ދިއްދޫ ކައުންސިލްގެ ރައީސް ބާއްވަވާ ހޭންޑްބޯލް މުބާރާތުގައި ވާދަކުރާ ޓީމްތަކުގެ ގުރުއަތުލުން ބާއްވާއިފިއެވެ.

ދިއްދޫ ޒުވާނުންގެ މަރުކަޒުގައި މިރޭ ކުރިއަށް ދިޔަ ގުރުއަތުލުމުގެ ރަސްމިއްޔާތުގައި ދިއްދޫ ކައުންސިލްގެ ރައީސްއާއި ޓީމް ތަކުގެ އިސްވެރިންގެ އިތުރުން, މުބާރާތް ހިންގާ ކޮމެޓީގެ އޮފިޝަލުން ވަނީ ބައިވެރިވެފައެވެ.

މި މުބާރާތަކީ ދިއްދޫ ކައުންސިލް ރައީސްގެ ވަޢުދުތަކުގެ ތެރެއިން ވަޢުދެކެވެ. މިމަހުގެ 5ވަނަ ދުވަހު ފެށޭ މި މުބަރާތުގައި ޗެމްޕިއަން ޓީމަށް 10,000ރުފިޔާ، ދެވަނަ އަށްދާ ޓީމަށް 2000 ރުފިޔާ އަދި ފެއާރޕްލޭ ޓީމަށް 1000ރުފިޔާގެ ފައިސާގެ އިނާމް ދިނުމަށް ހަމަޖެހިފައިވެއެވެ. އަދި ތައްޓާއި މެޑަލްގެ އިތުރުން ހަނދާނީ ލިޔުން ދިނުމަށްވެސް ވަނީ ހަމަޖެހިފައިއެވެ.

ލީގް އުސޫލުން ކުޅޭ މި މުބާރާތުގައި 6 ޓީމް ވާދަކުރެއެވެ. އެއީ ނާޑް ސްޕޯރޓްސް ކުލަބް، މިޑްލް ސްޕޯރޓްސް ކުލަބް، ދިއްދޫ ކައުންސިލް، އެފް.ސީ.އެސް.ސީ، ހީވެސް ނުވޭ އަދި ޕޮލިސް ކުލަބެވެ.

ގުރުއަތުލުމުގެ މި ރަސްމިއްޔާތުގައި ވާހަކަފުޅު ދައްކަވަމުން ދިއްދޫ ކައުންސިލްގެ ރައީސް ޢަބްދުﷲ ރަޝީދް ވިދާޅުވީ; މި މުބާރާތުގެ މައިގަނޑު މަޤްޞަދަކީ ދިއްދޫގެ ކަނބަލުން ބާރުވެރިކުރުން ކަމަށެވެ. އަދި އެއް މާޙައުލަކުން ބައްދަލުވެ, ދެކެމުން އަންނަ ގޮތް މި މުބާރާތަށް ފަހު ބަދަލުވުން ކަމަށެވެ. މީގެ އިތުރުން ދިއްދޫގެ ކަނބަލުން ހޭންޑްބޯލްއަށް ޝައުޤުވެރި ކުރުމާއި ހޭންޑްބޯލް ދިރުވައި އާލާކުރުން ކަމަށްވެސް ޢަބްދުﷲ ރަޝީދް ވިދާޅުވިއެވެ. މި މުބާރާތް ކުރިއަށް އޮތް 5 އަހަރު ތެރޭގައި ބާއްވާނެ ކަމަށްވެސް އަބްދުﷲ ރަޝީދް ވިދާޅުވީއެވެ. މިއީ މިގޮތުން ބޭއްވޭ އެންމެ ފުރަތަމަ ހޭންޑްބޯލް މުބާރާތެވެ.

ގުރުއަތު ނެގުމުގެ މިރަސްމިއްޔާތުގައި ޓީމް ތަކުން ބޭނުން ކުރާނެ ޖާރޒީ ވަނީ ދައްކާލާފައިއެވެ. އަދި މި މުބާރާތުގެ ރަސްމީ ލަވަވެސް ވަނީ ލޯންޗު ކޮށްފައެވެ.

މި މުބާރާތުގެ ފައިނަލް މެޗް ކުޅުމަށް ހަމަޖެހިފައިވަނީ ނޮވެމްބަރ 12 ވަނަ ދުވަހުއެވެ.