ރާއްޖެއިން މިހާތަނަށް 332،529 މީހުން ވެކްސިން ފުރިހަމަކޮށްފިއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)އިން ބުނީ ހޯމަ ދުވަހު 545 މީހުން ވެކްސިިން ފުރިހަމަ ކޮށްފައިވާ ކަމަށެވެ. އެއީ މާލެ ސަރަހައްދުން 107 މީހުންނާއި އަތޮޅުތެރޭގެ ރަށްރަށުން 438 މީހުންނެވެ. އެއާއެކު މުޅި ރާއްޖެއިން ވެކްސިން ފުރިހަމަކުރި އަދަދު ވަނީ 332،529ށް އަރާފައެވެ.

މީގެ އިތުރުން އެޗްޕީއޭއިން ބުނީ ހޯމަ ދުވަހު 129 މީހުން ވެކްސިންގެ ފުރަތަމަ ޑޯޒު ޖަހާފައިވާ ކަމަށެވެ. އެއީ މާލެ ސަރަހައްދުން 56 މީހުންނާއި، އަތޮޅުތެރޭގެ ރަށްރަށުން 73 މީހުންނެވެ. އެއާއެކު ފުރަތަމަ ޑޯޒު ޖެހި މީހުންގެ ޖުމްލަ އަދަދު ވަނީ 391،153ށް އަރާފައެވެ.

އޮގަސްޓު މަސް ނިމުމުގެ ކުރިން ރާއްޖޭގެ އާބާދީގެ 90 އިންސައްތަ މީހުންނަށް ވެކްސިން ދިނުމަށް ސަރުކާރުން ވަނީ ވެކްސިނޭޝަން ޕްރޮގްރާމެއް ފަށާފައެވެ. އެހެންނަމަވެސް އޮގަސްޓު މަސް ނިމުމުގެ ކުރިން ސަރުކާރުން ކަނޑައެޅި އަމާޒަށް ވާސިލްވެވިފައެއް ނުވެއެވެ. އެހެންކަމުން އަދިވެސް މި ވެކްސިނޭޝަން ޕްރޮގްރާމް ދަނީ ކުރިއަށެވެ. 

ވެކްސިން ފުރިހަމަ ކުރުމަށް ކަމާބެހޭ ފަރާތްތަކުން ދަނީ ތަކުރާރުކޮށް އިލްތިމާސްކުރަމުންނެވެ. ބަލިން ދިފާއުވުމަށް ވެކްސިން ވަރަށް މުހިންމު ކަމަށާއި، ބައްޔަށް ޕޮޒިޓިވްވި ނަމަވެސް ވެކްސިން ފުރިހަމަކޮށްފައިވާނަމަ ބަލިން މީހާއަށް ކުރާ އަސަރު ކުޑަ ކަމަށް ޑޮކްޓަރުން ވިދާޅުވެއެވެ.