ބަޣާވާތްކުރުން ޤަބޫލު ނުކުރައްވާ ކަމަށާއި، ޤަބޫލު ކުރައްވަނީ ވޯޓު ފޮށީގެ ބާރުކަމަށް ޑިފެންސް މިނިސްޓަރ މާރިޔާ އަހުމަދު ދީދީ ވިދާޅުވެއްޖެއެވެ.
މިނިސްޓަރ އެހެން ވިދާޅުވީ، ދިވެހިރާއްޖޭގެ ނަސްރުގެ ދުވަހު ރާއްޖެޓީވީގެ ފަށާއިރު ޕްރޮގްރާމްގައި ބައިވެރިވެވަޑައިގެން ވާހަކަ ދައްކަވަމުންނެވެ. އެގޮތުން ގޮންޖެހުންތަކާ ކުރިމަތިލައިގެން ކުރިއަށް ވަޑައިގެންނެވުމުގެ ޝައުޤުވެރިކަން ހުންނަކަން ފާހަގަކުރައްވައި މިނިސްޓަރ ވިދާޅުވީ، ދިފާއީ ވުޒާރާގެ ވެރިޔަކަށް އައްޔަނު ކުރެއްވުމުން ވެސް ކުރިއަށް ވަޑައިގެންނެވީ އެ ވިސްނުމުގައި ކަމަށެވެ. އެގޮތުން ބަޣާވާތެއް ނުކުރައްވާނެ ކަން އަމިއްލަފުޅަށް ޤަބޫލުކުރައްވާ ކަމަށާއި، ވޯޓުން އައްޔަނު ކުރާ ވެރިމީހާގެ ބާރު ޤަބޫލު ކުރައްވާކަމަށް މިނިސްޓަރ ވިދާޅުވިއެވެ.
ޗެލެންޖަސް އާ ކުރިމަތިލުމަކީ އަޅުގަނޑު ކުރާހިތްވާވެސް ކަމެއް، އަޅުގަނޑު ވިސްނި ގޮތުގައި ހަމަ ގައިމުވެސް އަޅުގަނޑަކީ ބަޣާވާތެއްގައި ބައިވެރިވާނެ މީހެއް ނޫން، އަޅުގަނޑަކީ މީ ހަމަ އެންޓި-ބަޣާވަތް މީހެއް، ވޯޓު ފޮށީގެ ބާރު ޤަބޫލު ކުރާ މީހެއް، އެހެންވީމާ އަޅުގަނޑު ހިތަށް އެރީ މި އަޒުމުގައި އަޅުގަނޑު ގޮސްގެން އެކީގައި މަސައްކަތް ކުރާނެ ގޮތްތަކެއް ހޯދޭނެއޭ.ޑިފެންސް މިނިސްޓަރ މާރިޔާ އަހުމަދު ދީދީ
މިހާރު ސިފައިންގެ ތެރޭގައި ސިޔާސީ ނުފޫޒު ނޯންނަކަން ފާހަގަ ކުރައްވައި މިނިސްޓަރ އިތުރަށް ވިދާޅުވީ، ވަކި އެމްޑީޕީ ނުވަތަ ޕީޕީއެމްގެ ވާހަކަ ވެސް މިއަދު ސިފައިންގޭގެ ތެރެއިން އަޑުނީވޭނެ ކަމަށެވެ. ސިފައިން ކެނޑިނޭޅި މަސައްކަތް ކުރަމުންދަނީ ރައްޔިތުންގެ ޙައްޤުގައިކަމަށް ވެސް މިނިސްޓަރ ވިދާޅުވިއެވެ. އެގޮތުން ކޮންމެ ކަމެއް ދިމާވި ނަމަވެސް، ފަސްޖެހުމެއްނެތި ސިފައިން ކުރަމުންދާ ބުރަ މަސައްކަތް މިނިސްޓަރ ފާހަގަ ކުރެއްވިއެވެ.
ސިފައިން މިހާރު މަސައްކަތް ކުރަމުންދަނީ ވަރަށް ޕްރޮފެޝަނަލް ކޮށް ކަމަށާއި ސިފައިންގެ ސަފުތަކަކީ ބަދަހި ސަފުތަކެއްކަމަށް މިނިސްޓަރ ވިދާޅުވި އެވެ.
