ކްރިކެޓުގެ ޓީ20 ވޯލްޑް ކަޕް ކޮލިފައިންގައި ކުޅުނު ދެވަނަ މެޗުން ގަތަރު އަތުންވެސް ރާއްޖެ ބަލިވެއްޖެއެވެ.

މި ފަހަރުގެ ކޮލިފައިންގައި ރާއްޖެ ވާދަކުރަން ޖެހެނީ ގަތަރުގެ އިތުރުން ސައުދީ އަރަބިއްޔާ އާއި، ކުވައިތު އަދި ބަހްރޭނެވެ. މި ޒޯނުގެ ކޮލިފައިން މެޗުތައް ގަތަރުގެ ވެރިރަށް ދޯހާގައި ހޮނިހިރު ދުވަހު ފެށިއިރު، މެޗުތައް ކުޅޭނީ އަންނަ ހުކުރު ދުވަހުގެ ނިޔަލަށެވެ.

ކޮލިފައިންގައި އާދީއްތަ ދުވަހު ކުޅުނު މެޗުން ގަތަރު އަތުން ރާއްޖެ ބަލިވީ 98 ލަނޑުންނެވެ. މި މެޗުގައި ގަތަރު އެންމެ ފުރަތަމަ ކުޅެން އަރައި ވަނީ 20 އޯވަރު ހަމަވިއިރު، ހަ ކުޅުންތެރިން ނުބައިވެގެން 154 ލަނޑު ހަދާފައެވެ. ގަތަރުން އެންމެ ރަނގަޅު ކުޅުމެއް ދެއްކީ 46 ބޯޅައިން 62 ލަނޑު ހެދި މުޙައްމަދު ރިޒްލާނެވެ.

ޖަވާބުގައި ރާއްޖެ ކުޅެން އަރައި 18.5 އޯވަރު ހަމަވިއިރު ހެދިފައިވަނީ 56 ލަނޑެވެ. މި ބައިގައި ރާއްޖޭން އެންމެ ރަނގަޅު ކުޅުމެއް ދެއްކީ 28 ބޯޅައިން 18 ލަނޑު ހެދި އަޙްމަދު ހަސަނެވެ.

ކޮލިފައިންގައި ކުޅުނު ދެވަނަ މެޗުން ރާއްޖެ ބަލިވިއިރު، ހޮނިހިރު ދުވަހު ކުޅުނު ފުރަތަމަ މެޗުން ރާއްޖެ ވަނީ ސައުދީ އަރަބިއްޔާ އަތުން ހަތް ވިކެޓުން ބަލިވެފައެވެ. ކޮލިފައިންގައި ދެން ކުޅޭ މެޗުގައި ރާއްޖެ ނުކުންނާނީ ބަހްރޭނާ ދެކޮޅަށެވެ. އެ މެޗު ކުޅޭނީ އަންނަ ބުދަ ދުވަހެވެ.

މި ފަހަރުގެ ވޯލްޑް ކަޕް ކޮލިފައިންގައި ގައުމީ ޓީމު ވާދަކުރަމުން އަންނައިރު، މިއީ ރާއްޖޭން 2019 ވަނަ އަހަރުގެ ސައުތު އޭޝިއަން ގޭމްސްގައި ވާދަކުރި ފަހުން ބައިނަލްއަގުވާމީ ކްރިކެޓް މެޗުތަކަކަށް ނުކުތް ފުރަތަމަ ފަހަރެވެ.