އިމިގްރޭޝަންގެ އޮންލައިން އެޕްލިކޭޝަން އިމުގައަށް ގެންނަ އަޕްޑޭޓަކާ ގުޅިގެން ޕާސްޕޯޓަށް ހުށަހެޅޭނެ ވަގުތު ކުރުކޮށްފިއެވެ.

އިމިގްރޭޝަނުން ބުނީ ދެން ޕާސްޕޯޓަށް އެދި ހުށަހެޅޭނީ ރަސްމީ ބަންދު ނޫން ކޮންމެ ދުވަހެއްގެ ހެނދުނު 08:00ން ހަވީރު 04:00އާ ހަމައަށް ކަމަށެވެ. އިމިގްރޭޝަނުން ވަނީ ވަކި ގޮތެއް އަންގަންދެން އަމަލުކުރާނީ އެގޮތަށް ކަމަށް ބުނެ އެކަމުގެ ސަބަބުން ދިމާވެދާނެ ދަތިތަކަށް މާފަށް އެދިފައެވެ.

މި އެޕް އަޕްގްރޭޑްކުރުމުގެ މަސައްކަތް ޖުލައި މަހުގެ 31 ގައި ވެސް އިމިގްރޭޝަނުން ވަނީ ކޮށްފައެވެ. އަދި އޮގަސްޓު 1 ވަނަ ދުވަހު އެޕް އަޕްގްރޭޑް ކުރުމުގެ މަސައްކަތް ނިމިފައިވާކަމަށް އިމިގްރޭޝަނުން ވަނީ ބުނެފައެވެ.

އިމިގްރޭޝަނުން ބުނީ ރާއްޖެއަށް އައުމާއި ރާއްޖެއިން ފުރުމުގެ 24 ގަޑިއިރު ކުރިން އެ އިދާރާއަށް ހުށަހަޅަންޖެހޭ ހެލްތު ޑިކްލަރޭޝަން ފޯމު އިމުގާ ޕޯޓަލް މެދުވެރިކޮށް މިހާރު ހުށަހެޅޭނެ ކަމަށެވެ.

ކޮވިޑް-19 އާ ގުޅިގެން އަޅާފައިވާ ރައްކާތެރިކަމުގެ ފިޔަވަޅުތަކުގެ ތެރޭގައި ރާއްޖެ އެތެރެވުމާއި ރާއްޖެއިން ބޭރުވުމުގެ ކުރިން ހެލްތް ޑިކްލަރެޝަން ފޯމު އިމިގްރޭޝަނަށް ހުށަހަޅަންޖެހެއެވެ. މި ފޯމުގައި ވެކްސިން ފުރިހަމަކޮށްފައިވާނަމަ އެކަމުގެ ތަފްސީލު ހާމަކުރަންޖެހެއެވެ. އެކަމުގެ ލިޔެކިޔުންތަކުގެ ކޮޕީއެއް ހެލްތު ޑިކްލަރޭޝަން ފޯމާއެކު އިމުގާ ޕޯޓަލްއަށް ހުށަހަޅަންޖެހެއެވެ.

މީގެ އިތުރުން ވެކްސިންގެ ޑޯޒް ފުރިހަމަކުރުމަށްފަހު 14 ދުވަސް ހަމަނުކޮށް ރާއްޖެ އަންނަ މީހުންނާއި، ވެކްސިންގެ ޑޯޒްތައް ފުރިހަމަކޮށްފައިނުވާ މީހުންނަށް ރާއްޖެ އެތެރެވެވޭނީ 96 ގަޑިއިރު ނުވާ ނެގެޓިވް ޕީސީއާރު ޓެސްޓަކާއެކު ކަމަށް އިމިގްރޭޝަނުން ބުނެފައިވެއެވެ.

މިގޮތަށް ރާއްޖެ އަންނަ މީހުންގެ ތެރެއިން 1 އަހަރު ނުފެރޭ ކުޑަކުދިން، އެކުދިން ރާއްޖެ އައުމުގެކުރިން 10 ދުވަހުގެ ކަރަންޓީން މުއްދަތެއް ފުރިހަމަކުރަން ޖެހޭނެ ކަމަށް އިމިގްރޭޝަނުން ވަނީ ބުނެފައެވެ. އަދި ހޯމް ކަރަންޓީން ނިންމާގޮތަށް ކޮވިޑަށް ޓެސްޓުކޮށް، ނެގެޓިވް ޕީސީއާރު ޓެސްޓަކާއެކު ރާއްޖެ އައުމަށް އިމިގްރޭޝަނުން ވަނީ އަންގާފައެވެ.

މީގެ އިތުރުން ބޭރު ގައުމުތަކުގައި ތިބޭ ދިވެހިން ވެކްސިންގެ ޑޯޒްތައް ފުރިހަމަނުކުރާނަމަ ރާއްޖެ އައުމުގެކުރިން 10 ދުވަހުގެ ހޯމް ކަރަންޓީނެއް ފުރިހަމަކުރަންޖެހެއެވެ.

އެކި ގައުމުތަކުން ބޭނުންކުރާ ޕާސްޕޯޓްތައް ރޭންކުކުރާ "ދަ ހެންލީ ޕާސްޕޯޓް އިންޑެކްސް"ގައި މިއަހަރު ރާއްޖެއަށް ވަނީ 66 ވަނަ ލިބިފައެވެ. ގައުމުތަކުން ބޭނުންކުރާ ޕާސްޕޯޓްތައް ރޭންކުކުރުމުގައި ބަލަނީ ދާން ބޭނުންވާ ތަނަކަށް ދިޔުމުގެ ކުރިން ވިސާ ހައްދަން ނުޖެހޭގޮތަށް ހުރޭތޯއެވެ. އެގޮތުން އެ ޕާސްޕޯޓެއް ބޭނުންކޮށްގެން ދެވެނީ ކިތައް ގައުމަށްތޯ ބަލައެވެ. އަދި ގައުމުތައް ރޭންކުކުރަނީ އެގޮތަށް ދެވޭ ތަންތަނުގެ އަދަދުގެ ނިސްބަތުންނެވެ. މިއަހަރުގެ ލިސްޓަށް ބަލާއިރު ރާއްޖޭގެ ޕާސްޕޯޓުގައި 87 ގައުމަކަށް ނުވަތަ ތަނަކަށް (ކުރިން ވިސާ ހެއްދުމަކާ ނުލައި) ދެވެއެވެ. މިދިޔަ އަހަރު ރާއްޖެއަށް ލިބިފައިވަނީ ރޭންކިންގގެ 59 ވަނައެވެ. އެއީ 85 ތަނަކަށް ދެވޭގޮތަށް އޮތުމުންނެވެ.