އަންނަ އަހަރުގެ ބަޖެޓުގައި ނެތިގެން އުޅެނީ ކަޅު ކޮތަޅަށް އަޅައިގެން މުލިއާގެއަށް ވައްދާ ފައިސާ ކަމަށް ވިދާޅުވެ، އައްޑޫ މީދޫ ދާއިރާގެ މެމްބަރު ރޮޒޭނާ އާދަމް، އިދިކޮޅު މެމްބަރުންނަށް ހޫނު ރައްދެއް ދެއްވައިފިއެވެ.
ރައްޔިތުންގެ މަޖިލީހުގައި މިހާރު ކުރިއަށްދާ ބަޖެޓް ބަހުސްގައި އިދިކޮޅު މެމްބަރުން ގެންދަވަނީ, އަންނަ އަހަރަށް ލަފާކޮށް ދައުލަތުން ހުށަހެޅި ބަޖެޓަށް ވަރަށް ބޮޑަށް ފާޑުވިދާޅުވަމުންނެވެ. އެގޮތުން ރައްޔިތުންނަށް ބޭނުންވާ މުހިއްމު ކަންކަން ބަޖެޓްގައި ހިމަނާފައި ނުވާކަމަށާއި، ބަޖެޓްގެ ދަރަނި ބޮޑުކަމަށް ވިދާޅުވެއެވެ. ލޯނު ނަގައިގެން ސަރުކާރުން ރައްޔިތުންނަށް ފައިދާވާ ކަމެއް ނުކުރާ ކަމަށް އިދިކޮޅު މެމްބަރުން ގެންދަވަނީ ތަކުރާރުކޮށް ވިދާޅުވަމުންނެވެ.
މި ވާހަކަތަކަށް ރައްދު ދެއްވައި ރޮޒޭނާ ވިދާޅުވީ، ބަޖެޓްގައި ނެތީ ކަޅު ކޮތަޅަށް އަޅައިގެން މުލިއާގެއަށް ވައްދާ ފައިސާ ކަމަށާއި، މިއީ މިދިޔަ ފަސް އަހަރުގެ ތެރޭގައި، ބަޖެޓްގައި ސީދާ އަދަދުތަކެއްގެ ގޮތުގައި ފެންނަން ނެތް ކަމުގައި ވިޔަސް ހިނގައިގެން ދިޔަކަން ޔަގީނުން އެނގެން އޮތް ކަންތައްތައް ކަމަށް ރޮޒޭނާ ބިދާޅުވިއެވެ.
މި ބަޖެޓްގައި ނެތް އެއްޗަކީ ކަޅު ކޮތަަޅަކަށް އަޅައިގެން މުލިއާގެއަށް ގެންދަން ޖެހޭ ފައިސާގެ އަދަދުތައް. މިއީ އަޅުގަނޑުމެންނަށް މިދިޔަ ފަސް އަހަރު، ބަޖެޓްގައި ސީދާ އަދަދުތަކެއްގެ ގޮތުގައި ފެންނަން ނެތް ކަމުގައި ވިޔަސް ހިނގައިގެން ދިޔަ ކަންތައްތައްކަން އަޅުގަނޑުމެންނަށް ޔަގީނުން އެނގެން އޮތް ކަންތައްތައް.ރޮޒޭނާ އާދާމް / އައްޑޫ މީދޫ ދާއިރާ
ރޮޒޭނާ ވިދާޅުވީ، އިދިކޮޅުން ލޯނުގެ ވާހަކަ ދައްކާއިރު، މި ބަޖެޓް ބަލާލުމުން ލޯނުން ކުރެވޭ ކަންތައް ސާފުކޮށް ފެންނަން އެބައޮތް ކަމަށެވެ. އެކި ދާއިރާތަކަށް ކުރެވުނު ޚަރަދާއި, ޕެންޑަމިކްގައިވެސް ތަރައްގީގެ މަޝްރޫއުތައް ކުރިއަށްގެންދިޔުން ކަމަށެވެ. ބަޖެޓްގައި ޖަހާ ކޮންމެ ކަމަކީ އެ އަހަރުގެ ތެރޭގައި ނިމޭނެ ކަންކަން ނޫން ކަމަށާއި، މި ސަރުކާރުން ވެފައިވާ ވައުދަކީ ފަސް އަހަރަށް ވެފައިވާ ވައުދުތަކެއް ކަމަށް ރޮޒޭނާ ވިދާޅުވިއެވެ. ފަސް އަހަރުގެ ވެރިކަން ނިމޭއިރު، ވައުދުތައް ފުއްދޭނެ ކަމަށާއި، ހަމައެކަނި ބަޖެޓްގައި ޖަހާފައި ނިންމާނުލާނެ ކަމަށެވެ. ލޯނު ނަގައިގެން ކުރަނީ މުސްތަގުބަލަށް ކުރާ އިންވެސްޓްމެންޓްތައް ކަމަށެވެ.
ލޯނުގެ ސަތޭކަ މިލިއަން ރައީސް ޞާލިޙުގެ އެކައުންޓުން ފެނިވަޑައި ނުގަންނަވާނެ ކަމަށާއި، ކަޅު ކޮތަޅަށް ލައިގެން އެ ފައިސާ މުލިއާގެއަށް ވައްދާތަންވެސް ފެނިވަޑައި ނުގަންނަވާނެ ކަމަށް ރޮޒޭނާ ވިދާޅުވިއެވެ.
ލޯނުގެ ވާހަކަ ރައްޔިތުންނަށް އޮޅޭ ގޮތަށް ދައްކައިގެން ރައްޔިތުން ބަލައި ނުގަންނާނެ ކަމަށް ވިދާޅުވިއެވެ. ސޯޝަލް ހައުސިންގ ހެދުމަށް ނެގި ލޯނުން އެތަން ނުނިންމައި, ހަތަރު ފާރު މި ސަރުކާރާ ހަވާލުކޮށް, ތަށިމުށި ގަނެދޭން ބުނެ ވާހަކަދައްކަން އިދިކޮޅު މެމްބަރުން ހަގީގަތުގައި ލަދުގަންނަން ޖެހޭނެ ކަމަށް ރޮޒޭނާ ވިދާޅުވިއެވެ. ތަށިމުށި ނުޖެހި ހުރީ ކީއްވެގެންތޯއާއި އެއީ ކޮންބަޔަކު ހިންގި ވައްކަމެއްގެ ސަބަބުންތޯ ރޮޒޭނާ ސުވާލު އުފެއްދެވިއެވެ.