ތެހެރާނުގެ އެހީއާ ނުލައި މެދުއިރުމައްޗަށް ސުލްހަ ނުގެނެވޭނެ ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕްއަށް އީރާނުގެ ރައީސް ހަސަން ރޫހާނީ ރައްދު ދެއްވައިފިއެވެ.

ރޫހާނީ މިހެން ވިދާޅުވީ ވެރިކަމާ ހަވާލުވެ ވަޑައިގެން ގައުމުން ބޭއްރަށް ކުރައްވާ ފުރަތަމަ ދަތުރުފުޅުގައި މެދުއިރު މައްޗަށް ވަޑައިގެން މިހާތަނަށް ވަޑައިގެންނެވި ކޮންމެ ގައުމެއްގައި ވާހަކަފުޅުދައްކަވަމުން ވެސް އީރާނަށް ރައީސް ޓްރަމްޕް ފާޑުވިދާޅުވަމުން ގެންދަވާތީއެވެ.

"ކާކަށްތޯ ބުނެވޭނީ ސަރަހައްދީ ހަމަޖެހުން އިއާދަ ކުރެވޭނީ އިރާނާ ނުލާ ކަމަށް؟" ކާކަށްތޯ ބުނެވޭނީ އީރާނާ ނުލައި މުޅި ސަރަހައްދު އޮންނާނީ ހަމަޖެހިގެން ކަމަށް؟" ރޫހާނީ ވިދާޅުވިއެވެ.

މީގެ އިތުރުން ރޫހާނީ ވަނީ މިދިޔަ ހަފްތާގައި ބޭއްވި އިންތިޚާބުން ދައްކުވައިދެނީ އިރާނުގެ ރައްޔިތުން ޑެމޮކްރަސީ އިތުރަށް ބޭނުންވާ މިންވަރުކަމާއި އަދި ދުނިޔެއާ ލާމެހުމަށް ބޭނުންވާ މިންވަރުކަމަށެވެ. ރޫހާނީ ވަނީ އެކަމަށްޓަކައި އިގްތިސާދީ ކުރިއެރުން ބޭނުންވާ ކަމަށް ވިދާޅުވެފައެވެ.

މެއި މަހުގެ 21 ވަނަ ދުވަހު ސައުދީގައި ބޭއްވި އަރަބް އިސްލާމިކް އެމެރިކަން ސަމިޓްގައި ވާހަކަދައްކަވަމުން ވެސް ޓްރަމްޕް ވަނީ އީރާނަށް ފާޑުވިދާޅުވެފައެވެ. މީގެ އިތުރުން ހޯމަ ދުވަހު އިސްރާއީލަށް ވަޑައިގެން އިސްރާއީލުގެ ބޮޑުވަޒީރު ބެންޖަމިން ނަތަންޔާހޫއާ އެކު ބޭއްވެވި ނޫސްކޮންފަރެންސްގައި ވެސް ވަނީ އީރާނަކީ ސަރަހައްދުގެ ހަމަޖެހުމަށް ހުރަސްއަޅާ ގައުމެއް ކަމަށް ވިދާޅުވެ ވާހަކަދައްކަވާފައެވެ.

ވެރިކަމުގައި ރައީސް ޓްރަމްޕް ކުރެއްވި ފުރަތަމަ ދަތުރުފުޅު ސައުދީއަށް ކުރައްވާފައިވާއިރު ސައުދީއަކީ އެމެރިކާގެ އަތުން އެތައް ބިލިއަން ޑޮލަރެއްގެ ހަތިޔާރު ގަންނަ ގައުމެކެވެ. ޓްރަމްގެ މި ދަތުރުފުޅުގައި ވެސް ސައުދީއާއެކު 110 ބިލިއަން އެމެރިކާ ޑޮލަރުގެ ހަތިޔާރު ވިއްކުމުގެ އެއްބަސްވުމެއްގައި ސޮއިކުރެވިފައެވެ.

މީގެ އިތުރުން ސައުދީއަކީ ސަރަހައްދުގައި އީރާނުގެ އެންމެ ވާދަވެރި ގައުމެވެ.

މެދު މިނުގެ އުސޫލުތަކަށް ތާއީދުކުރައްވާ އަދި ރިފޯމިސްޓެއްގެ ގޮތުގައި ފެނިފައިވާ ރައީސް ރޫހާނީ ވަނީ ހުކުރު ދުވަހު ބޭއްވި އިންތިޚާބު 57 އިންސައްތަ ވޯޓް ހޯއްދަވައި ބޮޑުތަފާތަކުން އިންޚާބު ކާމިޔާބުކުރައްވައި ދެވަނަ ދައުރަކަށް ހޮވިވަޑައިގެންފައެވެ.