ސްޕެނިޝް ލީގުގައި ބުރާސްފަތި ދުވަހުގެރޭ ކަޑިޒް އާއި ބާސެލޯނާ އެއްވަރުވި މެޗުގެ ފަހު ވަގުތު ދެއްކި ރަތް ކާޑާ ގުޅިގެން ބާސާގެ ކޯޗު ނެދަލެންޑްސްގެ ރޮނާލްޑް ކޫމަނަށް ދެ މެޗުގެ ސަސްޕެންޝަނެއް އަތުވެއްޖެއެވެ.

ކަޑިޒްގެ ދަނޑުގައި ކުޅުނު މެޗު އެއްވަރުވީ ދެ ޓީމުން ކުރެ ޓީމަކަށް ލަނޑެއް ނުޖެހިއެވެ.

އެ މެޗުގެ ފަހު ވަގުތު ބާސާގެ ކޯޗު ކޫމަނަށް ރަތް ކާޑެއް ދެއްކީ ރެފުރީގެ ނިންމުންތަކާ ދެކޮޅު ހަދާ ވާހަކަ ދެއްކުމުންނެވެ. އެގޮތުން އެންމެ ބޮޑަށް ކޫމަން ދެކޮޅު ހެދި އެއް ކަމަކީ އެ މެޗުގެ 65 ވަނަ މިނެޓުގައި އެ ޓީމުގެ ފްރެންކީ ޑި ޔޮންއަށް ދެވަނަ ރީނދޫ ކާޑާއެކު ރަތް ކާޑެއް ދެއްކުމުންނެވެ.

އެއާއެކު ސްޕެނިޝް ފުޓްބޯޅަ ފެޑެރޭޝަނުން ވަނީ ކޫމަންގެ މައްސަލަ ބެލުމަށްފަހު އޭނާ ދެ މެޗަށް ސަސްޕެންޑުކުރަން ނިންމާފައެވެ. އެހެންކަމުން ލީގުގައި އާދީއްތަ ދުވަހުގެރޭ ލެވާންޓޭއާ ދެކޮޅަށް ބާސާ ކުޅޭ މެޗާއި، އަންނަ ހަފުތާގައި އެންމެ ފަހުގެ ޗެމްޕިއަން އެތުލެޓިކޯ މެޑްރިޑާ ދެކޮޅަށް ބާސާ ކުޅޭ މެޗުގައިވެސް ކޫމަންއަށް ބެންޗުގައި ނުހުރެވޭނެއެވެ.

ލީގުގައި ބުރާސްފަތި ދުވަހުގެރޭ ކަޑިޒްއާ ދެކޮޅަށް ކުޅުނު މެޗުން ބާސާ އެއްވަރުވިއިރު، އެންމެ ފަހުން ކުޅުނު ތިން މެޗުންވެސް ބާސާއަށް މޮޅެއް ލިބިފައެއް ނުވެއެވެ. އެއާއެކު އެ ޓީމު އޮތީ ތާވަލުގެ ހަތްވަނައިގައި ކުޅުނު ފަސް މެޗުން ލިބުނު ނުވަ ޕޮއިންޓާއެކުއެވެ.

މި ފަހުން ބާސާގެ ކުޅުން ވަރަށް ބޮޑަށް ދަށްވެފައިވާއިރު، އެ ޓީމުގެ ކޯޗުގެ މަގާމުގައި ހުރި ކޫމަންގެ މުސްތަގުބަލާ މެދު ވަނީ ސުވާލު އުފެދިފައެވެ. އެއާއެކު ކަޑިޒް މެޗުގެ ކުރިން ކޫމަން ވަނީ ނޫސްވެރިންގެ ބައްދަލުވުމެއް ބާއްވައި، ނޫސްވެރިންގެ ސުވާލުތަކަށް ޖަވާބު ނުދީ ނުކުމެގެން ގޮސްފައެވެ. އަދި މީގެ ކުރިން ދިން އިންޓަވިއުއެއްގައި ކޫމަން ވަނީ އޭނާގެ ވަޒީފާއާ ގުޅޭ ސުވާލުތަކަށް ދެން ޖަވާބު ދޭން ޖެހޭނީ ކުލަބުގެ ވެރިން ކަމަށްވެސް ބުނެފައެވެ.