ގަދަވޭނުގައެވެ. މާދަމައަށްޓަކައި އެތައް އުންމީދެއް ކުރެއެވެ. ދުނިޔޭގެ އެކިކަންކޮޅުތަކުން ފަރުވާ ހޯދައެވެ. އެކަމަށް އެތައް ޚަރަދެއް ކުރެއެވެ. މިހުރިހާ ހޭދަ ކުރުމަކަށް އަތުގައި އެކަށީގެންވާ ފައިސާއެއް ނެތެވެ. އެހެންކަމުން ސަރުކާރާއި އާއްމުންގެ އެހީތެރިކަމަށް އެދެއެވެ.
ދިވެހިންނަކީ އަބަދުވެސް އެއްބަޔަކު އަނެއްބަޔަކަށް އެހީތެރިކަން ފޯރުކޮށްދޭ ބަޔަކަށްވާއިރު، އެފަދަ މީހުންނަށް އެންމެ ބޮޑު އެހީތެރިކަމެއް ލިބެނީ ވެސް އާއްމުންގެ ފަރާތުންކަމާ މެދު ޝައްކެއްނެތެވެ.
އެފަދަ މީހުންނަށް އެހީތެރިކަން ފޯރުކޮށްދިނުމުގެ ގޮތުން ތަފާތު ހަރަކާތްތައް ކުރިއަށް ގެންދެއެވެ. ސޯޝަލް މީޑިއާގެ އެކިއެކި ފްލެޓްފޯމްތަކުގައި އެހީތެރިކަމުގެ އެހީއަށް އެދިފައިވެއެވެ. ބަލި މީހާގެ ނަމުގައި ޕޭޖްތައް ވެސް ހިންގައެވެ. ތަފާތު ކޭމްޕްތައް ހިންގައެވެ. ނަމަވެސް މިޒަމާނުގައި ހުރިހާ ކަމަކަށް ސަމާލުވާން ޖެހޭ އުސޫލުން މީހަކަށް އެހީތެރިކަމެއް ފޯރުކޮށްދޭއިރު، އެހީތެރިކަން ފޯރުކޮށްދެވެނީ ބަލި މީހާއަށްތޯ ބަލައި ކަށަވަރު ކުރަންޖެހެއެވެ. އެއީ ވަގުން އިންތިހާއަށް ގިނަވީމައެވެ.
މިހާރު މިވަނީ އަނެއްކާ ވެސް އެފަދަ ކަމެއް ފެންމަތިވެފައެވެ. މަކަރާއި ހީލަތުން ފައިސާ ހޯދަމުންދާ މިޒަމާނުގައި، މިހާރު އެފައިސާ ހޯދަމުންދަނީ އެންމެންގެ ލޯ ކުރިމަތިން ހަމްދަރުދީއާއެކުއެވެ. މިފަހަރު ވަގުން ޝިކާރަ ކުރުމަށް މަސައްކަތް ކޮށްފައިވަނީ އިންތިހާއަށް ބަލިވެ، މަރާއި ހަނގުރާމަ ކުރާ ބަލި މީހުންގެ ފޮޓޯ ބޭނުން ކޮށްގެންނެވެ. ތުއްތު ކުދިންގެ ފޮޓޯތައް ވެސް ހިމެނެއެވެ.
މި ޕޯސްޓްތައް ލަނީ ވެސް ފޭކް އެކައުންޓްތަކުންނެވެ. ނަމަވެސް އެފަދަ ޕޯސްޓްތައް އާއްމުންނަށް ނޭނގި ނަމަވެސް ވަރަށް ބޮޑަށް ޝެއަރ ކުރެވި، ރުފިޔާ ޓްރާންސްފަރ ކޮށްފައިވެއެވެ. މިއީ މިފަދަ ޕޯސްޓްތައް ބޭނުން ކޮށްގެން ވަގުން ކުރަމުން އަންނަ ޒަމާނީ ވައްކަމެކެވެ.
ޒަމާނީ މިއުކުޅު ބޭނުން ކޮށްގެން ވަގުން ފައިސާ ހޯދަމުންދަނިކޮށް، އާއްމުންގެ ސަމާލުކަމަށް މިކަން އައީ ކޮންމެ ޕޯސްޓެއްގައި ބޭންކް އޮފް މޯލްޑިވްސް (ބީއެމްއެލް) ގެ އެއް އެކައުންޓް ނަންބަރު ޖަހާފައި ހުރުމުންނެވެ. އެހިސާބުން އެއީ ބޮޑު އޮޅުވާލުމެއްކަން ހާމަވެގެން ދިޔައެވެ. އޭގެ ފަހުން ފޭސްކްބުކްގައި އެ ފޯސްޓްތައް ޖަހާފައިވާ އެކައުންޓްތައް މިހާރު ވަނީ ޑިއެކްޓިވޭޓް ވެސް ކޮށްލާފައެވެ.
މީގެ އިތުރުން ބައެއް އާންމުން ބުނެފައިވަނީ އަދާ ހަމައަށްވެސް މިމައްސަލައަށް ރަސްމީ ފަރާތަކުން އެކަށީގެންވާ ފިޔަވަޅެއް އަޅާފައިނުވާ ކަމަށާއި، ކުށްވެރިންނަށް އަދަބު ދީފައިނުވާ ކަމަށެވެ. މިއީ މިފަދަ މައްސަލަތައް އިންތިހާއަށް އިތުރުވި މައިގަނޑު ސަބަބު ކަމަށް އެމީހުން ބުނެފައިވެއެވެ. އެގޮތުން ބީއެމްއެލްގެ ނަމުގައި ގުޅައިގެން މައުލޫމާތު ހޯދައި އެކައުންޓްގައި ހުރި ފައިސާކޮޅު ވެސް ފޭރިފައިވާ މައްސަލަ ފާހަގަކޮށްފައިވެއެވެ.
މި މައްސަލަތަކާއި ގުޅިގެން ފުލުހުން ބުނެފައިވަނީ މަކަރާއި ހީލަތުން ފައިސާ ހޯދާ މައްސަލަ ބޮޑުވެފައިވާ ކަމަށާއި، މިފަދަ މައްސަލަތައް ތަހުގީގު ކުރަމުންދާ ކަމަށެވެ. އަދި އޮޅުވާލައިގެން ފައިސާ ހޯދާ މައްސަލާގައި އާއްމުން މިހާރަށް ވުރެ ބޮޑަށް ހޭލުންތެރިވުމަށް އިލްތިމާސްކޮށްފައިވެއެވެ.
ހުރިހާ ތަނެއްގައި، ހުރިހާ ކަމެއްގައި ވަގުން ހުޝިޔާރުކަން ދައްކަމުންދާއިރު، ވަގުންނަށް ވުރެ ބޮޑަށް އެހެން މީހުން ހުޝިޔާރުވާން ޖެހެއެވެ. ފައިސާ ޓްރާންސްފަރ ކުރުމުގެ ކުރިން އެކައުންޓް ނަމްބަރު ވެރިފައިކޮށް ޗެކް ކުރަން ޖެހެއެވެ. އެހެން ނޫން ނަމަ ފައިސާ ގިނަވާނީ ވަގު ކަލޭގެ އެކައުންޓުގައެވެ.
