ބާސެލޯނާގެ އައު ކޯޗު ޒަވީ ހެނާންޑޭޒް ބޭނުންވާތީ އެ ޓީމަށް މީގެ ކުރިން ކުޅުނު ބްރެޒިލުގެ ތަޖުރިބާކާރު ޑިފެންޑަރު ޑެނީ އަލްވޭސް އަލުން އެނބުރި އެ ޓީމާ ގުޅިއްޖެއެވެ.
ދާދި ފަހުން ބާސާއިން ވަނީ އެ ޓީމުގެ ކޯޗުގެ މަގާމުން ރޮނާލްޑް ކޫމަން ވަކިކޮށް، އައު ކޯޗުގެ މަގާމަށް އެ ޓީމުގެ ލެޖެންޑް ޒަވީ ހަމަޖައްސާފައެވެ. އުމުރުން މިހާރު 41 އަހަރުގެ ޒަވީ އާއި އުމުރުން 38 އަހަރުގެ އަލްވޭސް އަކީ މީގެ ކުރިން އެކުގައި ބާސާއަށް ކުޅުނު ދެ ކުޅުންތެރިންނެވެ. އެގޮތުން އަލްވޭސް ވަނީ 2008 އިން 2016 އަށް ބާސާއަށް ކުޅެފައެވެ.
ހިލޭ ޓްރާންސްފާއެއްގެ ދަށުން އަލްވޭސް ބާސާއާ ގުޅުނުއިރު، ބްރެޒިލުގެ ސައޮ ޕައޮލޯގެ އެއްބަސްވުން ފުރިހަމަކުރުމަށްފަހު އަލްވޭސް މީގެ ކުރިން ހުރީ އެއްވެސް ކުލަބަކާ ނުގުޅިއެވެ. ހުކުރު ދުވަހުގެރޭ ބާސާއިން އަލްވޭސް އެ ޓީމާ އަލުން ގުޅުނުކަން އިއުލާންކުރިއިރު، އެ ކުލަބުން ނެރިފައިވާ ބަޔާނުގައިވާ ގޮތުން އަލްވޭސްއަށް ބާސާއަށް ރަސްމީ މެޗެއް ކުޅެވޭނީ އަންނަ އަހަރުގެ ޖެނުއަރީ މަހުގައެވެ. އެކަމަކު އަންނަ ހަފުތާއިން ފެށިގެން އޭނާ ބާސާގެ ފަރިތަކުރުންތަކަށް ނުކުންނާނެ ކަމަށް މި ބަޔާނުގައި ވަނީ ބުނެފައެވެ.
ރިޕޯޓުތައް ބުނާ ގޮތުން ބާސާއިން އަލަވޭސްގެ ސޮއި ހޯދީ އައު ކޯޗުގެ ޒަވީގެ އެދުމުގެ މަތިންނެވެ. އެގޮތުން އަލްވޭސް ގެންނަން ޒަވީ ބޭނުންވާ އެންމެ ބޮޑު ސަބަބަކީ އެ ކުލަބުގެ އެންމެ ކާމިޔާބު ދުވަސްވަރު ޓީމަށް ކުޅުނު ކުޅުންތެރިއަކު އަލުން ގެނެސް، މިހާރު އޮތް ޒުވާން ސްކޮޑަށް ނަމޫނާ ދައްކާނެ ލީޑަރެއް ހޯދުމުގެ ބޭނުމުގައި ކަމަށްވެސް ރިޕޯޓުތައް ބުނެއެވެ.
އަލްވޭސް އަލުން ބާސާއާ ގުޅުނުއިރު، މި އަހަރުގެ އޯގަސްޓް މަހު ޖަޕާނުގެ ވެރިރަށް ޓޯކިއޯގައޮ ބޭއްވި އޮލިމްޕިކް ގޭމްސްގެ ފުޓްބޯޅަ މުބާރާތުގައި އަލްވޭސް ވަނީ ބްރެޒިލުގެ ޒުވާން ޓީމު ގޮވައިގެން ނުކުމެ، އޮލިމްޕިކްސްގެ ރަން މެޑަލް ދިފާއުކޮށްފައެވެ.
އަލްވޭސް އެންމެ ފުރަތަމަ ބާސާއާ ގުޅުނީ ސެވިއްޔާ ދޫކޮށް 2008 ވަނަ އަހަރުގެ ޖުލައި މަހު 23 މިލިޔަން ޕައުންޑުގެ ފީއަކަށެވެ. އެއަށްފަހު 2016 ވަނަ އަހަރު އަލްވޭސް ބާސާ ދޫކޮށް ޔުވެންޓަސްއަށް ބަދަލުވީ ހިލޭ ޓްރާންސްފާއެއްގެ ދަށުންނެވެ. އަލްވޭސް ބާސާއާއެކު 23 ތަށި ހޯދާފައިވާއިރު އޭގެ ތެރޭގައި ސްޕެނިޝް ލީގު ހަ ފަހަރު، ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕް އަދި ފީފާ ކުލަބު ވޯލްޑް ކަޕް ތިން ފަހަރު ކާމިޔާބުކުރުން ހިމެނެއެވެ. އަދި އަލްވޭސް ވަނީ މީގެ ކުރިން ބާސާއަށް ކުޅެދިން 391 މެޗުގައި 21 ލަނޑު ޖަހާފައެވެ.
