ނުރައްކާތެރި ކުށްވެރިން ހުއްޓުވުމާއި، ޓެރަރިޒަމްގެ އަމަލުތައް ރާވައި ހިންގާ މީހުން ހުއްޓުވުމަށް ގާނޫނީ ހުރަހެއް ނެތް ކަމަށް ބަންޑާރަ ނައިބު އިބްރާހީމް ރިފްއަތު ވިދާޅުވެއްޖެއެވެ.

ރިފްއަތު މިހެން ވިދާޅުވީ، މުޖްތަމައަށް ނުރައްކާތެރި ފަރާތްތައް ބަންދުގައި ބޭތިއްބޭނެ ގޮތެއް ޓެރަރިޒަމް މަނާކުރުމުގެ ގާނޫނުގެ ތެރެއިން އަދިވެސް މަގުދައްކައި ނުދޭކަމަށާއި، އެފަރާތްތައް ބަންދުން ދޫކޮށްލައި ރީހެބިލިޓޭޝަން ޕްރޮގްރާމެއް ހިންގުމަށް ދައުލަތުގެ ބެލުމުގެ ދަށުގައި ބައިތިއްބާކަށް ޖާގަނުދޭކަމަށް ހޯމް މިނިސްޓަރ ވިދާޅުވެފައިވާކަމަށްބުނެ އުނގޫފާރު ދާއިރާގެ މެންބަރު މުޙައްމަދު ވަޙީދު، ކުރެއްވި ސުވާލަށް ހޯމަ ދުވަހުގެ ޖަލްސާގައި ޖަވާބު ދެއްވަމުންނެވެ.

ރިފްއަތު ވިދާޅުވީ، މުޖްތަމައަށް ނުރައްކާތެރި ފަރާތްތައް ބަންދުގައި ބޭތިއްބޭނެ ގޮތެއް ޓެރަރިޒަމް މަނާކުރުމުގެ ޤާނޫނުގެ ތެރެއިން ޖާގަ އެބައޮތްކަމަށާއި، އެފަދަ ފަރާތްތައް ހިފާ ހައްޔަރުކޮށް، މޮނިކޮން އަމުރު ނެރުމުގެ ބާރު ގާނޫނުން ލިބިދީފައިވާކަމަށެވެ. މުޖުތަމައަށް ނުރައްކާތެރި މީހުންގެ މައްސަލަ ހައްލުކުރުމަށް ޓެރަރިޒަމް މަނާކުރުމުގެ ގާނޫނުގެ ދަށުން ދެ އިޖުރާއަތެއް އޮތްކަން ފާހަގަކުރައްވައި ރިފްއަތު ވިދާޅުވީ، މޮނިކޮން އަމުރު ނެރެގެން މީހުން ހައްޔަރު ކުރަން ހޯމް މިނިސްޓަރަށް ބާރު ލިބިގެންވާ ކަމަށާއި އަދި އާންމު ހާލަތުގައި މީހުން ހައްޔަރުކުރާ އުސޫލުން ހައްޔަރު ކޮށްގެން ބަންދުގައި ބައިތިއްބައިގެން މީހުން ރިހިބިލިޓޭޓް ކުރުމުގެ ފުރުސަތު ވެސް ގާނޫނުން ލިބިދޭ ކަމަށެވެ.

މޮނިކޮން އަމުރަކީ ދިވެހިރާއްޖޭގެ ޓެރަރިޒަމް މަނާކުރުމުގެ ގާނޫނުގައި ކަނޑައަޅާފައިވާ ކުށް ކުރާކަމަށް ތުހުމަތު ކުރެވޭ މީހުންގެ ތެރެއިން، އެކަށީގެންވާ ތުހުމަތެއްގެ މައްޗަށް ބިނާކޮށް، މުޖުތަމައުއަށް ނުރައްކަލެއް ކުރިމަތިކޮށްފާނެ ކަމަށް ހޯމް މިނިސްޓަރަށް ފެންނަ މީހުން 'މޮނިޓަރކޮށް ކޮންޓްރޯލްކުރުމަށް' ކޯޓުން ނެރޭ އަމުރެކެވެ.

ޓެރަރިޒަމް މަނާ ކުރުމުގެ ގާނޫނުގެ ދަށުން ހޯމް މިނިސްޓަރަށާއި، ފުލުހުންނަށް ލިބިދީފައިވާ ބާރުތައް ހިއްސާ ކޮށްދެއްވިއެވެ. އެގޮތުން ގާނޫނުގެ ތެރެއިން ޓެރަރިޒަމްގެ ކުށުގެ ގޮތުގައި 12 ކުށެއް ކަނޑައަޅާފައިވާކަމަށާއި، މުޖުތަމައަށް ނުރައްކާތެރި މީހުން ހިފާ ހައްޔަރުކޮށް އެފަދަ މީހުންގެ މައްޗަށް މޮނިކޮން އަމުރުނެރުމުގެ ބާރު ހޯމް މިނިސްޓަރަށް ގާނޫނުން ލިބިދީފައިވާކަމަށެވެ. އަދި އެފަދަ މީހުންގެ މައްޗަށް މޮނިކޮން އަމުރު ނެރުމަށް ހައިކޯޓަށް ގޮސްފިނަމަ މިހާތަނަށް އެއަމުރު ނެރެދީފައިވާކަމަށް ވިދާޅުވިއެވެ.

ބަންޑާރަ ނާއިބު ވިދާޅުވީ މޮނިކޮން އަމުރަކީ ގާނޫނުގައި އެއްއަހަރު ދުވަހަށް ނެރެވޭ އަމުރެއް ނަމަވެސް އެ މުއްދަތު އިތުރު ކުރުމަށް ވެސް ގާނޫނު ތަންދޭ ކަަމަށެވެ. އަމުރު ނެރޭ މީހާގެ މައްޗަށް އެއްފަހަރަށްވުރެ ގިނަ ފަހަރަށް ވެސް އަމުރު ނެރެވިދާނެކަމަށެވެ.

ޓެރަރިސްޓް ހަނގުރާމަތަކާއި، އެފަދަ ފަރާތްތަކުގެ ގޮތުގައި ބެލެވޭ މީހުންނަށް ރިހިބިލިޓޭޝަން ޕްރޮގުރާމު ހިންގުމުގެ ބާރުވެސް ހޯމް މިނިސްޓަރަށާއި، ފުލުހުންނަށް ލިބިދީފައިވާކަމަށާއި، މިހާރު އަމަލު ކުރަމުންދާ ޓެރަރިޒަމް މަނާ ކުރާ ޤާނޫނުގައި ހުރި ކަންބޮޑުވުންތަކަށް ހައްލު ގެނައުމަށް ފުލުހުންނާއި ހޯމް މިނިސްޓްރީއާއެކު ކުރެވުނު މަޝްވަރާތަކަށްފަހު ބިލެއް މަޖިލީހަށް ހުށަހަޅުއްވާފައިވާނެ ކަމަށް ވިދާޅުވިއެވެ.

މިއަދުގެ ޖަލްސާގައި މެމްބަރުންވަނީ މުޖުތަމައުގައި ނުރައްކާތެރި ކުށްވެރިން މިހާރުވެސް އުޅެމުންދާތީއާއި، އަދި ޚާއްސަކޮށް، ޓެރަރިޒަމަށް ތުހުމަތު ކުރެވޭ ގިނަ މީހުން އުޅެމުންދާތީ ވަރަށް ބޮޑަށް ކަންބޮޑުވުން ފާޅުކޮށްފައެވެ.

ރިފްއަތު ވިދާޅުވީ ގާނޫނުގައި އޮތް ގޮތަށް ކަންކަން ކުރެވިއްޖެއްޔާ ހައްލު ލިބޭނެ ކަަމަށެވެ.