ދިވެހިންނަށް ވިސާއާ ނުލައި އިންޑިއާއަށް ދަތުރު ކުރެވޭނެ ގޮތް ހަމަޖައްސައިފިއެވެ.
ރާއްޖޭގައި ހުންނަ އިންޑިއަން ހައި ކޮމިޝަނުން ބުނީ، މިމަހުގެ 15ން ފެށިގެން ވިސާއާ ނުލައި ދިވެހިންނަށް އިންޑިއާއަށް ދަތުރުކުރެވޭނެ ކަމަށެވެ. އެގޮތުން ބޭސްފަރުވާއާއި، ވިޔަފާރި ކަންކަމުގެ އިތުރުން ފަތުރުވެރިންގެ ގޮތުގައި ވިސާއާ ނުލައި އެގައުމަށް ދެވޭނެ ކަމަށް އިންޑިއާ ހައިކޮމިޝަނުން ވަނީ ބުނެފައެވެ.
ހައި ކޮމިޝަނުން ބުނީ މި ނިންމުމާއެކު ރާއްޖެ ވެގެންދާނީ ކޮވިޑް-19ގެ ފިޔަވަޅުތަކަށް ފަހު އިންޑިއާއަށް ވިސާއާ ނުލައި ދަތުރު ކުރެވޭނެ ފުރަތަމަ ގައުމަށެވެ.
އިންޑިއާއަށް ފަތުރުވެރިން ދިއުން މެދުކެނޑިފައިވަނީ ދުނިޔޭގައި ހަލުވިކަމާއެކީ ފެތުރެމުންދާ ކޮވިޑް-19އާ ގުޅިގެން އެޅި ފިޔަވަޅުތަކާއެކު އެ ގައުމުގެ ބޯޑަރު މިދިޔަ އަހަރުގެ މާޗް މަހު ބަންދު ކުރުމުންނެވެ.
މިހާތަނަށް އިންޑިއާގެ ބޯޑަރު ބަންދުކޮށްފައި އޮތުމުން ދިވެހިންނަށް ވިސާދިނުމަށް އިންޑިއާ ސަރުކާރުން ހަމަޖައްސާފައިވަނީ ޚާއްސަ އުސޫލެކެވެ. އަދި ރައްޔިތުންނަށް މިހާރު ކުރިމަތިވާ އުނދަގޫތަކަށް ހައްލު ހޯދުމަށް މެދުކެނޑުމެއްނެތި އިންޑިއާ ސަރުކާރާ ވާހަކަ ދައްކަވަމުންދާ ކަމަށާއި, ވަރަށް އަވަހަށް މިކަމަށް ހައްލު ލިބިގެންދާނެ ކަމުގެ ޔަގީންކަން އެބައޮތް ކަމަށް ޢަބްދުﷲ ޝާހިދު ހޮނިހިރު ދުވަހުގެ ރޭ ވިދާޅުވެފައިވެއެވެ.
އިންޑިއާއަށް ބޭސްފަރުވާއަށް ދާން ބޭނުންވާ ގިނަ ދިވެހިންނަށް ވިސާ ލިބުމުގައި ދަތިތައް ކުރިމަތިވެ، ކިޔޫގައި ގިނައިރުތަކެއް ވަންދެން ތިބެންޖެހެއެވެ. އެއާއެކު އެމްބަސީދޮށުގައި މީގެ ކުރިން ބައެއް މީހުން ކަންބޮޑުވުންފާޅުކޮށް އަޑު ގަދަކޮށްފައި ވެސް ވެއެވެ.
