މެންޗެސްޓަރ އެރީނާގައި ބޮންގޮއްވި މައްސަލައިގައި ހަތްވަނަ މީހަކު ހައްޔަރުކޮށް "ނެޓްވޯކް" ހޯދުމުގެ މަސައްކަތް ފުލުހުން ފަށައިފިއެވެ.

ފުލުހުން ބުނީ ތުހުމަތު ކުރެވޭ ދެ މީހަކު ހައްޔަރުކޮށްފައި ވަނީ ނުނެޓަންއިންނާއި ވޯވިކްޝަޔަރއިން ކަމަށެވެ.

ސަލްމާން އާބީދީ ނަމަކަށް ކިޔާ މީހަކު އަމިއްލައަށް މަރުވެގެން ހޯމަ ދުވަހުގެ ރޭ އަރިއާނާ ގްރޭންޑް ކޮންސަރޓްގައި ދިން ހަމަލާގައި 22 މީހުން މަރުވެފައިވާއިރު ގިނަ އަދަދެއްގެ ކުޑަކުދިން ހިމެނެއެވެ. ހަމަލާގައި 64 މީހުންވަނީ ޒަޚަމްވެފައެވެ.

ލީބިޔާގެ އަސްކަރިއްޔާއިން ވަނީ ހަމަލާދިން މީހާގެ ބައްޕަ، ރަމްޟާން އަދި ކޮއްކޮ ހާޝިމް ހައްޔަރުކޮށްފައެވެ. އަދި އޭނާގެ ބޭބެ އިސްމާއިލް ހައްޔަރުކޮށްފައި ވަނީ އަންގާރަ ދުވަހު ޗޯލްޓަންއިންނެވެ.

އިނގިރޭސިވިލާތުން ހައްޔަރުކުރި ފަސްވަނަ މީހާ ހައްޔަރުކޮށްފައިވަނީ ބުދަ ދުވަހު ވިގަންއިންނެވެ. ފުލުހުން ބުނީ އޭނާއަކީ ޕެކޭޖް އުފުލި މީހާ ކަމަށާއި މިހާރު ދަނީ އެ ތަކެތި ދެނެގަތުމުގެ މަސައްކަތް ކުރަމުން ކަމަށެވެ.

އިނގިރޭސި ވިލާތަށް ޓެރެރިޒަމްގެ ބިރުވެރިކަމުގެ ތްރެޓް ލެވަލް އަންގާރަ ދުވަހުގެރޭ އެންމެ މަތިކޮށްފައިވާއިރު މައި ތަންތަނުގެ ސަލާމަތީ ކަންކަން ބެލެހެއްޓުމަށް ވަނީ އަސްކަރިއްޔާ ނެރެފައެވެ.

އިނގިރޭސިވިލާތުގެ މައި އިމާރާތްތަކާއި އަދި ތަންތަނުގައި އަސްކަރިއްޔާއިން މިހާރު ދަނީ ފޯރިމަރަމުންނެވެ.

އެމެރިކާގެ މަޝްހޫރު ލަވަކިޔުންތެރިޔާ އާރިއާނާ ގްރާންޑޭގެ ޝޯވއަށް ފަހު މެންޗެސްޓަރ އެރީނާއަށް ދީފައިވާ ބޮމުގެ ހަމަލާގެ ޒިންމާ އިސްލާމިކް ސްޓޭޓް ނުވަތަ އައިއެސް އިން ވަނީ ނަގާފައެވެ.

ހަމަލާ ދިން ވަގުތު އެތަނުގައި ތިބި ބައެއް ފަރާތްތަކުން ބުނީ، ބޮން ގޮއްވާފައި ވަނީ އާރިއާނާ ފަހު ލަވަ ނިންމާލާ "ޝުކުރިއްޔާ މެންޗެސްޓަރ"އޭ ބުނެ ސްޓޭޖުން ފޭބި ވަގުތެވެ.

 ބޮން ގޮއްވާފައިވަނީ ޝޯވ ބަލަން ދިޔަ މީހުން ނިކުންނަނިކޮށް، އެރީނާގެ ބޭރުންނެވެ.

މިފަހަރުގެ ކުރިން މިހާތަނަށް، އިނގިރޭސިވިލާތުގެ "ޓެރާ ތްރެޓް ލެވަލް"، "ކްރިޓިކަލް" އަށް ޖައްސައިފައި ވަނީ 2006 ގައެވެ.