އެމެރިކާގެ މަޝްހޫރު ލަވަކިޔުންތެރިޔާ އާރިއާނާ ގްރާންޑޭގެ ޝޯވއަށް ފަހު މެންޗެސްޓަރ އެރީނާއަށް ދީފައިވާ ބޮމުގެ ހަމަލާގެ ޒިންމާ އިސްލާމިކް ސްޓޭޓް ނުވަތަ އައިއެސް އިން ނަގައިފިއެވެ.

މެންޗެސްޓަރ އެރީނާއަށް ހޯމަ ދުވަހުގެ ރޭ ދިން ހަމަލާގައި 22 މީހުން މަރުވެފައިވާކަމަށް ގްރޭޓަރ މެންޗެސްޓަރ ޕޮލިހުންވަނީ ހާމަކޮށްފައެވެ. އަދި 50 އަށް ވުރެ ގިނަ މީހުން އިތުރު ފަރުވާއަށް ހޮސްޕިޓަލްތަކަށް ގެންގޮސްފައިވާކަމަށާއި، އެރީނާ ބޭރުގައި ގިނަ ބަޔަކަށް ފަރުވާ ދިންކަމަށް ނޯތުވެސްޓް އެމްބިއުލަންސް ސަރވިސުން ބުންޏެވެ. އާރިއާނާއަކީ ޑިޒްނީ ޗެނަލުން މަޝްހޫރުވި ފަރާތަކަށް ވުމުން، ޝޯވ ބެލުމަށް ގިނަ ޅަ ކުދިން ގޮސްފައިވާ އިރު، މަރުވި އަދި އަނިޔާ ލިބުނު މީހުންތެރޭގައި ގިނަ ކުޑަ ކުދިންވެސް ހިމެނެއެވެ.

އިސްލާމިކް ސްޓޭޓުން އަންގާރަ ދުވަހު ނެރުނު ބަޔާނެއްގައިވާ ގޮތުން އެމީހުންގެ "ޚަލީފާގެ ހަނގުރާމަވެރިއަކު ވަނީ މެންޗެސްޓަރ އެރީނާ ތެރޭ ގޮވާ އެއްޗެއް ޕްލާންޓްކޮށްފަ"އެވެ. ނަމަވެސް އައިއެސްގެ ބަޔާނާ ގުޅިގެން ބައެއް ތަޖުރިބާކާރުން ބުނަނީ، ޒިންމާ ނެގުމަށް ބޭނުންކޮށްފައިވާ ބަސްތަކަށް ބަލާއިރު، އެ ހަމަލާ އައިއެސް އިން ހިތްވަރު ލިބިގެންކޮށްފައިވާ ކަމެއްކަމަށް ދޭހަވާކަމަށާއި، ސީދާ އައިއެސްގެ އަމުރުގެ ދަށުން ދިން ހަމަލާއެއްތޯ ޔަގީން ނުވާކަމަށެވެ.

އިނގިރޭސި އޮފިޝަލުންނަށް ހަވާލާދީ އެމެރިކާއިން ބުނީ، ހަމަލާ ދިންކަމަށް ބެލެވޭ ފިރިހެނަކު އައިޑެންޓިފައި ކުރެވިފައިވާކަމަށް ބުނެފައިވާއިރު، މި ކަމަމާ ގުޅިގެން 23 އަހަރުގެ ފިރިހެނަކު ހައްޔަރުކޮށްފައިވާއިރު، އިނގިރޭސިވިލާތުގެ ކަމާބެހޭ ފަރާތްތަކުން ވަނީ ހައްޔަރުކޮށްފައިވަނީ ސަލްމާން އަބޭދީ ކިޔާ މީހެއްކަން ހާމަކޮށްފައެވެ. ނަމަވެސް އެއާ ގުޅޭ އިތުރު މައުލޫމާތެއް ހާމާކޮށްފައެއް ނުވެއެވެ.

ރޭގެ ދަންވަރު ބޭއްވި ނޫސްވެރިންގެ ބައްދަލުވުމެއްގައި ގްރޭޓަރ މެންޗެސްޓަރ ޕޮލިސް ޗީފް ކޮންސްޓަބްލް އިއަން ހޮޕްކިންސް ވަނީ މި މައްސަލަ ޓެރަރިސްޓް ހަމަލާއެއް ގޮތަށް ބަލަމުންދާކަމަށް ޔަގީންކޮށްދެއްވާފައެވެ.

ހަމަލާ ދިން ވަގުތު އެތަނުގައި ތިބި ބައެއް ފަރާތްތަކުން ބުނީ ބޮން ގޮއްވާފައިވަނީ އާރިއާނާ ފަހު ލަވަ ނިންމާލާ "ޝުކުރިއްޔާ މެންޗެސްޓަރ"އޭ ބުނެ ސްޓޭޖުން ފޭބި ވަގުތެވެ. މެންޗެސްޓަރ އެރީނާއިން ބުނި ގޮތުގައި ބޮން ގޮއްވާފައިވަނީ ޝޯވ ބަލަން ދިޔަ މީހުން ނިކުންނަނިކޮށް، އެރީނާގެ ބޭރުންނެވެ.

މި ހަމަލާގައި އާރިއާނާއަށް އަނިޔާއެއް ވެފައެއް ނުވާއިރު، އޭނާވަނީ އެކަމާ ގުޅިގެން "ހިތުގައި ޖެހިއްޖެ"ކަމަށް އާރިއާނާ ޓްވިޓަރ މެދުވެރިކޮށް ބުނެފައިވެއެވެ.

"ހިތްހަލާކުވެއްޖެ. އަހަރެން ހިތުގެ އެންމެ އަޑިން، އިންތިހާއަށް މައާފަށް އެދެން. ނޭނގުން ބުނާނެ އެއްޗެސް ވެސް"، އާރިއާނާގެ ޓްވީޓްގައި ބުނެފައިވެއެވެ.