަ ޖެނުއަރީ މަހުގެ 23 ވަނަ ދުވަހު ޕްރެޒިޑެންޓްސް ލީގު ނިމޭއިރު، ހޯމަ ދުވަހު އިއުލާނުކުރި ކަލަންޑަރުގައިވާ ގޮތުން ދިވެހި ޕްރިމިއާ ލީގު ފަށަން އެފްއޭއެމުން މިހާރު ނިންމާފައިވަނީ އަންނަ އަހަރުގެ ފެބްރުއަރީ މަހުގެ ފަސްވަނަ ދުވަހެވެ. މީގެ ކުރިން ލީގު ފެށުމަށް ތާވަލުކޮށްފައި އޮތީ ފެބްރުއަރީ މަހުގެ 12 ވަނަ ދުވަހެވެ.

މިދިޔަ ސީޒަނުގެ ލީގުގައިވެސް ކުޅުނު އަށް ޓީމާއެކު ކުރިއަށް އޮތް ސީޒަނުގެ ދިވެހި ޕްރިމިއާ ލީގު ކުރިއަށްދާއިރު، މި ފަހަރުގެ ލީގުގައިވެސް ތިން ބުރު ކުޅުމަށް ވަނީ ނިންމާފައެވެ. ނިމިދިޔަ ސީޒަނުގައިވެސް ލީގުގައި ތިން ބުރެއް ކުޅެން އެންމެ ފުރަތަމަ ނިންމި ނަމަވެސް، އެ ފަހަރު ދެވަނަ ބުރާ ހަމައިން ލީގު ވަނީ ނިންމާލާފައެވެ. 

މިދިޔަ ސީޒަނުގެ ލީގުގައިވެސް ކުޅުނު އަށް ޓީމު ކުރިއަށް އޮތް ސީޒަނުގެ ދިވެހި ޕްރިމިއާ ލީގުގައި ވާދަކުރާއިރު، މި ފަހަރު އެއްވެސް ޓީމެއް ރެލިގޭޓުވެފައި ނުވަނީ މިދިޔަ ސީޒަނުގައި ދެވަނަ ޑިވިޝަން ބާއްވާފައި ނުވާތީއެވެ.

އެކަމަކު މި ސީޒަނުގައި ދެވަނަ ޑިވިޝަން އަނެއްކާވެސް ބާއްވާއިރު، އެފްއޭއެމުން ނެރެފައިވާ ކަލަންޑަރުގައިވާ ގޮތުން އެ މުބާރާތް ކުރިއަށްދާނީ އަންނަ އަހަރު ޖޫން މަހުގެ 24 ވަނަ ދުވަހުން ފެށިގެން ޖުލައި މަހުގެ 23 ވަނަ ދުވަހުގެ ނިޔަލަށެވެ. އަދި ޖޫން މަހު އެއްވަނަ ދުވަހު އެފްއޭ ކަޕް ފަށާއިރު، ދިވެހި ޕްރިމިއާ ލީގުގެ ކޮލިފިކޭޝަން މެޗުތައް ކުޅުމަށް ތާވަލުކޮށްފައި ވަނީ ޖުލައި މަހުގެ 27، 31 އަދި އޮގަސްޓް މަހުގެ ހަތަރުވަނަ ދުވަހު ކުޅޭ ގޮތަށެވެ.