ސާފް ޗެމްޕިއަންޝިޕަށް ތައްޔާރުވުމުގެ ގޮތުން ގަތަރުގައި ކުރިއަށްގެންދިޔަ ކޭމްޕުގެ ބޭނުން އެންމެ ރަނގަޅަށް ހިފިއްޖެ ކަމަށް ގަބޫލުކުރާ ކަމަށް ގައުމީ ފުޓްބޯޅަ ޓީމުގެ ކޯޗު އަލީ ސުޒޭން ބުނެފިއެވެ.
މި އަހަރުގެ ސާފް ޗެމްޕިއަންޝިޕް ރާއްޖޭގައި ބޭއްވުމަށް ތާވަލުކޮށްފައިވަނީ އަންނަ އޮކްޓޯބަރު މަހުގެ އެއްވަނަ ދުވަހުން ފެށިގެން 16 ވަނަ ދުވަހުގެ ނިޔަލަށެވެ. އެ މުބާރާތަށް ތައްޔާރުވުމުގެ ގޮތުން ގަތަރުގައި ގައުމީ ޓީމުން ކޭމްޕުކުރީ މި މަހުގެ 10 ވަނަ ދުވަހެވެ. އަދި ކޭމްޕް ފުރިހަމަކުރުމަށްފަހު އަންނަ ހޯމަ ދުވަހުގެ ހެނދުނު ގައުމީ ޓީމު އެނބުރި މާލެ އަންނާނެއެވެ.
މި ކޭމްޕުގައި ރާއްޖޭން ވަނީ އެކުވެރިކަމުގެ ދެ މެޗެއް ކުޅެފައެވެ. އެގޮތުން ފުރަތަމަ މެޗުގައި މިދިޔަ ހަފުތާގެ އަންގާރަ ދުވަހުގެރޭ ގަތަރުގެ ދެވަނަ ޑިވިޝަނުގެ ލުސައިލް އެސްސީ އަތުން ރާއްޖެ މޮޅުވީ 4-3 ގެ ނަތީޖާއަކުންނެވެ. އަދި ހޮނިހިރު ދުވަހުގެރޭ ކުޅުނު ދެވަނަ މެޗުން ވަނީ ގަތަރުގެ އާމީ ނެޝަނަލް ޓީމާ ވާދަކޮށް 1-1 ގެ ނަތީޖާއަކުން އެއްވަރުވެފައެވެ.
ހޮނިހިރު ދުވަހުގެރޭ ކުޅުނު މެޗަށްފަހު ދިން އިންޓަވިއުއެއްގައި ސުޒޭން ބުނީ އެ މެޗުގެ ނަތީޖާއާ ދޭތެރޭ ހިތްހަމަ ނުޖެހޭ ކަމަށާއި، އެކަމަކު މީގެ ކުރިން ލުސައިލާ ދެކޮޅަށް ކުޅުނު މެޗާ އަޅާބަލާއިރު މި މެޗުގައި ބައިވަރު ރަނގަޅު ކަންތައްތަކެއް ފެނިގެންދިޔަ ކަމަށެވެ. އެގޮތުން ގައުމީ ޓީމު ބޮޑަށް ޕާސްކޮށްގެން، އެޓޭކިން ހާފުގައި ރަނގަޅަށް ކުޅުނު ކަމަށާއި، އަދި ލަނޑު ޖަހާނެ ރަނގަޅު ފުރުސަތުތަކެއްވެސް ތަނަވަސްކުރި ކަމަށް ސުޒޭން ބުންޏެވެ.
އަރަން ތިބި ކުޅުންތެރިންގެ ފަރާތުން ޕޮޒިޓިވް ކަންތައްތަކެއް ފެނުން އެއީ ވަރަށް ބޮޑު ހިތްހަމަޖެހުމެއް. ދެން ފުރަތަަމަ އެގާރައިގައިވެސް އެންމެ ޕޮޒިޓިވްކޮށް ފެނުނު އެއް ކަމަކީ ޑިފެންސް ހަމަ ދެ ސެންޓްރަލް ޑިފެންޑަރުން މީން ދުވަހަކު ނުކުޅޭހާ ސޭފުކޮށް ގާތްގަނޑަކަށް މުޅި މެޗު ކުޅެ އެ ނިންމާލީ.ގައުމީ ޓީމުގެ ކޯޗު އަލީ ސުޒޭން
ސުޒޭން ބުނީ ސުޒޭން ބުނީ މި ފަހަރުގެ މުބާރާތަށް ތައްޔާރުވާން ގަތަރު ކޭމްޕުގައި މި ލިބުނު ފުރުސަތުގެ ބޭނުން ވަރަށް ރަނގަޅަށް ކުރެވިއްޖެކަމުގެ އިހުސާސް ހޮނިހިރު ދުވަހުގެރޭ ކުޅުނު މެޗުގައި ކުރެވުނު ކަމަށެވެ. އަދި ދެން ކުރަން ޖެހިފައި އޮތީ މެންޓަލީ ކުޅުންތެރިން މުބާރާތަށް ތައްޔާރުކުރުން ކަމަށާއި، އެކަން ކުރެވޭނީ ސަޕޯޓަރުންގެ އެއްބާރުލުމާ އެކުގައި ކަމަށްވެސް ވަނީ ބުނެފައެވެ.
މީގަ މުބާރާތަށް ތައްޔާރުވާން މި ލިބުނު ފުރުސަތުގެ ބޭނުން ރަނގަޅަށް ކުރެވިއްޖެކަމުގެ އިހުސާސް ހަމަގައިމުވެސް މިރޭގެ މެޗާއެކު ކުރެއްވިއްޖެ. ދެން ހުރީ ޓީމު ހަމަ މެންޓަލީ މުބާރާތަށް ތައްޔާރުކޮށްލުމުގައި ހުރި ކަންތައްތައް.ގައުމީ ޓީމުގެ ކޯޗު އަލީ ސުޒޭން
މި ފަހަރުގެ ސާފް ޗެމްޕިއަންޝިޕަށް ތައްޔާރުވާން ގައުމީ ޓީމުން ގަތަރުގައި ކޭމްޕުކުރިއިރު، ރާއްޖޭން 2018 ވަނަ އަހަރުގެ ސާފް ޗެމްޕިއަންޝިޕަށްވެސް ތައްޔާރުވީ ގަތަރުގައި ކޭމްޕުކޮށްގެންނެވެ. އަންނަ އޮކްޓޯބަރު މަހު ރާއްޖޭގައި ސާފް ޗެމްޕިއަންޝިޕް ބާއްވާއިރު، މި ފަހަރުގެ މުބާރާތް ކުރިއަށްދާނީ ފަސް ގައުމުގެ މެދުގައި ލީގު އުސޫލުން ކުޅުމަށްފަހު، އެންމެ ގަދަ ދެ ޓީމު ފައިނަލަށް ދާ ގޮތަށެވެ.
ސާފް ޗެމްޕިއަންޝިޕުގެ ފުރަތަމަ މެޗުގައި އޮކްޓޯބަރު މަހުގެ އެއްވަނަ ދުވަހުގެރޭ ރާއްޖެ ނުކުންނާނީ ނޭޕާލާ ދެކޮޅަށެވެ. ދެވަނަ މެޗުގައި އޮކްޓޯބަރު މަހުގެ ހަތްވަނަ ދުވަހުގެރޭ ބަންގްލަދޭޝްއާ ދެކޮޅަށް ރާއްޖެ ނުކުންނައިރު، ތިންވަނަ މެޗުގައި އެ މަހުގެ 10 ވަނަ ދުވަހުގެ ހަވީރު ރާއްޖެ ނުކުންނާނީ ސްރީ ލަންކާއާ ދެކޮޅަށެވެ. އަދި ފަހު މެޗުގައި އޮކްޓޯބަރު މަހުގެ 13 ވަނަ ދުވަހުގެރޭ ރާއްޖެ ނުކުންނާނީ ވާދަވެރި އިންޑިއާއާ ދެކޮޅަށެވެ.
