ބާރަށު ޒުވާނުންގެ ދިރުން ޖަމްޢިއްޔާއިން އިންތިޒާމުކުރާ ފޯރިގަދަ ވޮލީ މުބާރާތެއްކަމަށްވާ "ބާރަށު ޒުވާނުންގެ ދިރުމުގެ ވާދައިގެ ތައްޓަށް ކުޅެވޭ 17 ވަނަ ވޮލީ މުބާރާތް 2021" ހއ. ބާރަށުގައި ބާއްވަން ނިންމައިފިއެވެ.

މި މުބާރާތުގައި ބޮޑު ތިލަދުންމަތީގެ އަތޮޅުތައް ކަމުގައިވާ ހއ. އަދި ހދ.ގެ ދެ ޖިންސުގެ ޓީމުތަކަށް ބައިވެރިވެވޭނެ ކަމަށް ޒުވާނުން ގެ ދިރުން ޖަމްޢިއްޔާއިން ބުނެއެވެ. އަދި މި މުބާރާތް ކުރިއަށް ދާނީ އަންހެން ފިރިހެން ޑިވިޜަން ވަކިން ކަމަށްވެސް އެ ޖަމިއްޔާއިން ބުނެއެވެ.

ޒުވާނުންގެ ދިރުން ޖަމްޢިއްޔާއިން ބުނެފައިވާ ގޮތުގައި, މިއީ މިހާތަނަށް ބާރަށުގައި ބޭއްވިގެންދާނެ އެންމެ ފޯރިގަދަ މުބާރާތަށް ވާއިރު މިއީ އެ ޖަމްޢިއްޔާއިން އިންތިޒާމް ކޮށްގެން ބާއްވާ 17 ވަނަ ވޮލީ މުބާރާތެވެ. އެ ޖަމްޢިއްޔާގެ ކުޅިވަރާބެހެ ސެކްރެޓަރީ މުޙައްމަދު ޙަސަން ވިދާޅުވީ, މި މުބާރާތް ރަށުފެންވަރުގައި ބާއްވަމުން އަންނަތާ 16 އަހަރު ވެފައިވާ ކަމަށާއި, 17 ވަނަ މުބާރާތް ބޮޑުތިލަދުންމައްޗަށް ހުޅުވާލައިގެން ބާއްވަން ނިންމާފައިވަނީ ތަފާތު ތަޖުރިބާއެއް ކޮށްލުމުގެ ބޭނުމުގައި ކަމަށެވެ.

ބޮޑުތިލަދުންމައްޗަށް މުބާރާތް ހުޅުވާލަން ނިންމުމުގެ އެންމެ ބޮޑު އަމާޒަކީ, ބޮޑުތިލަދުންމަތީގެ ކުޅުންތެރިންނަކީ ގައުމީ ފެންވަރުގައި ކުޅޭނެ ކުޅުންތެރިންނަށްވެ ބޮޑުތިލަދުންމަތީގެ ކުޅުންތެރިން ގައުމީ ޓީމަށް ކުޅެމުން އަންނަތަން ދުށުންކަމަށެވެ. މީގެ އިތުރުން މުޙައްމަދު ވިދާޅުވީ ބާރަށުގެ ދެ ކުޅުންތެރިއަކު ގައުމީ ޓީމަށް ކުޅެމުން އަންނަ ކަމަށާއި, މިއީ ފާއިތުވެދިޔަ 16 އަހަރު ތެރޭގައި މި މުބާރާތުން ކުރި ވަރަށް ބޮޑު ފައިދާއެއް ކަމަށެވެ. ފާއިތުވެ ދިޔަ 16 އަހަރު މި މުބާރާތް ކާމިޔާބު ކަމާއިއެކީ ކުރިއަށް ގެންގޮސްފައިވަނީ އެކި ފަރާތްތަކުގެ އެހީއާއެކުކަން ފާހަގަ ކުރައްވަމުން އޭނާ ވިދާޅުވީ, އެންމެ ބޮޑު އެހީތެރި ކަމެއް މި މުބާރާތަށް ލިބިގެން ގޮސްފައިވަނީ ބާރަށު ދާއިރާގެ ކުރީގެ މެމްބަރު އިބްރާހީމް ޝުޖާޢުގެ ފަރާތުން ކަމަށެވެ.

މުބާރާތުގައި ބައިވެރިވުމުގެ ފުރުސަތު މިހާރު ވަނީ ހުޅުވާލާފައިއެވެ. އެގޮތުން މުބާތާރުގައި ބައިވެރިވާން ބޭނުންވާ ހއ. އަދި ހދ.ގެ ޓީމުތަކުން މުބާރާތުގައި ބައިވެރިވުމަށް އެދޭ ފޯރމް ނުވަތަ ސިޓީ 15 ނޮވެމްބަރު 2021 ވާ ހޯމަދުވަހުގެ 21:00ގެ ކުރިން އެ ޖަމްޢިއްޔާގެ އިދާރާއަށް ހުށަހެޅުމަށް ނުވަތަ [email protected] އަށް އީމެއިލް ކުރުމަށް އެ ޖަމްޢިޔާއިން އެދެއެވެ.

މި މުބާރާތް ފެށުމަށް ހަމަޖެހިފައިވަނީ 10 ޑިސެމްބަރު 2021ގައެވެ.