ކޮވިޑް-19ން ދިފާއުވުމަށް އިތުރު 812 މީހުން ވެކްސިން ފުރިހަމަކޮށްފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ)އިން ބުނެފިއެވެ.

އެޗްޕީއޭއިން ބުނީ އަންގާރަ ދުވަހު އިތުރު 812 މީހުން ވެކްސިން ފުރިހަމަ ކޮށްފައިވާ ކަމަށެވެ. އެއީ މާލެ ސަރަހައްދުން 371 މީހުންނާއި އަތޮޅުތެރެއިން 441 މީހުންނެވެ. އެއާއެކު ވެކްސިން ފުރިހަމަ ކުރި މީހުންގެ ޖުމްލަ އަދަދު ވަނީ 343،149ށް އަރާފައެވެ.

މީގެ އިތުރުން އަންގާރަ ދުވަހު އިތުރު 92 މީހުން ވެކްސިންގެ ފުރަތަމަ ޑޯޒު ޖަހާފައިވެއެވެ. އެއީ މާލެ ސަރަހައްދުން 58 މީހުންނާއި، އަތޮޅުތަކުން 34 މީހުންނެވެ. އެއާއެކު ވެކްސިންގެ ފުރަތަމަ ޑޯޒު ޖެހި މީހުން ޖުމްލަ އަދަދު 392،773ށް އަރާފައިވާ ކަމަށް ތަފާސްހިސާބުތަކުން ދައްކައެވެ.

ކޮވިޑް-19 ކޮންޓްރޯލް ކުރުމުގެ ގޮތުން ޚާއްސަ އިސްކަމެއް ދީގެން ވެކްސިނޭޝަން ޕްރޮގްރާމް ކުރިއަށް ގެންދެއެވެ. މާލޭގެ އިތުރުން އަތޮޅުތެރޭގައި ވެކްސިން ދެމުންދާއިރު، ވެކްސިނަށް ގިނަ ބަޔަކު ހޭލުންތެރިވެފައިވާ ކަމަށް ކަމާބެހޭ ފަރާތްތަކުން ވިދާޅުވެއެވެ.

ވެކްސިނޭޝަން ޕްރޮގްރާމް ކުރިއަށްދާ ގޮތާ ގުޅޭގޮތުން ދާދިފަހުން ޓެކްނިކަލް އެޑްވައިޒަރީ ގްރޫޕުގެ މެމްބަރު ޑރ. ނަޒްލާ މުސްތަފާ ވިދާޅުވެފައިވަނީ ސެޕްޓެމްބަރު މަހުގެ 27ގެ ނިޔަލަށް މުޅި އާބާދީގެ ގާތްގަނޑަކަށް 71 އިންސައްތަ މީހުން ވެކްސިންގެ ފުރަތަމަ ޑޯޒު ޖަހާފައިވާ ކަމަށާއި، ގާތްގަނޑަކަށް 61 އިންސައްތަ މީހުން ދެޑޯޒު ފުރިހަމަ ކޮށްފައިވާ ކަމަށެވެ. އާބާދީގައި ނިސްބަތުން ކުޑަކުދިން ގިނަކަން ފާހަގަކުރައްވައި ޑރ. ނަޒްލާ ވިދާޅުވީ ވެކްސިންގެ ތަފާސްހިސާބުތައް ރަނގަޅު ކަމަށެވެ.