އަންނަ އަހަރު އުޒްބެކިސްތާނުގައި ބޭއްވުމަށް ހަމަޖެހިފައިވާ 23 އަހަރުން ދަށުގެ އޭއެފްސީ އޭޝިއަން ކަޕް ކޮލިފައިން މެޗުތައް ކުޅުމަށް ޒުވާން ގައުމީ ޓީމު ބަހްރޭނަށް ފުރައިފިއެވެ.

ކޮލިފައިން މެޗުތައް މި މަހުގެ 27 ވަނަ ދުވަހުން ފެށިގެން 31 ވަނަ ދުވަހުގެ ނިޔަލަށް ކުޅުމަށް ތާވަލުކޮށްފައިވާއިރު، ރާއްޖެ ހިމެނޭ ގްރޫޕް ސީގައި ދެން އޮތް ގައުމުތަކަކީ ބަހްރޭނުގެ އިތުރުން އިރާގާއި އަފްޣާނިސްތާނެވެ. މި މެޗުތައް ކުޅުމަށް ހޯމަ ދުވަހުގެ ހެނދުނު 23 އަހަރުން ދަށުގެ ގައުމީ ޓީމު ވަނީ ބަހްރޭނަށް ފުރާފައެވެ.

މި ފަހަރުގެ ކޮލިފައިންއާ ކުރިމަތިލާއިރު، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ވަނީ ޒުވާން ގައުމީ ޓީމުގެ ކޯޗަކަށް ރާއްޖޭގެ އެއް ނަމްބަރު ކޯޗު އަލީ ސުޒޭން ހަމަޖައްސާފައެވެ. އެކަމަކު އޭގެ ފަހުން ސާފް ޗެމްޕިއަންޝިޕުގައި ވާދަކުރި ސީނިއާ ގައުމީ ޓީމުގެ ޒިންމާވެސް ސުޒޭނާ ހަވާލުކުރުމުން، ޒުވާން ގައުމީ ޓީމުގެ ކަންކަން ބަލަހައްޓާފައިވަނީ އެސިސްޓަންޓް ކޯޗުން ކަމަށްވާ ޒުވާން ކޯޗު ސޮބާހު މުޙައްމަދު އިބްރާހީމް (ސޮބާ) އާއި މުޙައްމަދު ޝާހިދު (ޝާޑު) އެވެ.

ބަހްރޭނަށް ފުރުމުގެ ކުރިން "ރާއްޖެ.އެމްވީ" އަށް ދިން އިންޓަވިއުއެއްގައި ސޮބާ ބުނީ ކޮލިފައިންއަށް ތައްޔާރުވުމުގެ ގޮތުން ގާތްގަނޑަކަށް 10 ވަރަކަށް ތަމްރީނު މެޗުތައް ކުޅެ، ރަނގަޅު ނަތީޖާތަކެއްވެސް ނެރެފައިވާ ކަމަށެވެ. އެހެންކަމުން ކޮލިފައިންއާ ކުރިމަތިލާއިރު، ޓީމާ މެދު ހިތްހަމަޖެހުމެއް އެބައޮތް ކަމަށްވެސް ބުންޏެވެ. އަދި ބަހްރޭނުގައި އިތުރު ދެ މެޗެއް ކުޅުމަށް މަސައްކަތްކުރަމުން އަންނަ ކަމަށާއި، އެ މެޗުތައް ލިބެއްޖެނަމަ ޓީމުގެ ކުޅުންތެރިން ޕްރެޝަރުގައި ކުޅޭގޮތް ބަލާލެވި، ވަރަށް ބޮޑު ހިތްހަަމަޖެހުމެއް ލިބިގެންދާނެ ކަމަށްވެސް ސޮބާ ވަނީ ބުނެފައެވެ.

ކޮލިފައިންގައި ވާދަކުރާ ޒުވާން ޓީމުގެ ސްކޮޑުގައި ގައުމީ ސީނިއާ ޓީމުގައި ކުޅުނު ކުޅުންތެރިންވެސް ހިމެނެއެވެ. އޭގެ ތެރޭގައި މި ފަހަރު ސާފް ޗެމްޕިއަންޝިޕުގެ ސްކޮޑުގައި ހިމެނި ތަފާތު މޮޅު ކުޅުމެއް ދެއްކި ޑިފެންޑަރު ހައިޝަމް ހަސަން (ބިޑި) އާއި ގޯލްކީޕަރު އަލީ ނާޖިހު (ނާޖީ) ހިމެނެއެވެ. މީގެ އިތުރުން މީގެ ކުރިން ސީނިއާ ގައުމީ ޓީމަށް ކުޅުނު ބައެއް ކުޅުންތެރިންވެސް ޒުވާން ޓީމުގެ ސްކޮޑުގައި ހިމެނެއެވެ.

ސޮބާ ބުނީ ގައުމީ ޓީމުގެ ފުރަތަމަ އެގާރައިގައި ހިމެނިގެން ހައިޝަމް ކުޅުމަކީ ޒުވާން ޓީމަށް އޮތް ވަރަށް ބޮޑު ފައިދާއެއް ކަމަށެވެ. އޭގެ އިތުރުން ތިންވަނަ ގޯލްކީޕަރު ނާޖީވެސް ޒުވާން ޓީމާ ގުޅޭނެ ކަމަށާއި، މީގެ އިތުރުން ސީނިއާ ޓީމުގައި އެކި ފަހަރު މަތިން ފުރުސަތު ލިބި، ބޮޑު ޓީމާއެކު މަސައްކަތްކޮށްފައި ތިބި ކުޅުންތެރިން ޒުވާން ޓީމުގައި ހިމެނުމަކީ ޓީމަށް އޮތް އިތުރު ފައިދާއެއް ކަމަށްވެސް ސޮބާ ވަނީ ބުނެފައެވެ.

ކޮލިފައިން މެޗުތަކަށް ޒުވާން ގައުމީ ޓީމު ބަހްރޭނަށް ފުރިއިރު، އެ ޓީމު އެކުލަވާލުމަށް މިދިޔަ އޯގަސްޓް މަހުގެ ފަހުކޮޅު ޓްރަޔަލްތައް ފެށިއެވެ. އޭގެ ފަހުން ޒުވާން ގައުމީ ޓީމުން ވަނީ ޅ. އަތޮޅުގައި ކޭމްޕުކޮށް، ތަމްރީނު ހަ މެޗެއް ކުޅެފައެވެ.

މި ފަހަރުގެ ކޮލިފައިންގެ ފުރަތަމަ މެޗުގައި އޮކްޓޯބަރު މަހުގެ 27 ވަނަ ދުވަހު ރާއްޖެ ނުކުންނާނީ އިރާގާ ދެކޮޅަށެވެ. ކޮލިފައިންގެ ދެވަނަ މެޗުގައި އެ މަހުގެ 29 ވަނަ ދުވަހު ބަހްރޭނާ ދެކޮޅަށް ރާއްޖެ ނުކުންނައިރު، ފަހު މެޗުގައި 31 ވަނަ ދުވަހު ނުކުންނާނީ އަފްޣާނިސްތާނާ ދެކޮޅަށެވެ.

ކޮލިފައިންގައި 11 ގްރޫޕް ހިމެނޭއިރު، ކޮންމެ ގްރޫޕެއްގެ އެއްވަނައަށްދާ ގައުމަށް އޭއެފްސީ އޭޝިއަން ކަޕުން ފުރުސަތު ލިބޭނެއެވެ. އަދި އެ 11 ގްރޫޕުން ދެވަނައަށްދާ ގައުމުތަކުގެ ތެރެއިން އެންމެ ރަނގަޅު ނަތީޖާ ނެރޭ ހަތަރު ގައުމަކަށްވެސް މުބާރާތުން ފުރުސަތު ލިބޭނެއެވެ.