ހުޅުމާލެ 147 ނަމްބަރު ފްލެޓުގައި ހިނގި އަލިފާނުގެ ހާދިސާއާ ގުޅިގެން ހާލުގައި ޖެހުނު ދެ އާއިލާއަށް އެހީތެރިކަން ފޯރުކޮށްދީފިއެވެ.

ނެޝަނަލް ޑިޒާސްޓަރ މެނޭޖްމެންޓް އޮތޯރިޓީން ބުނީ މި ހާދިސާއާއި ގުޅިގެން 2 އާއިލާއެއްގެ 13 މީހަކަށް ވަގުތީ ބޯހިޔާ ވަހިކަމާއި ކެއިން ބުއިމުގެ އެހީތެރިކަން ފޯރުކޮށްދީފައިވާ ކަމަށެވެ.

އަލިފާނުގެ މި ހާދިސާ ހިނގާފައިވަނީ 147 ވަނަ ފްލެޓުގެ ދެވަނަ ފަންގިފިލާގައެވެ. އަލިފާންގަނޑުގެ އަސަރު އެ ފެލްޓުގެ ތިންވަނަ ފަންގިފިލާއަށް ވެސް ކޮށްފައިވާ ކަމަށް މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް)އިން ވަނީ ބުނެފައެވެ. ހޯމަ ދުވަހުގެރޭ 19:44ގައި މި އަލިފާންގަނޑު އެއްކޮށް ނިއްވާލާފައިވާއިރު ދެވަނަ ފަންގިފިލާގެ ދެ އެޕާޓްމެންޓަށާއި، ތިންވަނަ ފަންގިފިލާގެ ދެ އެޕާޓްމެންޓަކަށްވެސް ގެއްލުން ވެފައިވެއެވެ.

މި ހާދިސާ ހިނގަން މެދުވެރިވި ސަބަބު މިހާތަނަށް ދެނެގަނެވިފައިނުވާ ކަމަށް އެމްއެންޑީއެފުން ބުނެފައިވެއެވެ.