ހޯމަ ދުވަހު ރާއްޖެއިން ކޮވިޑް-19ށް ޕޮޒިޓިވްވީ 46 މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.

އެޗްޕީއޭއިން އެންމެ ފަހުން އާންމުކުރި ތަފާސް ހިސާބުތައް ދައްކާ ގޮތުން އާދީއްތަ ދުވަހު ހަވީރު 06:00 ން ފެށިގެން ހޯމަ ދުވަހުގެ ހަވީރު 06:00 އާ ހަމައަށް ރާއްޖެއިން 3،668 މީހުން ކޮވިޑަށް ޓެސްޓު ކޮށްފައިވެއެވެ. އަދި އޭގެ ތެރެއިން ޕޮޒިޓިވްވެފައިވަނީ 46 މީހުންނެވެ. އެއީ މާލެ ސަރަހައްދުން ޕޮޒިޓިވްވި 14 މީހުންނާއި، އަތޮޅުތެރެއިން ޕޮޒިޓިވްވި 22 މީހުންގެ އިތުރުން ސަފާރިއަކުން ޕޮޒިޓިވްވި މީހަކާއި ރިސޯޓުތަކުން ޕޮޒިޓިވްވި 9 މީހުންނެވެ.

އިތުރު 46 މީހުން ބައްޔަށް ޕޮޒިޓިވްވުމާއެކު ރާއްޖެއިން ކޮވިޑަށް ޕޮޒިޓިވްވި މީހުންގެ އަދަދު ވަނީ 86،211 ށް އަރާފައެވެ. އަދި އެކްޓިވް ކޭސްތަކުގެ ގޮތުގައި މިވަގުތު 1،242 ކޭސް ރިޕޯޓްކޮށްފައިވާއިރު އޭގެ ތެރެއިން 13 މީހަކަށް ހޮސްޕިޓަލުގައި އެޑްމިޓްކޮށްގެން އަންނަނީ ފަރުވާ ދެމުންނެވެ. ރާއްޖެއިން މި ބަލީގައި 238 މީހުން ނިޔާވެފައިވާއިރު، 84،718 މީހުން ވަނީ ބަލިން ފަސޭހަވެފައެވެ.

ރާއްޖޭގައި މިހާރު ކޮވިޑް-19 ވަނީ ވަރަށް ބޮޑަށް ކޮންޓްރޯލްކުރެވިފައެވެ. އެއާއެކު ކޮވިޑް ފެތުރުން ކޮންޓްރޯލްކުރުމަށް އަޅާފައިވާ ފިޔަވަޅުތަކަށް ވެސް ވަނީ ލުއިތައް ދީފައެވެ. ނަމަވެސް އަދިވެސް ބަލި ފެތުރުން ކޮންޓްރޯލުކުރުމަށް އަޅަންޖެހޭ ފިޔަވަޅުތަކަށް ސަމާލުވުމަށް ކަމާބެހޭ ފަރާތްތަކުން އަންނަނީ އިލްތިމާސްކުރަމުންނެވެ. އަދި ކޮވިޑުން ދިފާއުވުމަށް ޖަހަންޖެހޭ ވެކްސިން ޖެހުމަށް އަންނަނީ އިލްތިމާސްކުރަމުންނެވެ.