މޭ މަހުގެ 24 ވަނަ ދުވަހު ނެދަލޭންޑްސްގެ އަޔެކްސް އާ ދެކޮޅަށް އިނގިރޭސި ކުލަބު މެންޗެސްޓަރ ޔުނައިޓެޑް ކުޅޭ މެޗަށް ތައްޔާރު ކަމުގެ އިޝާރާތެއް ޔުނައިޓެޑް ތަރި ޒަލަޓަން އިބްރަހިމޮވިޗް ދީފިއެވެ.
ޔޫރޮޕާ ލީގުގައި އެންޑަލެކްޓް އަތުން މެންޗެސްޓާ ޔުނައިޓެޑް މޮޅުވި މެޗުގައި އިބްރަހަމޮވިޗްގެ ކަކުލަށް ލިބުނު އަނިޔާއަކާއި ގުޅިގެން ކުޅުމާއި ދުރަށް ދިޔުމަށް ވަނީ މަޖްބޫރުވެފައެވެ. އެގޮތުން އޭނާގެ ކަކޫ ނުއަތަށް ލެނބި، ލިގަމެންޓަށް ވަނީ ގެއްލުން ލިބިފަ އެވެ.
އަނިޔާ ރަނގަޅުވުމަށްޓަކައި އިބްރަހިމޮވިޗް ވަނީ އެމެރިކާއަށް ގޮސް ކަކުލުގެ އޮޕަރޭޝަނެއްވެސް ކޮށްފައެވެ. އޣެ ފަހުން އޭނާގެ އޭޖެންޓް ރައިއޯލާ ބުނީ އިބްރަހަމޮވިޗްއަށް ލިބުނު އަނިޔާއަކީ ކެރިއަރު އެއްކޮށް ނިންމާލަން ޖެހޭވަރުގެ އަނިޔާއެއް ނޫން ކަމަށެވެ.
އިބްރަހިމޮވިޗް ޔޫރޮޕާ ފައިނަލަށް ތައްޔާރުކަމުގެ އިޝާރާތެއް ދީފައިވަނީ އޭނާގެ އިންސްޓަގްރާމްގައި "ފައިނަލަށް ތައްޔާރު" މިގޮތަށް ލިޔެ ކޮށްފައިވާ ޕޯސްޓެއްގައެވެ.
އެ ވީޑިއޯގައި ފެންނަނީ އިބްރަހިމޮވިޗް ޔުނައިޓެޑް ޓްރެއިނިންގެ ޖާޒީގައި ސްވިމިންގ ޕޫލެއްގެ ތެރޭގައި ހިނގަނިކޮށެވެ.
އިބްރަހަމޮވިޗްގެ ކަކުލަށް ލިބުނު އަނިޔާ އޮޕަރޭޝަނަށްފަހު މުޅިން ރަނގަޅުވާނެ ކަމުގެ ޔަގީންކަން ލިބުމުގެ އިތުރުން އަވަސް މިނެއްގައި އެކަމުން އަރައިގަނެވޭނެ ކަމަށް ވަނީ ބެލެވިފައެވެ.
އިބްރަހިމޮވިޗް އޭނާ މެޗަށް ތައްޔާރު ކަމަށް ބުނި ނަމަވެސް ޔުނައިޓާއި އެޓީމުގެ ކޯޗު އެއްޗެސް ބުނެފައެއް ނުވެއެވެ.
އިބްރަހިމޮވިޗް އާ ގުޅޭ ގޮތުން ޔުނައިޓެޑްގެ ކޯޗު މޮރީނިއޯ ހަމައެކަނި ބުނެފައިވަނީ "ޓީމާއެކު މެޗު ބަލާލަން އިބްރަހިމޮވިޗް ސްޓޮކޮލްމަށް ދާނެ" ކަމަށެވެ.
މިސީޒަނުގައި ޔުނައިޓެޑާ އިބްރަހިމޮވިޗް ގުޅުނީ އެއް އަހަރު ދުވަހުގެ އެއްބަސްވުމެއްގެ ދަށުންނެވެ. މިސީޒަން ނިމުމުން އެ އެގްރީމަންޓް ހަމަވާއިރު، މުއްދަތު އިތުރު ކުރުމާ ގުޅޭގޮތުން އަދި ވަކިގޮތެއް ނުނިންމައެވެ.
ފްރާންސްގެ ޕީއެސްޖީން މިދިޔަ އަހަރު ޔުނައިޓެޑަށް ބަދަލުވުމަށްފަހު އިބްރަހަމޮވިޗް ވަނީ އެޓީމަށް މިހާތަނަށް 28 ގޯލު ކާމިޔާބުކޮށްދީފައެވެ.