ކުރީގެ ރައީސް ޔާމީން އަބްދުލްގައްޔޫމްގެ މައްޗަށް އިއްވާފައިވާ ހުކުމާ ގުޅިގެން ސުޕްރީމް ކޯޓުގައި އިސްތިއުނާފް ކޮށްފައިވާ މައްސަލައިގައި ދައުލަތުން ޖަވާބުދިނުމަށް ބާއްވާ އަޑުއެހުން ބުރާސްފަތި ދުވަހަށް ތާވަލުކޮށްފިއެވެ.

މި މައްސަލައިގައި މިހުފްތާގެ ހޯމަ ދުވަހު ކުރިއަށް ދިޔަ އަޑުއެހުމަކީ ރައީސް ޔާމީނުގެ ފަރާތުން އިސްތިއުނާފު ކޮށްފައިވާ މައްސަލައިގައި އިސްތިއުނާފީ ނުކުތާތައް ހުށައެޅުމަށް ބޭއްވި 5 ވަނަ އަޑުއެހުމެކެވެ. މި މައްސަލައިގައި ރައީސް ޔާމީނުގެ ފަރާތުން 22 އިސްތިއުނާފީ ނުކުތާއެއް ހުށައަޅާފައިވާއިރު، މިދިޔަ ހަފުތާގެ އާދީއްތަ ދުވަހުގެ އަޑުއެހުމުގައި ހުށައެޅިފައިވަނީ އޭގެ ތެރެއިން 7 ނުކުތާގެ ތަފްސީލެވެ. އަދި ހޯމަ ދުވަހުގެ އަޑުއެހުމުގައި ހުށައެޅިފައިވަނީ 4 ނުކުތާއެވެ. އެއަށްފަހު މިދިޔަ ހަފުތާގެ ބުރާސްފަތި ދުވަހުގެ އަޑުއެހުމުގައިވެސް އިސްތިއުނާފީ ހުރިހާ ނުކުތާއެއް ހުށައެޅިފައެއް ނުވެއެވެ. ވުމާއެކު މި ހަފުތާގެ ހޯމަ ދުވަހުގެ އަޑުއެހުމުގައި ވަނީ ބާކީ ހުރި ނުކުތާތައް ތަފްސީލުކޮށްދެއްވާފައެވެ.

ރައީސް ޔާމީނުގެ ފަރާތުން ބަލި ހާލަތާއި ގުޅިގެން ހުށައަޅުއްވާފައިވާހުށައެޅުއްވުމަކާއިގުޅިގެން ހޯމަ ދުވަހުގެ އަޑުއެހުން ކުރިއަށް ގެންގޮސްފައިވަނީ 09:00ން ފެށިގެން 12:00 އަށެވެ. ރައީސް ޔާމީނުގެ ފަރާތުން ހުށައަޅާފައިވާ އިސްތިއުނާފީ ނުކުތާތައް ހުށައެޅުއްވުމާއެކު، ދެން އޮންނާނީ ދައުލަތުން އެ ނުކުތާތަކަށް ޖަވާބު ދިނުމެވެ. ޝަރީއަތުން ވަނީ މި ހަފުތާގެ ބުރާސްފަތި ދުވަހުގެ 09:00 ގައި ދައުލަތުން ޖަވާބު ދިނުމަށް އިތުރު އަޑުއެހުމެއް ބޭއްވުމަށް ތާވަލުކޮށްފައެވެ.

ފަނޑިޔާރު މަހާޒް އަލީ ޒާހިރު ވިދާޅުވީ، ދައުލަތުން ޖަވާބު ހުށައެޅުމަށްފަހު، ރައީސް ޔާމީނުގެ ފަރާތުން ހުށައަޅާފައިވާ ކަފާލާތާއި ހުކުމް ތަންފީޒު ކުރުން ފަސްކޮށްދިނުމުގެ އަމުރާއި ގުޅޭގޮތުން ވާހަކަ ދެއްކުން އޮންނާނެ ކަމުގައެވެ.

މި މައްސަލަ ބައްލަވާ ފަނޑިޔާރުންގެ މަޖިލީހުގައި ހިމެނިވަޑައިގަންނަވަނީ ފަނޑިޔާރު މަހާޒް އަލީ ޒާހިރާއި ފަނޑިޔާރު ޑރ. އަޒްމިރާލްދާ ޒާހިރާއި ފަނޑިޔާރު ޑރ. މުހައްމަދު އިބްރާހީމްއެވެ.