މާލޭގައި އެންމެ ފުރަތަމަ ބައިސްކަލު ހެދުމުގެ މަސައްކަތް ފެށި ހަސަން ގާސިމް (ހަސަންފުޅު) ނިޔާވެއްޖެއެވެ.
ކ. މާލެ / ވޮންޑަރލޭންޑް ހަސަންފުޅު ނިޔާވީ ރޭގެ ވަގުތެއްގައެވެ. އޭނާ ނިޔާވި އިރު އުމުރަކީ 76 އަހަރެވެ. އޭނާގެ ޖަނާޒާ މިއަދު މެންދުރު ނަމާދަށްފަހު އާސަހަރާ މިސްކިތުގައި އޮންނާނެއެވެ.
މުޅި މާލެއަށް ނަން މަޝްހޫރު ހަސަންފުޅަކީ މާލޭގައި ބައިސްކަލު މަރާމާތުކުރުމުގެ މަސައްކަތް އެންމެ ފުރަތަމަ ފެށި މީހާއެވެ. އެއީ މީގެ 40 ވަރަކަށް އަހަރު ކުރިންނެވެ. އެއަށްފަހު ސައިކަލު މަރާމާތުކުރުމުގެ މަސައްކަތްވެސް ހަސަންފުޅު ފެށިއެވެ. މިއަދާ ހަމައަށް އައިއިރު ހަސަންފުޅުގެ އަމިއްލަ ގަރާޖެއް މާލެގައި އެބަހުއްޓެވެ.
ހަސަންފުޅު ގަރާޖަށް ޚިދުމަތް ހޯދަންދާ ގިނަ މީހުންނަށް ގިނަ ކަންކަން އޭނާ ކޮށްދެނީ އެމީހުންގެ އަތުން އެއްވެސް އަގެއް ނުނަގައެވެ. އެގޮތުން ފުރޮޅަށް ވައި ޖަހައިދިނުމާއި، ލޯގަނޑު ބަދަލުކޮށްދިނުން ފަދަ ކުދިކުދި ކަންކަމަށް އޭނާ އެއްވެސް އަގެއް ނުނަގައެވެ. އަދި ގަރާޖުން ޚިދުމަތް ދޭއިރު އޭނާ ބަހައްޓާ ގާތްކަމުގެ ސަބަބުން، ހަސަންފުޅު ގަރާޖުން ޚިދުމަތް ހޯދާ ގިނަ މީހުން އިތުރު އެހެން ތަނަކަށް ޚިދުމަތް ހޯދާކަށް ނުދެއެވެ.
ހަސަންފުޅު ނިޔާވި ޚަބަރާއެކު ގިނަ ބަޔަކަށް ވަނީ ފުން ހިތާމައެއް ގެނުވާފައެވެ. ވަކިން ޚާއްސަކޮށް ހަސަންފުޅު ގަރާޖުން ސައިކަލު މަރާމާތު ކުރުމުގެ ޚިދުމަތް ހޯދަމުންދާ ގިނަ ބަޔަކު ވަނީ ހިތާމައެއްގެ ތެރޭގައެވެ.
