ސިޔާސީގޮތުން މަންފާއެއް ހޯދުމުގެ ބޭނުމުގައި ފެނަކައިން ވަކި ގެއަކުން ކަރަންޓު ނުކަނޑާނެކަމަށާއި ކަންކުރާނީ އޮންނަ އުސޫލުގެ ތެރެއިންކަމަށް ފެނަކަ ކޯޕަރޭޝަންގެ މެނޭޖިން ޑިރެކްޓަރ އަޙުމަދު ސަޢީދު މުޙައްމަދު ވިދާޅުވެއްޖެއެވެ.
ލ. މާވަށު "އާފަރު" ނަމަކަށް ކިޔާ ގޯތިން ކަރަންޓު ޚިދުމަތް ކަނޑާލި މައްސަލާގައި ތަފާތު އެކި ގޮތްގޮތަށް އަންނަނީ ވާހަކަތައް ދައްކަމުންނެވެ. ފެނަކައިން ކަރަންޓް ކަނޑާލި މިގެއަކީ ލ.މާވަށު ކައުންސިލްގެ ރައީސްގެ ގެއެވެ. މިކަމުގައި ސިޔާސީ ގޮތުން ތަފާތު އެކި ވާހަކަތައް ދެކެވެމުން އަންނާތީ ރާއްޖެ ޓީވީގެ "ފަލަސުރުޚީ" ޕްރޮގްރާމްގައި އެކަމާއި ގުޅޭގޮތުން ކުރި ސުވާލަށް ޖަވާބު ދެއްވަމުން ސައީދު ވިދާޅުވީ އެކަމުގައި ތަފާތު އެކި ގޮތްގޮތަށް ވާހަކަތައް ދެކެވެމުންދާކަމަށެވެ. ނަމަވެސް ހަގީގަތަކީ ފެނަކައިން އަމަލުކުރަމުން އަންނަނީ 2014 ވަނަ އަހަރު އެކުލަވާލާ މޯލްޑިވްސް އެނަރޖީ އޮތޯރިޓީން ފާސްކޮށްފައި އޮންނަ ކަރަންޓް ދިނުމާއި ބެހޭ ގަވައިދުގެ ދަށުންކަމަށެވެ.
އެގެއަކީ އެގަވާއިދުގެ ދެވަނަ މައްދާގެ އެކެއްގައި ބަޔާންކޮށްފައިވާ ކަރަންޓު ގުޅާދިނުމުގެ ގަވާއިދާ މުޅިން ޚިލާފަށް ކަރަންޓް ބޭނުންކުރަމުންދާ ތަނެއްކަމަށެވެ. އަދި ގުޅައިގެން ކަރަންޓް ބޭނުންކުރަނީ ގަވާއިދާ ޚިލާފަށްކަމަށްވާއިރު އެބޭނުންކުރަމުންދާ ކަރަންޓަށް ފައިސާވެސް އެގެއިން ނުދައްކާކަމަށް ސައީދު ވިދާޅުވިއެވެ. ތަފާތު އެކި މަރުހަލާގެ ދަށުން ފައިސާ ދެއްކުމަށް އަންގާ އެކަން ނުކުރުމުން އެންމެފަހުން ކަރަންޓް ކަނޑާލަންޖެހުނީކަމަށް ސައީދު ވިދާޅުވިއެވެ.
އަޅުގަނޑު އަޑުއެހިން ކޭބަލް ޓީވީވެސް ދެމުންދަނީ އެފަރާތުގެ ބެލުމުގެ ދަށުންކަމަށްވީތީ އެދުވަހުގެ ވަކި ޕްރޮގްރާމެއް ބަލަން އުޅުނީތީ ގަސްތުގައި ކުރިކަމެއްކަމެއް. ހަގީގަތަކީ އެއީ ވަރަށް ބޮޑު އޮޅުވާލުމެއް. ވަރަށް ބޮޑު ދޮގެއް އެއީ. ފެނަކައަކުން އެބާވަތުގެ އެއްވެސް ކަމެއް ސިޔާސީ މަންފާއެއް ހާސިލްކުރުމަށް ނުކުރާނެ. ދެން އަޅުގަނޑަށް ފެންނަ ފެނުމުގައި ނޭވާ ހޮޅިއަށް އެޅިފައި އޮންނަ ސަރުކާރުތަކުގައި ބޭނުންކުރާ އުކުޅެއް އެއީ. ބިރުދައްކައިގެން ތަންތަނުން ކަރަންޓު ކަނޑާލުމާއި މާވަށުގައި ހުންނަ މުވައްޒަފު މީހާ ހއ ތުރާކުނަށް ފޮނުވާލުމާއި. އެހެންވީމާ މިސަރުކާރަކީ ފުދިފައި އޮތް ސަރުކާރެއް. މިސަރުކާރަކުން ނުކުރާނެ އެބާވަތުގެ ދަށު ދަރަޖައިގެ ކަމެއް.އަޙުމަދު ސަޢީދު މުޙައްމަދު / ފެނަކަ އެމްޑީ
ސައީދު ވިދާޅުވީ ޚިދުމަތެއް ބޭނުންކުރުމަށްފަހު އެޚިދުމަތަކަށް ކަނޑައަޅާފައި އޮންނަ އުޖޫރަ ދޭންޖެހޭކަމަށެވެ. އެއުޖޫރަ ނުދައްކައިފިނަމަ އޮންނަ އުސޫލުގެ ތެރެއިން އެއީ ކޮންމެ މީހެއްގެ ގެއެއް ކަމުގައިވީނަމަވެސް ކަރަންޓް ކަނޑާނެކަމަށް ސައީދު ވިދާޅުވިއެވެ. އެއީ ވަކި މީހަކަށް ބަލައިގެން ކުރާ ކަމެއް ނޫންކަމަށާއި ނަމަވެސް ފެނަކައިގެ ވިސްނުމަކީ ކޮންމެހެން ގޭގެއިން ކަރަންޓް ކަނޑާލުން ނޫންކަމަށް ސައީދު ވިދާޅުވިއެވެ.
އެންމެ ފުރަތަމަ 7 ދުވަހުގެ މުއްދަތެއް ބިލްތަކަށް ފައިސާ ދެއްކުމަށް ދިންކަމަށް ސައީދު ވިދާޅުވިއެވެ.
އެއަށްފަހު ކަރަންޓު ކަނޑާލީމާ ކަރަންޓު ބިލަށް ފައިސާ ނުދައްކާ ކޯޓަށް ވަޑައިގަތީމާ ކޯޓުންވެސް އެމައްސަލަ އެއީ ބެލޭނެ މައްސަލައެއް ނޫންކަމަށް ހުކުމް ކުރީ. އެހެންވީމާ ގާނުނީ ގޮތުން އެއްވެސް ހާލެއްގައި އެފަރާތުން އެއީ ކަރަންޓު ނުކެނޑޭނެކަމަށް ދެއްކި ހުއްޖަތް އެއީ ގަބޫލުކުރެވޭނެ ކަމެއް ނޫންކަން އެއޮތީ ސާބިތުވެފައި. ފެނަކައަށް ދައްކަންޖެހޭ ލާރި ބަރަަރާބަށް ނުދައްކާނަމަ ހަމަ ކަނޑާނެ ހުރިހާ ގެއަކުންވެސް ކަނޑަންޖެހޭ ހާލަތަށް އައިމާ. ވިސްނުމަކީ ކަރަންޓް ކަނޑާލުމެއް ނޫން.އަޙުމަދު ސަޢީދު މުޙައްމަދު / ފެނަކަ އެމްޑީ
މިމައްސަލާގައި ފެނަކައިން މީގެކުރިން ނެރެފައިވާ ނޫސްބަޔާނެއްގައި ބުނެފައިވަނީ ކަރަންޓުގެ ޚިދުމަތް ފޯރުކޮށްދިނުމަށް ކަނޑައަޅާފައިވާ ގަވާއިދުތަކާއި އުސޫލުތަކާ ޚިލާފުވެ، ހޯދާފައިވާ ކަރަންޓުގެ ޚިދުމަތްތަކަށް ދައްކަންޖެހޭ ފައިސާ ދެއްކުމަށް ތަކުރާރުކޮށް ދެވުނު ފުރުސަތުތަކުގައި ވެސް ފައިސާ ދައްކާފައިނުވާ ކަމަށެވެ. ދެވުނު އެންމެ ފަހު ފުރުސަތު 03 އޮކްޓޯބަރ 2021 ގެ ނިޔަލަށް ހަމަވެފައިވާތީ، އާންމުކޮށް އަމަލުކުރުމަށް ކަނޑައަޅާފައިވާ އުސޫލުގެ ތެރެއިން، އަހުމަދު މޫސާގެ ނަމުގައި ރަޖިސްޓްރީ ކުރެވިފައިވާ "އާފަރު" ކިޔާ ގޯތީގައި ހުރި އިމާރާތްތަކަށް ދެވިފައިވާ ކަރަންޓުގެ ޚިދުމަތް 04 އޮކްޓޯބަރ 2021 ވަނަ ދުވަހު ވަގުތީގޮތުން ކަނޑާލާފައިވާ ކަމަށެވެ.
ސައީދު ވިދާޅުވީ މިސަރުކާރުން ސިޔާސީ މަގްސަދެއް ހާސިލުކުރުމަށް ގޭގެއިން ކަރަންޓް ނުކަނޑާނެކަމަށާއި މުވައްޒަފުން ވަޒީފާ އަދާކުރަމުން އަންނަ ތަންވެސް ބަދަލުނުކުރާނެކަމަށެވެ.
ކުރީގެ ސަރުކާރުން ސިޔާސީ މަގުސަދެއް ހާސިލްކުރުމަށް މީހުން ވަޒީފާ އަދާކުރަމުންދިޔަ ރަށާއި މާދުރު ރަށްރަށަށް ވަޒީފާ ބަދަލުކުރުން ފަދަ ކަންކަމާއި ވަޒީފާއިން ކަނޑާލުންފަދަ ކަންކަމުގެ ސަބަބުން ބަދަލު ހޯދުމަށް ޓްރައިބިޔުނަލްގައި ހުރި މައްސަލަތަކަށް މިލިއަނުން ދައްކަންޖެހޭ ކަމަށް ސައީދު ވިދާޅުވިއެވެ.
