"ގުޅީފަޅު މަޝްރޫއު" ގެ ދަށުން ފްލެޓް ގަތް މީހަކަށް ގެއްލުމުގެ ބަދަލުގެ ގޮތުގައި ފައިސާ ނަގައިނުދޭން ހުކުމްކޮށްފިއެވެ.

މި މައްސަލައަކީ ގްލޯބަލް ޕްރޮޖެކްޓްސް ޑިވެލޮޕްމަންޓް ކޯޕަރޭޝަން ޕްރައިވެޓް ލިމިޓެޑުން ގުޅީފަޅުގައި އަޅަމުންދިޔަ ފްލެޓްތަކުގެ ތެރެއިން ދައުވާކުރާ ފަރާތުން ގަތް 2 (ދޭއް) ފްލެޓް އެފަރާތާ ހަވާލު ކޮށްފައިނުވާތީ، ބަދަލުގެ ގޮތުގައި ހުޅުމާލެއިން ބިމެއް ނުވަތަ ހުޅުމާލެއިން 2 ފްލެޓް ލިބިދިނުމަށާއި، ގެއްލުމުގެ ބަދަލުގެ ގޮތުގައި 4,348,452.52/-ރ. (ހަތަރު މިލިޔަން ތިންލައްކަ ސާޅީސް އަށްހާސް ހަތަރުސަތޭކަ ފަންސާސް ދެރުފިޔާ ފަންސާސް ދެލާރި) ހޯދުމަށް އެދި ސިވިލް ކޯޓަށް އަމިއްލަ ފަރާތަކުން ހުށައެޅި މައްސަލައެކެވެ.

މައްސަލަ ހުށައެޅި ފަރާތުން ގެއްލުމުގެ ބަދަލުގެ ގޮތުގައި ނަގައިދޭން އެދިފައިވާ ފައިސާއަކީ އޭނާ ކުއްޔަށް އުޅެންޖެހުމުގެ ސަބަބުން ގެއްލުމުގެ ބަދަލުގެ ގޮތުގައި ދައުލަތުން ދައްކަން ޖެހޭނެކަމަށް ބުނެ، އެދިފައިވާ އަދަދެކެވެ.

މި މައްސަލައިގައި ދައުލަތުން ދައުވާއަށް ޖުމްލަ ގޮތެއްގައި އިންކާރު ނުކުރިނަމަވެސް، ގެއްލުމުގެ ބަދަލުގެ ގޮތުގައި ނަގައިދިނުމަށް އެދިފައިވާ އަދަދަށް އިންކާރުކުރާކަން ވަނީ ފާހަގަކޮށްފައެވެ. އެގޮތުން ގުޅީފަޅުން ފްލެޓްގަތުމަށް ފައިސާދެއްކުމަށްފަހު މިހާތަނަށް ފްލެޓް ލިބިފައިނުވާ ފަރާތްތަކަށް ބަދަލުދިނުމާ ގުޅޭގޮތުން ސަރުކާރުން ކަނޑައަޅުއްވާފައިވާ ސިޔާސަތުގެ ދަށުން ދިނުމަށް ހަމަޖެހިފައިވާ ގެއްލުމުގެ ބަދަލުގެ މިންވަރަކީ އަދުލުވެރި ބަދަލެއްކަމަށް ދައުލަތުން ދެކޭކަން ފާހަގަކޮށްފައިވެއެވެ.

އެގޮތުގެ މަތިން ފްލެޓް ގަނެފައިވާ ފަރާތްތަކަކީ ސީދާ ދައުލަތާއެކު އެއްބަސްވުންތަކެއް އޮތް ފަރާތްތަކަކަށް ނުވިނަމަވެސް ކޮންސެޝަން އެގްރީމަންޓް ބާތިލްކުރުމުގެ ސަބަބުން ފްލެޓް ލިބިފައިނުވާ ފަރާތްތަކަށް ލިބޭނެ ގެއްލުންތަކަށް ރިޢާޔަތްކުރުމަށްފަހު، ސަރުކާރުން ހެޔޮ ނިޔަތުގައި ގުޅީފަޅުން ފްލެޓް ގަތުމަށް ފައިސާ ދައްކާފައިވާ އެންމެހައި ފަރާތްތަކަށް ހުޅުމާލޭގައި ހަދާ ސޯޝަލް ހައުސިންގ ފްލެޓްތަކުން ފްލެޓް ހަމަޖެއްސެވުމަށް ނިންމާފައިވާކަން ދައުލަތުން ވަނީ ފާހަގަކޮށްފައެވެ.

ދައުލަތުން ބުނީ ހުޅުމާލެއިން ދެވޭ ފްލެޓްތަކަކީ ފްލެޓްތަކުގެ ޖުމްލަ އަގާއި، ފްލެޓްތައް ހުރި ބިމުގެ ސަރަޙައްދުގެ ގޮތުން އެތަނުގެ ބާޒާރުމަތީ އަގާއި، ފްލެޓްތައް ހުރި ބިމުގެ އަގަށް ބަލާއިރު ވެލިއު މަތި ފްލެޓްތަކެއްކަމަށެވެ. އަދި ގުޅީފަޅުން ފްލެޓް ގަތުމަށް ދައްކާފައިވާ ފައިސާ އެފަރާތުން ހުޅުމާލެއިން އިޚްތިޔާރުކުރާ ފްލެޓެއްގެ އަގުން އުނިކުރެވޭނެކަންވެސް ދައުލަތުން ވަނީ ފާހަގަކޮށްފައެވެ.

މި މައްސަލައިގައި ދެފަރާތުން ފާހަގަކުރި ކަންކަމަށް ރިއާޔަތްކޮށް ސިވިލް ކޯޓުން ކުރި ހުކުމުގައި ބުނެފައިވަނީ، ދައުވާކުރާ ފަރާތަށް މިހާތަނަށް ފްލެޓެއް ހަވާލުކުރެވިފައި ނުވަނީ، ހުޅުމާލޭގައި ހަދާ ސޯޝަލް ހައުސިންގ ފްލެޓްތަކުން ފްލެޓް ހަމަޖެއްސެވުމަށް ދައުލަތުން ކަނޑައަޅާފައިވާ ސިޔާސަތުގެ ދަށުން ހުށަހަޅާފައިވާ އޮޕްޝަންތަކުގެ ތެރެއިން އޮޕްޝަނެއް ދަޢުވާކުރާ ފަރާތުން ޚިޔާރުކޮށްފައި ނުވާތީކަމަށެވެ. އަދި އޭގެ ތެރެއިން އޮޕްޝަނެއް ގަބޫލުކޮށްގެން ފްލެޓެއް ހޯދުމުގެ ފުރުސަތު ދައުވާކުރާ ފަރާތަށް އޮތްކަން ހުކުމުގައި ފާހަގަކޮށްފައިވެއެވެ.

ސިވިލް ކޯޓުން ވަނީ ދަޢުވާކުރާ ފަރާތުން ގެއްލުމުގެ ބަދަލުގެ ގޮތުގައި ދައުލަތުގެ ކިބައިން ނަގައިދިނުމަށް އެދިފައިވާ ފައިސާ ޝަރީއަތުން ނަގައިދެވޭނެ ގާނޫނީ ހަމައެއް ނެތްކަމަށް ހުކުމްކޮށްފައެވެ.