ކ. މާފުށީގެ ގޮނޑުދޮށް ހިމާޔަތްކުރުމުގެ މަޝްރޫއު ކާމިޔާބު ކަމާއެކު ނިންމާލައިފިއެވެ.

މޯލްޑިވްސް ޓްރާންސްޕޯޓު އެންޑް ކޮންޓްރެކްޓިން ކޮމްޕެނީ (އެމްޓީސީސީ)ން ބުނީ މާފުށީ ބިން ހިއްކުމާއި ގޮނޑުދޮށް ހިމާޔަތްކުރުމުގެ މަޝްރޫއުގެ މަސައްކަތް 27 ސެޕްޓެމްބަރ 2021 ވަނަ ދުވަހު ނިމިފައިވާ ކަމަށެވެ. މި މަޝްރޫއުއަކީ 118.07 މިލިއަން ރުފިޔާގެ މަޝްރޫއެކެވެ.

މި މަޝްރޫއުގެ ދަށުން 25 ހެކްޓަރުގެ ބިން ހިއްކާފައިވެއެވެ. އަދި 1,100 މީޓަރުގެ ސަރަހައްދެއްގައި ބޮޑުހިލައިގެ ރިވެޓްމަންޓް ޖަހާފައިވެއެވެ. މާފުށީ ބިން ހިއްކާފައި ވަނީ ވަކި ރަށެއް ގޮތަށް، ކޯޒްވޭއަކުން މާފުށްޓާ ގުޅާލާގޮތަކަށެވެ. މިގޮތަށް މާފުށީގެ ބިން ހިއްކާފައި ވަނީ ބޮޑު ބީޗެއް ލިބޭގޮތަށެވެ.

ގޮނޑުދޮށް ހިމާޔަތްކުރުމުގެ އަމަލީ މަސައްކަތް 17 ސެޕްޓެމްބަރ 2019ގައި ފަށާފައިވާއިރު، ބިން ހިއްކުމުގެ އަމަލީ މަސައްކަތް ފަށާފައިވަނީ 2019 ވަނަ އަހަރުގެ ޑިސެމްބަރު މަހުގެ 25 ވަނަ ދުވަހުއެވެ.

ބިމުގެ ދަތިކަމުގެ މައްސަލައަކީ މާފުއްޓަށް ދިމާވެފައިވާ އެންމެ ބޮޑު އެއް މައްސަލައެވެ. އެހެންކަމުން އެރަށުގެ ރައްޔިތުން ދަނީ ބޯހިޔާވަހިކަމުގެ ދަތިކަން ތަހައްމަލް ކުރަމުންނެވެ. އަދި ރަށުގެ ރައްޔިތުންނަށް ގޯތި ދޫ ނުކުރެވޭތާ 20 އަހަރު ވެފައިވާކަމަށް ވެސް ކައުންސިލުން ބުނެއެވެ.

ބިން ހިއްކުމުގެ މަޝްރޫއުގެ އެންމެ ބޮޑު އެއް މަޤްޞަދަކީ ބިމުގެ ދަތިކަމަށް ދިމާވެފައިވާ މައްސަލައަށް ހައްލު ހޯދުން ކަމަށްވާއިރު، މި މަޝްރޫއު ނިމުމާއެކު ރައްޔިތުންގެ ގިނަ ކަންބޮޑުވުންތަކަށް ހައްލު ލިބިގެންދާނެއެވެ. މިއީ ރައްޔިތުން ގިނަ ދުވަސްތަކަކަށް ދެކެމުން ހުވަފެނެއް ކަމަށާއި، މި މަޝްރޫއާއެކު ރައްޔިތުން ތިބީ ވަރަށް ބޮޑަށް ހިތްހަމަޖެހިފައި ކަމަށް ކައުންސިލުން ބުނެއެވެ،

މާފުށީގެ މި މަޝްރޫއު އަކީ ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހްގެ ރިޔާސީ ވައުދުފުޅެކެވެ.