ރަައްޔިތުންގެ މަޖިލީހުގެ އިދާރާގައި ހުންނަ ޖުމްހޫރީ ޕާޓީގެ އޮފީހުގެ ބޭރުގައި "ޞާލިޙު ޕާޓީ" އަދި "އެމްއެމްޕީ" ނުވަތަ މޯލްޑިވްސް މިލިޓަރީ ޕާޓީ ލިޔެފައިވާ ކަރުދާސްގަަނޑެއް ތަތްކުރި މައްސަލަ ސުލޫކު ކޮމިޓީން އަދިވެސް ބަލާ ނުނިމޭ ކަމަށް ރައްޔިތުންގެ މަޖިލީހުން ބުނެފިއެވެ.

މިކަން ހިނގާފައިވަނީ ޖުލައި މަހުގެ 7ވަނަ ދުވަހުއެވެ. މައްސަލަ ސުލޫކު ކޮމިޓީން ބަލަން ނިންމީ އޮގަސްޓް މަހުގެ 25ވަނަ ދުވަހުއެވެ. ވީހާވެސް އަވަހަށް ކަންކަން ބަލައި ފިޔަވަޅު އަޅަން ޖެހޭނެ ކަމަށް ރައްޔިތުންގެ މަޖިލީހުގެ މެމްބަރުން ވިދާޅުވާއިރު، މަޖިލީހުގެ އިދާރާ ތެރޭގައި ހިނގާ ދިޔަ ކަމެއް ނުބެލި ކޮމިޓީގައި އޮންނަތާ އެތައް ދުވަހެއް މިވަނީ ވެފައެވެ. މިކަން ހިނގާދިޔަގޮތް ހޯދުމަށް ސީސީޓީވީ ފުޓޭޖް ހޯދުމަށްވެސް ޖުމްހޫރީ ޕާޓީން ވަނީ އެދިފައެވެ.

ޖުމްހޫރީ ޕާޓީގެ އޮފީހުގެ ބޭރުގައި އެހެން ނަމެއް ތަތްކުރި މައްސަލައިގައި ޖުމްހޫރީ ޕާޓީގެ ފަރާތުން ވަނީ މަޖިލީހުގެ އިދާރާއަށް ސިޓީއެއް ފޮނުވާފައެވެ. އެކަމާގުޅިގެން ކޮމިޓީގެ ބައްދަލުވުމެއްވެސް ވަނީ ބާއްވާފައެވެ. މި ބައްދަލުވުމުގައި, މުޤައްރިރު, ކުޅުދުއްފުށި އުތުރު ދާއިރާގެ މެމްބަރު ޔާސިރު ޢަބްދުއްލަޠީފް ވަނީ މިސިޓީ އިއްވަވާފައެވެ.

ސިޓީގައި ބުނެފައިވަނީ ރައްޔިތުންގެ މަޖިލީހުގެ އިދާރާގެ ތެރެއިން ޖުމްހޫރީ ޕާޓީއަށް ދޫކޮށްފައިވާ އޮފީސް ކޮޓަރީގައި ހުންނަ އެޕާޓީގެ ނަން ބޯޑުގައި އެހެން ނަމެއް ކަރުދާހުގައި ލިޔެ ހިއްޕާފައިވާ މައްސަލައަކީ ޖޭޕީއާއި ޖޭޕީއަށް ނިސްބަތްވާ ރައްޔިތުންގެ މަޖިލީހުގެ މެމްބަރުންގެ އިމްތިޔާޒުތަކަށް އުނިކަން ގެނެސް, ޕާޓީގެ ޕާލަމެންޓަރީ ގްރޫޕްގެ މެމްބަރުންގެ ޙުރުމަތް ކެނޑުމަށް ކޮށްފައިވާ ވަރަށް ހަޑިމުޑުދާރު ޢަމަލެއް ކަމުގައެވެ. މަޖިލީހުގެ ޤަވާއިދުގައި, މަޖިލީހުގެ ޙުރުމަތާއި ޤަދަރު ހިފެހެއްޓުމަކީ މަޖިލީހުގެ ރައީސަށް މަތިކޮށްފައިވާ ޒިންމާއެއްކަމަށް ވީހިނދު އެމައްސަލަ ހިނގައިދިޔަ ގޮތް މަޖިލީހުން ކަނޑައަޅާފައިވާ އުސޫލުން ބައްލަވައި ދެއްވުމަށާއި މިފަދަ އަމަލުތައް ތަކުރާރުވިޔަ ނުދިނުމަށް އަޅަންޖެހޭ އެންމެހާ ފިޔަވަޅުތައް އެޅުމަށް އެދޭކަމަށެވެ.

އަދި މިއަމަލު ހިންގި ފަރާތެއް ހޯދުމަށް ޖޭޕީގެ ޕާލަމަންޓްރީ ގްރޫޕުން ކުރިޔަށް ގެންދާ މަސައްކަތުގެ ބޭނުމަށް ސީސީޓީވީ ފުޓޭޖް ފޯރުކޮށްދިނުމަށްވެސް ޖޭޕީން ވަނީ ސިޓީގައި އެދިފައެވެ.

ޖޭޕީގެ ސިޓީއާ ގުޅިގެން ރައްޔިތުންގެ މަޖިލީހުގެ ރައީސް ވަނީ މަޖިލީހުގެ އިދާރާއަށް, މިކަން ބަލައިދިނުމަށް އެދި ސިޓީއެއް ފޮނުއްވާފައެވެ.

މިމައްސަލާގައި ކޮމިޓީގެ މެމްބަރުންގެ ދެއްކެވި ވާހަކަފުޅުގައި, މިކަމަކީ ސީރިޔަސް މައްސަލައެއްގެ ގޮތުގައި ކޮމިޓީން ބަލަންޖެހޭ މައްސަލައެއްގެ ގޮތުގައި ފާހަގަކުރެއްވިއެވެ. އަދި މުސްތަގުބަލުގައި މިފަދަ ކަމެއް ތަކުރާރުވިޔަ ނުދިނުމަށްވެސް މިމައްސަލަ ބެލުމުގެ މުހިންމުކަން މެމްބަރުން ވަނީ ފާހަގަކުރައްވާފައެވެ. މިކަމަކީ މަޖިލީހުގެ އިދާރާއާއި މެމްބަރުންގެ ޤަދަރަށް އުނިކަން ލިބޭ ކަމެއްކަމަށް މެމްބަރުން ވަނީ ވިދާޅުވެފައެވެ.

ނަމަވެސް ސީސީޓީވީ ފުޓޭޖް ޖުމްހޫރީ ޕާޓީއަށް ލިބޭނެ ގޮތަށް އެދިފައިވާ އެދުމާމެދު މެމްބަރުންގެ މެދުގައި ވަނީ ޚިޔާލު ތަފާތުވެފައެވެ. އެއީ މަޖިލީހުގެ ސަލާމަތާވެސް ގުޅުންހުރިކަމަކަށްވާތީ ފުޓޭޖް ފޯރުކޮށްދިނުމަކީ އެންމެ އެދެވޭ ގޮތް ނޫންކަމަށް ބައެއް މެމްބަރުން ވިދާޅުވިއެވެ.

މިމައްސަލަ މުޅި ކޮމިޓީން ބެލުމަށް ތިނަދޫ ދެކުނު ދާއިރާގެ މެމްބަރު ޢަބްދުﷲ ސަނީފް ވަނީ ހުށަހަޅުއްވާފައެވެ. އަދި މިހުށަހެޅުމަށް މަޑުއްވަރީ ދާއިރާގެ މެމްބަރު އާދަމް ޝަރީފް ވަނީ ތާއީދުކުރައްވާފައެވެ. ކޮމިޓީން ފާސްކޮށްފައިވަނީ ވަކި މައްސަލައެއްގެ ގޮތުގައި މިމައްސަލަ އެޖެންޑާކޮށް މިކަން ހިނގާދިޔަ ގޮތް ކޮމިޓީން ބެލުމަށެވެ.