ސުޕަ ޔުނައިޓެޑް ސްޕޯޓްސް (ސަސް) ގެ ކޯޗުގެ މަގާމުގައި ހުރި މުޙައްމަދު ޝިޔާޒް (މޯހަން) ގެ އެއްބަސްވުން އެ ކުލަބުން އުވާލައިފިއެވެ.
މޯހަންގެ އެއްބަސްވުން އުވާލިކަން ސަސްއިން ހާމަކޮށްފައިވަނީ ބުދަ ދުވަހުގެރޭ ސޯޝަލް މީޑިއާ މެދުވެރިކޮށެވެ. ސަސްއިން ހާމަކޮށްފައިވާ ގޮތުން މޯހަންގެ އެއްބަސްވުން އުވާލާފައިވަނީ ދެ ފަރާތް އެއްބަސްވެގެންނެވެ. އެއާއެކު ސަސްއިން ވަނީ މޯހަން އެ ޓީމަށް ކޮށްދިން މަސައްކަތަށް ޝުކުރުއަދާކޮށްފައެވެ.
ސަސްއިން މޯހަންގެ އެއްބަސްވުން އުވާލިއިރު، އޭނާ ސަސްއާ ހަވާލުވީ މިދިޔަ ސީޒަނުގެ މެދުތެރެއިން މި އަހަރުގެ ޖެނުއަރީ މަހުގެ 19 ވަނަ ދުވަހެވެ. އެ ފަހަރު ސަސްއާ ހަވާލުވާން މޯހަން ނިންމީ ކުލަބު އީގަލްސްގެ އެއްބަސްވުން އުވާލުމަށްފަހުއެވެ. އީގަލްސް ދޫކޮށް މޯހަން ސަސްއަށް ބަދަލުވިއިރު، މިދިޔަ ސީޒަނުގައި މޯހަން އާއެކު އީގަލްސްގެ ކުޅުން ވަރަށް ބޮޑަށް ދަށްވިއެވެ.
ފުޓްބޯޅައިގެ އެންމެ މަތީ ކޯޗިން ލައިސަންސް ކަމަށްވާ އޭއެފްސީ ޕްރޯ ލައިސަންސް ނަގާފައިވާ މޯހަންއަށް ސަސްގައި ހޭދަކުރި ކުރު މުއްދަތުގައި އެ ޓީމާއެކު ކާމިޔާބީއެއް ހޯދިފައިނުވި ނަމަވެސް، މީގެ ކުރިން އީގަލްސްގައި މޯހަން ވަނީ ރަނގަޅު މަސައްކަތްތަކެއް ކޮށްފައެވެ. އެގޮތުން އޭނާއާއެކު އީގަލްސްއިން ވަނީ އެ ޓީމުގެ ތާރީޚުގައި މުޅިން އަލަށް އޭއެފްސީ ކަޕުގެ ޕްލޭއޮފުން ޖާގައެއް ހޯދާފައެވެ. އަދި މޯހަން އާއެކު އެ ޓީމުން ވަނީ މުޅިން އަލަށް މިދިޔަ ސީޒަނުގެ ޗެރިޓީ ޝީލްޑުވެސް ކާމިޔާބުކޮށްފައެވެ.
މި އަހަރުގެ ޖެނުއަރީ މަހުގެ ތެރޭގައި ސަސްގެ ކޯޗަކަށް މޯހަން ހަމަޖެއްސިއިރު، އެ ފަހަރު ސަސްއިން ވަނީ އެ ޓީމުގެ ކޯޗުގެ މަގާމުގައި މީގެ ކުރިން ހުރި އަޙްމަދު ނާޝިދު (ނާދު) ގެ އެއްބަސްވުންވެސް ދެ ފަރާތް އެއްބަސްވެގެން އުވާލާފައެވެ. އެކަމަކު މިދިޔަ ސީޒަން ފެށުމުގެ ކުރިން ގަދަ ހައެއްގައި ނިންމާލަން އަމާޒުހިފި ސަސްއިން ވަނީ ނާދުގެ އިރުޝާދުގެ ދަށުން ކުޅުނު މެޗުތަކުގައި މޮޅު ކުޅުމެއް ދައްކާފައެވެ.
މިދިޔަ ސީޒަނުގައި މުޅިން އަލަށް ސަސް ފުރަތަމަ ޑިވިޝަނުގައި ވާދަކުރިއިރު، އެ ޓީމުން މިދިޔަ ސީޒަނުގެ ދިރާގު ދިވެހި ޕްރިމިއާ ލީގު ނިންމާލާފައިވަނީ ތާވަލުގެ ހަވަނައިގައި އޮވެގެންނެވެ. އެގޮތުން ކުޅުނު 14 މެޗުން ސަސްއަށް ލިބިފައިވަނީ 15 ޕޮއިންޓެވެ.
